Maliyyə möhtəkirlərinin “xaç atasının” qlobal fırıldaqları

Bakı, 6 sentyabr, AZƏRTAC

1992-ci il sentyabrın 15-də Böyük Britaniyada “Qara çərşənbə” kimi tarixə düşən funt sterlinqin dəyərdən salınması kimi böyük möhtəkirlik əməliyyatı həyata keçirildi. Hiyləgər şəkildə düşünülmüş maliyyə fırıldağının müəllifi Corc Soros (Şoroş Şvarts) idi. Bu məşhur möhtəkirin birjalardakı adamları Britaniya valyutasını ciddi şəkildə dəyərdən sala bilmədilər, hərçənd funt-sterlinqin “Avropa Dərəcə Mexanizmi” (ERM) sistemindən çıxarılmasına nail oldular. Həmin möhtəkirlik əməliyyatından bir gündə 1 milyard dollar əldə edilmişdi. Corc Sorosun sonrakı illər hansı əməllər törədəcəyi o zaman çoxlarının ağlına gəlmirdi.

Corc Soros təsis etdiyi “Quantum Fund” maliyyə qurumu ilə “uğurlu” Britaniya əməliyyatının ardından Asiya birjalarına girişdi. Bu regionda da fəal möhtəkirlik əməliyyatının nəticəsi olaraq milli valyutaların dəyərsizləşməsi və sosial gərginliyin artması baş verdi. 1997-1998-ci illərdə Tailand və Malayziyadakı ciddi iqtisadi böhran sonralar İndoneziya, Cənubi Koreya və Filippinə də sıçramış oldu. Maliyyə möhtəkirləri həmin illər misilsiz uğurlar əldə etmiş, milyardlarla dollar onların “xaç atası” Sorosun cibinə axmışdı. Amansız və hiyləgər maliyyə oyunları nəticəsində iqtisadiyyatı daha güclü olan Yaponiya belə böhrana yuvarlanmışdı.

2008-ci ilin sentyabrında ABŞ-ın ən qüdrətli maliyyə holdinqi “Lehman Brothers”in iflası və ardından başlayan və hələ də davam edən qlobal maliyyə böhranı da Corc Sorosun möhtəkirliyinin nəticəsi idi. Belə ki, həmin ilin əvvəlində bu holdinqin 10 milyard ABŞ dolları dəyərində səhmlərini alan məşhur maliyyə möhtəkiri onu böhran olacağı şayiəsi ilə sataraq qlobal maliyyə bazarlarını dağıtmağa və Barak Obamanı Birləşmiş Ştatların prezidenti seçdirməyə nail olmuşdu. Məqsəd, “iqtisadi vəziyyət pisdir” deyən Obamanın seçkilərdəki rəqibi senator MakKeynin “iqtisadiyyat normal məcrasındadır” fikrinə qarşı haqlı çıxarılması idi.

“Nyu-York Tayms” qəzetinin ən çox oxunan müəllifi Daq Keysi öz məqaləsində Sorosun “bulanıq suda balıq tutmaq” məharətini geniş təhlil edərək belə qənaətə gəlmişdi ki, onun maliyyə spekulyasiyaları dünyanın müxtəlif ölkələrində iqtisadi və sosial böhranlara səbəb olmaqla yanaşı, sabitliyin pozulması, həmçinin münaqişə ocaqlarının yaranması ilə müşahidə olunur. Ukraynadakı proseslərdə, ABŞ və Avropa İttifaqının Rusiyaya qarşı tətbiq etdiyi sanksiyalarda, regional və transmilli enerji layihələrinin əngəllənməsində də Sorosun əli olduğu barədə təkzibolunmaz faktlar mövcuddur.

