Bakı, 23 aprel, AZƏRTAC

Avropa Komissiyasının “Erasmus+” proqramı çərçivəsində maliyyələşdirilən və Bakı Biznes Universitetinin koordinatorluğu ilə reallaşdırılan “Azərbaycan universitetlərində keyfiyyət təminatı mərkəzlərinin yaradılması və inkişaf etdirilməsi” (EQAC) layihəsi ilə bağlı görüş keçirilib.

Görüşdə Azərbaycan Dövlət Pedaqoji Universitetinin (ADPU) tədris işləri üzrə prorektoru Eldar Aslanov, tarix və coğrafiya fakültəsinin dekanı Şahin Pənahov, layihənin universitet üzrə meneceri Lətif Kəngərlinski, keyfiyyətin təminatı şöbəsinin müdiri Rəşad Sadıqov və həmin şöbənin mütəxəssisi Fatimə Rzayeva iştirak ediblər.

Universitetdən AZƏRTAC-a bildirilib ki, ADPU-nun nümayəndələri müzakirələrdə EQAC layihəsi çərçivəsində ötən bir ildə universitetdə görülmüş işlər barədə məlumat veriblər. Bildirilib ki, layihənin icrası çərçivəsində əvvəlcə universitetin cari vəziyyəti öyrənilib, sorğu keçirilib, hesabat hazırlanıb, daha sonra əməkdaşlarımız layihə ilə bağlı müxtəlif respublika və beynəlxalq miqyaslı tədbirlərdə iştirak ediblər. Universitetdə keyfiyyətin təminatı şöbəsi yaradılıb, keyfiyyətin artırılması məqsədilə ilk dəfə professor-müəllim heyətinin illik fəaliyyətinin reytinq qiymətləndirməsi tətbiq edilib. ADPU-da insan resurslarının inkişaf etdirilməsinə xüsusi diqqət yetirilir, bəzi ixtisasların yenilənməsi və müasirləşdirilməsi istiqamətində işlər aparılır. Universitetdə professor-müəllim heyətinin işə qəbulu seçki yolu, tədris-köməkçi heyətin işə qəbulu isə müsabiqə yolu ilə həyata keçirilir. Həm seçki, həm də müsabiqə şəffaf, ədalətli və obyektiv təşkil olunur.

Tədbirdə Azərbaycan universitetlərində keyfiyyəti idarəetmə sisteminin tətbiq edilməsində qarşıya çıxan çətinliklər və keyfiyyətin təminatı şöbələrinin iş planlarının “Avropa ali təhsil məkanında keyfiyyət təminatı üzrə standartlar və qaydalar”a (ESG) uyğunlaşdırılmasındakı mövcud problemlər və görüləcək işlər haqqında müzakirələr aparılıb.