ELM VƏ TƏHSİL


Dövlət təltiflərinə layiq görülən təhsil işçilərinə mükafatlar təqdim olunub YENİLƏNİB

Bakı, 8 noyabr, AZƏRTAC

Noyabrın 8-də Təhsil Nazirliyində dövlət təltiflərinə layiq görülən təhsil işçilərinə mükafatların təqdim olunması mərasimi keçirilib.

AZƏRTAC xəbər verir ki, tədbirdən əvvəl təhsil naziri Ceyhun Bayramov, rəhbər təhsil işçiləri və dövlət təltiflərinə layiq görülən müəllimlər Fəxri xiyabana gələrək xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini yad edib, məzarı önünə əklil qoyublar. Görkəmli oftalmoloq alim, akademik Zərifə xanım Əliyevanın da xatirəsi anılıb, məzarı üzərinə tər güllər düzülüb.

Sonra tədbir iştirakçıları Şəhidlər xiyabanına gələrək Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının məzarlarını ziyarət edib, “Əbədi məşəl” abidəsinin önünə əklil qoyublar.

Tədbirdə çıxış edən Ceyhun Bayramov Prezident İlham Əliyevin sərəncamları ilə təhsilin inkişafındakı xidmətlərinə görə fəxri adlara layiq görülən təhsil işçilərini təbrik edib və onlara fəaliyyətlərində uğurlar arzulayıb. Nazir son illərdə ölkəmizdə insan kapitalının inkişafı, o cümlədən təhsilin keyfiyyət göstəricilərinin yüksəldilməsi sahəsində həyata keçirilən məqsədyönlü tədbirlər barədə danışıb.

Ceyhun Bayramov ümummilli lider Heydər Əliyevin müəllim peşəsinə sonsuz diqqət göstərdiyini xatırladıb, müəllimlərə dövlət qayğısının göstərilməsi istiqamətində görülən işlərin Prezident İlham Əliyev tərəfindən uğurla davam etdirildiyini vurğulayıb. Nazir deyib ki, son illərdə Təhsil Nazirliyinin fəaliyyətində müəllimlərlə bağlı siyasət prioritet sahəyə çevrilib. Ən ciddi uğurlar da məhz müəllim nüfuzunun, onların peşəkarlıq səviyyəsinin yüksəldilməsi, istedadlı insanların müəllim peşəsinə cəlb edilməsi istiqamətində əldə edilib.

“Azərbaycan Respublikasında təhsilin inkişafı üzrə Dövlət Strategiyası”nın təsdiq edilməsindən ötən dövr ərzində bütün pillə və səviyyələr üzrə inkişafı diqqətə çatdıran nazir bildirib ki, qarşıda duran ən vacib vəzifələr təhsilin hər bir vətəndaş üçün əlçatanlığının təmin edilməsi, keyfiyyət göstəricilərinin yüksək və rəqabətli olması, eyni zamanda, təhsil vasitəsilə dəyərlər sisteminin formalaşdırılmasıdır. Bununla əlaqədar hər bir müəllim, təhsil işçisi qeyd edilən məsələləri əsas fəaliyyət istiqamətləri kimi nəzərə almalı və təmin etməlidir.

Ötən il təhsil sahəsində aparılan islahatların böyük bir mərhələsinə yekun vurulduğunu deyən nazir bildirib ki, diaqnostik qiymətləndirmə tamamlanıb, əməkhaqqı islahatının birinci mərhələsi başa çatdırılıb. Artıq müəllimlərin əməyinin stimullaşdırılması davamlı və silsilə xarakter daşıyır. Bu il Prezident İlham Əliyevin müvafiq Sərəncamına əsasən sentyabrın 1-dən müəllimlərin əməkhaqları növbəti dəfə artırılıb. Nəticədə Azərbaycan məktəblərində, ümumtəhsil sistemində müəllimlərin orta əməkhaqqı 600 manata çatıb, 1000 manatdan artıq əməkhaqqı alan müəllimlərin sayı isə 5 min nəfəri ötüb və bu sahədə islahatlar davam etdiriləcək.

Nazir qeyd edib ki, cəmiyyətdə müəllim peşəsinin nüfuzu artır. Cari ildə müəllimlərin işə qəbulu zamanı bu ixtisasa yiyələnmək istəyənlərin sayı 55 minə yaxın olub. Yüksək rəqabətli şəraitdə keçən bir necə mərhələli imtahanlar nəticəsində 8 minə yaxın insan uğur qazanıb və məktəblərdə fəaliyyətə başlayıb. Bu il ərzində əlavə yerləşmələr də həyata keçiriləcək. Sevindirici haldır ki, gənclər arasında müəllimlik peşəsinə gələnlərin sayı xeyli artıb. Bu ilin statistikasına görə, 500 baldan artıq nəticə göstərən hər 4 məzunun biri ixtisas seçimində birinci müəllimlik peşəsini seçir. Bu göstərici əvvəlki dövrlərlə müqayisədə yüksək nəticədir.

Təhsil Nazirliyi tərəfindən müəllimlərin potensialının hərtərəfli inkişaf etdirilməsi istiqamətində həyata keçirilən tədbirlərdən danışan Ceyhun Bayramov məlumat verib ki, 2017-ci ildən təhsildə inkişaf və innovasiyalar üzrə qrant müsabiqələri keçirilir və hər il dövlət büdcəsindən bu istiqamətdə 1 milyon manat vəsait ayrılır. Bundan məqsəd odur ki, xüsusi layihələri ilə seçilən müəllimlər və məktəblər öz yeniliklərini təhsil sistemində tətbiq etsinlər. Bu müddət ərzində 124 məktəb və 324 müəllimin layihələri təsdiqlənib.

Azərbaycan müəllimlərin 15-ci qurultayında “Azərbaycan Gənc Müəllimlər Assosiasiyası”nın yaradılması barədə qərar qəbul edildiyini xatırladan nazir ötən müddət ərzində bu istiqamətdə xeyli sistemli iş görüldüyünü diqqətə çatdırıb.

Nazir Ceyhun Bayramov qeyd edib ki, təhsil sistemində, məktəblərin maddi texniki bazasının müasirləşdirilməsi istiqamətində ötən dövrdə işlər davam etdirilib. Son 15 ildə 3 min 200-dən çox, son 5 ildə 600-dən artıq, bu il isə 84 yeni məktəb binası inşa edilib və əsaslı təmir olunub.

Təhsil sistemində yeniliklərdən danışan nazir bildirib ki, bu tədris ilində buraxılış və qəbul imtahanları ilk dəfə olaraq yeni formata uyğun həyata keçirilib, 400-dək ümumtəhsil məktəbləri üçün yeni dərsliklər hazırlanıb və istifadəyə verilib. Hazırda bu istiqamətdə işlər davam etdirilir.

Mərasimdə təltif olunan müəllimlər göstərilən diqqət və qayğıya görə ölkə Prezidentinə minnətdarlıqlarını bildirib, şagirdlərin hərtərəfli bilik və bacarıqlara malik şəxsiyyət kimi yetişdirilməsi işində yüksək əzmlə çalışacaqlarını qeyd ediblər.

Sonra təltif edilən təhsil işçilərinə medal və vəsiqələr təqdim olunub.

Xatırladaq ki, Prezident İlham Əliyevin 2019-cu il 3 oktyabr tarixli sərəncamları ilə təhsilin inkişafındakı xidmətlərinə görə 126 nəfər “Tərəqqi” medalı və “Əməkdar müəllim” fəxri adı ilə təltif edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.