Corc Soros və dünyanı silkələyən “demokratiya” oyunları

ABŞ-ın keçmiş prezidenti Corc Buşun zamanında geniş vüsət alan Yaxın Şərq və keçmiş Sovet məkanına “demokratiya” ixracının hansı faciəli nəticələrə gətirib çıxardığını yazmağa ehtiyac yoxdur. “Nyu-York Tayms” qəzetinin yazdığına görə, Ağ evin sonrakı sahibi Barak Obamanın seçilməsini də məhz Corc Soros maliyyələşdirib. Şərhçi Ueyn Medsenin “Cyrano`s Journal” nəşrinin 2015-ci il 13 yanvar tarixli nömrəsində dərc olunmuş məqaləsində göstərilir ki, bir çox ölkələrdə “rəngli inqilab”ların, hakimiyyət dəyişikliyinin zorakı üsullarla həyata keçirilməsini maliyyələşdirən virtuoz manipulyator Birləşmiş Ştatlarda 2008-ci və 2012-ci il prezident seçkilərində milyonlarla dollar xərcləməklə Obama administrasiyasının yaratdığı münbit şəraitdən yararlanaraq milyardlarla dollar əldə etmişdir. O zamanın baş prokuroru Loretta Linch Sorosu Barak Obamanın “pul çantası” adlandırmışdı. Kiyevdəki “Maydan” hadisələrini Skopyedə təkrar etmək üçün pul ayıran Corc Soros ABŞ-ın bu ölkələrdəki diplomatik korpuslarını idarə etməyə belə nail olmuşdu. Dövlət katibi Hillari Klintonun elektron poçtunda aşkar edilmiş bir məktubda deyilir ki, Soros sonradan Obamaya göstərdiyi dəstəyə görə təəssüfləndiyini də bildirmişdir.

Milliyyətcə yəhudi olan Corc Sorosun vətəni Macarıstanda da, İsrail Dövlətində də bədnam reputasiyası vardır. Bu il iyulun 19-da Budapeştdə səfərdə olan İsrailin Baş naziri Benyamin Netanyahu və Macarıstan Prezidenti Viktor Orban arasında olan görüşdə Sorosun Macarıstanda xaos yaratmaq planlarından narazılıq ifadə olunmuş, onun küçə və meydanlarda asılmış plakatları yığışdırılmışdı.

Avropadakı siyasi və iqtisadi təhlilçilər Brexit əməliyyatında da Soros izindən yazırlar. Onun mütəşəkkil möhtəkirlər dəstəsinin əsas məqsədi Britaniya ilə Avropa İttifaqı arasında nifaq yaratmaqla əlavə pul qazanmaqdır. İngiltərə mətbuatının yazdığına görə, Soros Brexit referendumu ərəfəsində mühafizəkar qruplara böyük maliyyə dəstəyi göstərmişdir.

Azərbaycanda boşa çıxan niyyətlər

Maliyyə fırıldaqçılarının “xaç atasının” sərvətini artırmaq naminə qlobal miqyasda böyük kataklizmlərə rəvac verən möhtəkirlərin planları Azərbaycanda boşa çıxdı. Sorosun Açıq Cəmiyyət Fondu neft iyinə gəldiyi Azərbaycanda “demokratiya” ixracını, “rəngli inqilab”ları həyata keçirə bilmədi. Bu fiaskonun səbəbi ölkəmizdə müstəqil siyasət aparan güclü iqtidarın olması, Azərbaycanın böyük iqtisadi gəlirlərinin Sorosun öz şərtlərini diktə etmək üçün ayırdığı pulları heçə çıxarması və cəmiyyətimizin saxta “demokratiya” ideyalarının arxasında hansı fitnə-fəsadların olduğunu aydın şəkildə görməsi oldu. 2011-ci ildə ölkəmizdə fəaliyyətini dayandıran Açıq Cəmiyyət Fondu bu reallıqla hesablaşmalı oldu, lakin ölkəmizə və Prezident İlham Əliyevə qarşı böhtan və qarayaxma kampaniyasını davam etdirmək niyyətindən əl çəkmədi.

“Demokratiya və insan haqları” adı altında hakimiyyətin seçkilər yolu ilə deyil, zorakılıq əməllərinə söykənən prinsiplərlə ələ keçirilməsini maliyyələşdirən Corc Soros ölkəmizdə zəif hakimiyyətin olmasını və bundan da möhtəkirlik məqsədilə yararlanmaq planını hazırlamışdı. Puç olmuş arzuların fonunda erməni lobbisi ilə əlbir olub böhtan kampaniyasını davam etdirən qlobal maliyyə mafiyasına kəskin və layiqli cavabı isə beynəlxalq ictimaiyyət verməlidir. Bu mafiyanın gəliri üçün axıdılan yüz minlərlə insan qanı bunu tələb edir.

Azərbaycan xalqı sorosların məkrli niyyətlərinə qarşı dövlətimizin başçısını hər zaman dəstəkləməklə ölkəmizdə möhkəm sabitliyi və tərəqqini təmin etmiş, bununla da Corc Sorosa layiqli cavabını vermişdir.

Oqtay Bayramov

Jurnalist