REGİONLAR
Düşmənin artilleriya atəşi nəticəsində əhaliyə vurduğu ziyan aradan qaldırılır - Tovuzdan reportaj VİDEO
Tovuz, 15 avqust, Ruslan Novruzoğlu, AZƏRTAC
Ermənistan silahı qüvvələri Azərbaycan Ordusunun şanlı Aprel, uğurlu Naxçıvan əməliyyatlarından sonra növbəti zərbəni bu ilin iyul döyüşləri zamanı Tovuz rayonu istiqamətində aldı. Düşmənin Ermənistan-Azərbaycan sərhədinin Tovuz rayonu istiqamətində törətdiyi təxribata tutarlı cavab verildi. İşğalçı ölkənin silahlı qüvvələri erməni xislətinə uyğun olaraq yenə də mülki əhalini, yaşayış məntəqələrini iri çaplı silahlardan və ağır artilleriya qurğularından intensiv atəşə tutdu. Nəticədə həmin kəndlərdə yaşayan əhaliyə, dövlət əmlakına, o cümlədən infrastruktur obyektlərinə ciddi ziyan dəydi. Dəymiş ziyanın aradan qaldırılması məqsədilə Prezident İlham Əliyev dərhal sərəncam imzaladı.
AZƏRTAC xəbər verir ki, Sərəncama əsasən, Ermənistan hərbçilərinin intensiv atəşə tutması nəticəsində Tovuzun Ağdam, Dondar Quşçu, Vahidli, Əlibəyli, Yuxarı Öysüzlü və Aşağı Öysüzlü kəndlərində mülki əhaliyə dəymiş ziyanın aradan qaldırılması məqsədilə 2020-ci il dövlət büdcəsində nəzərdə tutulmuş Azərbaycan Prezidentinin ehtiyat fondundan Fövqəladə Hallar Nazirliyinə bir milyon manat məbləğində vəsait ayrılıb. Sərəncam imzalandıqdan qısa müddət sonra kəndlərdə təmizlik işlərinə başlanılıb.
Hazırda adıçəkilən kəndlərdə qızğın iş gedir. İş icraçısı Rasim Sadıqov bildirib ki, əvvəlcə yararsız hala düşmüş evlərin sökülməsinə, ərazinin təmizlənməsinə başlanılıb. İşlərin qısa müddətdə tamamlanması üçün əraziyə kifayət qədər texnika və işçi qüvvəsi cəlb olunub. “Çalışacağıq ki, bizə tapşırılan bu işləri tez bir zamanda başa çatdıraq və vətəndaşlar tezliklə yeni evlərinə köçsünlər”, - deyə o qeyd edib.
Sakinlər göstərilən diqqət və qayğıya görə Prezident İlham Əliyevə təşəkkürlərini bildirirlər.
Vahidli kənd sakini Gülbəniz Tağıyeva deyir ki, bu qayğı dövlətin, dövlət başçısının hər zaman onların yanında olduğunu göstərir: “İyul döyüşləri zamanı kənd camaatının evlərinə ciddi ziyan dəydi. Sağ olsun Prezidentimiz, hər zaman olduğu kimi, yenə də bizim yanımızda olduğunu göstərdi, bizi tək qoymadı. Bu, bizi daha da ruhlandırır. Biz Prezidentimizə və ordumuza güvənirik. Kənddə hər kəs öz evindədir, əkin-biçinlə məşğuldur. Heç kəsin düşməndən qorxusu yoxdur”.
Evinə mərmi düşən Sürayə Rüstəmova da düşmən təxribatına baxmayaraq, gündəlik təsərrüfat işlərindən qalmır. “Döyüşlər zamanı düşmən camaatın evlərini atəşə tuturdu. O mərmilərdən biri də mənim evimə düşdü, evi darmadağın etdi. Buna baxmayaraq, heç yana getməmişik, evimizdəyik, həyət-bacamızda işləyirik. Mən evdar xanımam, evdə tək yaşayıram. Əkinlə məşğulam. Əhval-ruhiyyəmiz yüksək səviyyədədir. Sağ olsun dövlətimiz, mənim üçün də yeni ev tikdirir”, - deyə o bildirib.
Qeyd edək ki, sərhəd kəndinin sakinləri əsasən əkinçilik və heyvandarlıqla məşğuldur.