İDMAN
Eduard Məmmədov: Məqsədim mötəbər turnirlərdə Azərbaycanın idman şərəfini layiqincə qorumaqdır
Bakı, 7 dekabr, AZƏRTAC
Başa çatmaqda olan 2019-cu il mənim üçün çox uğurlu olub. Bu il kikboksinqin layt-kontakt, həm də kik-layt kontakt versiyalarında dünya çempionluğunu qazandım. Sevinirəm ki, dünyanın ən nüfuzlu turnirlərində Azərbaycanı yüksək səviyyədə təmsil edirəm.
Bu sözləri AZƏRTAC-a məxsusi müsahibəsində Azərbaycanın tanınmış idmançısı, dəfələrlə dünya və Avropa çempionu olan, Daxili İşlər Nazirliyinin “Dinamo” idman klubunun təmsilçisi Eduard Məmmədov (63 kq) deyib.
İdmançı bu il əldə edilmiş qələbələrin məhz fasiləsiz məşqlər sayəsində mümkün olduğunu bildirib: “Şəxsi məşqçim Çingiz Eyvazovun və köməkçi məşqçi Zaur Məmmədovun rəhbərliyi altında builki yarışlara çox ciddi hazırlaşmışdım. Bu ilin noyabrında Antalyada kikboksinqin kik-layt versiyası üzrə keçirilmiş dünya çempionatında ilk qarşılaşmada danimarkalı Yan Larsen, sonra argentinalı Federiko İqnasionu məğlub etdim. Final döyüşündə mənim üçün çox prinsipial olan dünya çempionatının yeddiqat qalibi italiyalı Campaolo Spanuya ilə qarşılaşdım. Ona bu ilin oktyabrında Bosniya və Herseqovinanın paytaxtı Sarayevoda kikboksinqin layt-kontakt versiyası üzrə keçirilmiş dünya çempionatında qalib gəlmişdim. Rəqibimi məğlub edib WAKO-da 5-ci, ümumilikdə isə 25-ci dünya çempionluğunu qazandım”.
E.Məmmədovun rəhbərliyi altında fəaliyyət göstərən “Ağ canavar” idman klubunda çoxlu sayda kikboksçunun yetişdiyini bildirib. O, bu ilin mayında Budapeştdə dünya kubokunda yetirmələrinin də böyük uğurlara imza atdığını qeyd edib: “Ölkəmizdə yeniyetmə və gənclər arasında kikboksinqə böyük maraq var. Sevinirəm ki, bu gənclər arasında artıq yetirmələrim də beynəlxalq arenalarda öz sözlərini deyirlər. Bu ilin may ayında Budapeştdə keçirilmiş dünya kubokunda ikiqat qələbə sevinci yaşadım. Həmin yarışda mənimlə yanaşı, tələbələrim “Ağ canavar” idman klubunun yetirməsi Amil Quliyev (42 kq) və Nicat Ələkbərli (48 kq) yeniyetmə idmançılar arasında qızıl medal qazanıblar. A.Quliyev sentyabrda Anapada keçirilən dünya kubokunun da qalibi olub. Ondan bir ay qabaq, avqust ayında isə Budapeştdə Avropa çempionatında birinci yeri tutub. Onu da qeyd edim ki, o, ötən il WAKO versiyası üzrə dünya çempionluğunu qazanıb”.
E.Məmmədov gələn ilin mayında WAKO versiyası üzrə dünya kuboku, oktyabr və noyabr aylarında isə Avropa çempionatlarının keçiriləcəyini bildirib. O vurğulayıb ki, bu yarışlarla yanaşı, peşəkarlar arasında turnirlərdə də iştirakını planlaşdırır: “Azərbaycan Kikboksinq Federasiyasının prezidenti Adil Əliyev, vitse-prezidenti Güloğlan Cabbarov idmançılara hazırlıqla bağlı hərtərəfli kömək göstərirlər. Gələn il daha böyük uğurlara imza atmaq üçün öz üzərimdə səylə çalışıram. Məqsədim mötəbər turnirlərdə Azərbaycanın idman şərəfini layiqincə qorumaqdır”.