REGİONLAR
Düşmənin kabusuna çevrilən XTQ-in giziri Ramil Musayev VİDEO
İsmayıllı, 13 oktyabr, Rəşad Türkoğlu, AZƏRTAC
O, Aprel döyüşləri də daxil olmaqla, İkinci Qarabağ müharibəsində göstərdiyi qəhrəmanlıqları ilə tanınıb. Bir neçə ölkədə keçirilən hərbi təlimlərdə iştirak edib. Söhbət İsmayıllıda doğulub boya-başa çatan, Vətən müharibəsi zamanı düşmənin kabusuna çevrilən şəhid gizir Ramil Musayevdən gedir.
AZƏRTAC xəbər verir ki, Ramil harada olubsa, hər zaman zirvəyə yüksəlməyi bacarıb. Xarakterindəki mübarizlik bəlkə də bundan irəli gəlirdi. Elə İkinci Qarabağ müharibəsində də qalib ordunun şəhidi kimi adını əbədi olaraq, qəhrəmanlar sırasına yazdırdı.
Şəhidin qardaşı Ramal Musayev deyir ki, Ramil Vətənini, torpağını hələ uşaqlıqdan çox sevirdi. Məktəb illərindən hərb sənətinə böyük maraq göstərirdi. Axı torpaqlarımız tapdaq altında idi. “Ramil məktəbdə “Şahin” oyunlarında fəal çıxış edirdi. İdmanla da məşğul olurdu. Həqiqi hərbi xidmətini Dövlət Sərhəd Xidmətində başa vurmuşdu. Əsgəri xidmətini yerinə yetirdikdən sonra qərar verdi ki, yenidən ordu sıralarına qatılsın. İki il milli orduda xidmət etdi, sonra Xüsusi Təyinatlı Qüvvələrin sırasına təyinat aldı. Orada da 8 il qüsursuz xidmət etdi”, - deyə qardaşı bildirib.
Gizir Ramil Musayev Xüsusi Təyinatlı Qüvvələrin sırasında olarkən Gürcüstan, Türkiyə və digər ölkələrdə xüsusi təlimlərdə iştirak edib, fərqləndiyinə görə yüksək dərəcələrə layiq görülüb. 2016-cı ilin Aprel döyüşlərinin də iştirakçısı olan Ramil bir gün torpaqlarımızın düşmən tapdağından azad ediləcəyi günün uzaqda olmadığını da bilirdi.
“Toyumuzdan cəmi altı ay keçmişdi, amma Ramil sanki hər gün məni onsuz yaşamağa hazırlayırdı” - deyir qəhrəmanımızın həyat yoldaşı. Aydan Musayeva onunla sonuncu görüşü belə xatırlayır: “Sentyabrın 26-sı mənə dedi ki, atana zəng elə səni öz evlərinə aparsın, burada tək qalma. Sonra hazırlaşmağa başladı. Mən Ramilin qış paltarlarını çamadana yığmışdım, gördüm ki, onları axtarır. Əlcəyini, papağını, şərfini, qalın jaketini, əsgər paltosunu yığır. Dedim, “Ramil, hələ soyuq deyil, sən bunları neynirsən? Sən heç bu geyimləri işə aparmamısan...”. Özümdən asılı olmadan ağlamağa başladım. Dedi ki, “niyə ağlayırsan, təki şəhidlik zirvəsi mənə də qismət olsun”. Son sözləri bu oldu...”.
Müharibənin ilk günlərindən aktiv döyüş əməliyyatlarında iştirak edən Ramil Füzuli, Cəbrayıl, Kəlbəcər, Suqovuşan istiqamətlərində şiddətli döyüşlərdə iştirak edib, qəhrəmanlığı ilə fərqlənib. Sonuncu əməliyyatın məsuliyyətini hiss edən Ramil, sanki anası ilə vidalaşmaq üçün qabaqcadan onunla da danışıb.
Şəhid anası Nəsibə Musayeva: “Hamımızla danışdı, elə dedi ki, Allaha dua edin. Dedim, “bala özündən muğayat ol”. Qayıtdı ki, “ana, sən də özündən muğayat ol”. İki gündən sonra zəng elədi, bizimlə danışdı. Son sözləri bu oldu ki, “buradan çətin sağ çıxam, Allaha əmanət olun və mənim üçün dua edin”.
Bu, Ramilin ailəsi ilə son danışığı olub, oktyabrın 4-də Füzuli-Cəbrayıl istiqamətində gedən döyüşlərdə o və döyüş yoldaşları mühasirəyə düşüb. Düşmənə sonadək layiqli cavab verib, xeyli sayda canlı qüvvə və texnikanı sıradan çıxarıblar. Ramil həmin döyüşdə də şəhidlik zirvəsinə ucalıb. “Qarabağ” ordeni, “Vətən uğrunda”, “Kəlbəcərin azad olunmasına görə”, “Füzulinin azad olunmasına görə”, “Cəbrayılın azad olunmasına görə”, “Şücaətə görə” medallarına layiq görülüb.
Ramil şəhidlik zirvəsinə ucaldıqdan 5 ay sonra oğlu dünyaya gəlib. Hazırda atasının adını daşıyan iki yaşlı Ramil Musayev qəhrəman atasının əşyaları ilə oynayıb, onun şəkillərinə baxır.
Xatırladaq ki, oğlunun yoxluğuna dözə bilməyən şəhid atası Aydın Musayev Ramilin dəfnindən bir müddət sonra dünyasını dəyişib.