Dünya Güləş Birliyi yunan-Roma güləşi qaydalarında dəyişikliklər edib

Bakı, 1 may, AZƏRTAC

Dünya Güləş Birliyi yunan-Roma güləşi qaydalarında bəzi dəyişikliklər edib. Bu dəyişikliklər qarşıdakı bir neçə ay ərzində keçiriləcək beynəlxalq yarışlarda sınaqdan keçirildikdən sonra qüvvəyə minəcək.

AZƏRTAC xəbər verir ki, dəyişikliklərə qayda pozuntularına görə cərimələrin artırılması, zonadan kənarlaşdırmaya görə qiymətləndirmənin açıqlanması və məşhur 5 xallıq qiymətləndirmənin bərpa edilməsi daxildir.

Qayda pozuntularına görə edilən dəyişikliklər daha çox diqqəti cəlb edir. Belə ki, əgər əvvəllər ayaqla hərəkətlər, başla zərbə və ya parterdə düzgün oturmamağa görə qayda pozan güləşçiyə sadəcə xəbərdarlıq edilirdisə, yeni qaydalara görə artıq rəqibə əlavə 2 xal da veriləcək. Bu cəza parterdə olarkən “açılmayan” (fəndin icrasına mane olan) güləşçilərə də şamil ediləcək.

Güləşçilərin rəqibi xalçanın kənarına itələyərək xal qazanmağa meyl etməməsi üçün xalçadan kənarlaşdırmaya görə tətbiq olunan cəzalandırma qaydası dəyişdirilib və daha da sərtləşdirilib. Belə ki, yeni qaydaya əsasən rəqibi xalçadan itələyərək kənarlaşdırmağa görə güləşçiyə xal verilməyəcək.

Qolların hərəkətindən asılı olmayaraq, beldən tutma fəndinin icrası güləşçiyə əvvəl 1 xal qazandırırdısa, indi 2 xal qazandıracaq. Beldən tutma fəndinin ardıcıl icrasındakı qiymətləndirmə isə əvvəlki qaydada olduğu kimi saxlanılır.

Dünya Güləş Birliyi güləşə marağın və baxımlılığın daha da artırılması məqsədilə rəqibi böyük amplitudalı fəndlə təhlükəli vəziyyətə salan güləşçinin 5 xalla qiymətləndirilməsi qaydasını da bərpa edib.

Xəbərdarlığa görə diskvalifikasiyaların baş verməməsi üçün yeni qaydalara əsasən passivliyə görə xəbərdarlıq verilməsi ləğv edilib. Yalnız aşkar şəkildə rəqibin qarşısından qaçmaq, xalçadan kənara qaçmaq və digər bu kimi hallarda xəbərdarlıq veriləcək. İlk qayda pozuntusuna görə şifahi xəbərdarlıq, ikinci dəfə isə artıq güləşçiyə ayaq üstə və ya parterdə davam etmək üçün seçim imkanı veriləcək. Bu seçim yalnız böyük yaş qrupuna aiddir. İstənilən passivliyə görə ardıcıl ikinci xəbərdarlıq nəticəsində rəqibə 1 xal verilir və parter vəziyyəti üçün məcburi seçim edilir. Ancaq yeniyetmə və gənclərdə məcburi parter vəziyyəti ləğv edilib. Böyük yaş qrupunda isə parter vəziyyəti ilə bağlı dəyişikliyə 2016-cı ildə keçiriləcək Yay Olimpiya Oyunlarından sonra yenidən baxılacaq.

Yeniyetmə, gənclər və U-23 yaş qrupunda birinci passivliyə görə şifahi xəbərdarlıq, ikinci dəfə rəsmi xəbərdarlıq, üçüncü dəfə isə rəqibə 1 xal verilməsi nəzərdə tutulur. Bundan sonra baş verəcək hər ikinci xəbərdarlıq rəqibə bir xal verilərək qiymətləndiriləcək. Passivliyə görə edilən xəbərdarlıq və rəqibə xal verilməsi üçün görüş dayandırılmayacaq.

Bu dəyişikliklər mayın 6-11-də Qətərin paytaxtı Dohada keçiriləcək böyüklər arasında Asiya çempionatında və mayın 6-8-də Havanada təşkil olunacaq yeniyetmə və gənclərin Pan-Amerika çempionatında qüvvəyə minəcək.