İQTİSADİYYAT


Effektiv idarəetmə və makroiqtisadi göstəricilər İşçi Qrupunun növbəti iclası keçirilib

Bakı, 1 avqust, AZƏRTAC

Biznes mühiti və beynəlxalq reytinqlər üzrə Komissiyanın Effektiv idarəetmə və makroiqtisadi göstəricilər İşçi Qrupunun növbəti iclası keçirilib.

AZƏRTAC Mərkəzi Banka istinadla xəbər verir ki, “Webex” platforması üzərindən həyata keçirilən iclasda İqtisadiyyat Nazirliyinin, Maliyyə Nazirliyinin, Dövlət Neft Fondunun, Dövlət Statistika Komitəsinin, Vətəndaşlara Xidmət və Sosial İnnovasiyalar üzrə Dövlət Agentliyinin, həmçinin İqtisadi Təşəbbüslərə Yardım İctimai Birliyi, Spektr Sosial-İqtisadi Araşdırma və İnkişaf Mərkəzinin və “Ekvita” şirkətinin təmsilçiləri iştirak ediblər.

İclasda İşçi Qrupunun 2022-ci il üzrə fəaliyyət planının ilin ilk yarısında icrası istiqamətində görülmüş işlər müzakirə olunub, qarşıda duran məsələlər ətrafında fikir mübadiləsi aparılıb.

Büdcə şəffaflığının təmin edilməsi, borc dayanıqlılığının artırılması, habelə təbii resursların effektiv idarə edilməsi ilə bağlı məsələlər iclasda əsas müzakirə mövzusu olub. Son ildə ölkədə və dünyada gedən inflyasiya proseslərinin səbəbləri və qiymət sabitliyinə nail olmaq üçün ölkədə həyata keçirilən antiinflyasiya siyasəti barədə ətraflı müzakirə aparılıb.

Bununla yanaşı, əhalinin maliyyə savadlılığının daha da yaxşılaşdırılması məqsədilə cari ilin fəaliyyət planına daxil edilmiş tədbir çərçivəsində Mərkəzi Bankın virtual təhsil platformasının imkanlarının artırılması və yeni kursların istifadəyə verilməsi istiqamətində görülmüş işlər iclas iştirakçılarının diqqətinə çatdırılıb.

Qarşılıqlı müzakirə formatında aparılan iclasın nəticəsində ölkəmizin beynəlxalq reytinqlərdə mövqeyinin yüksəldilməsi istiqamətində digər aidiyyəti qurumlardan nümayəndələrin İşçi Qrupunun işinə cəlb edilməsi, müvafiq təkliflərin formalaşdırılaraq nəzərdən keçirilmək üçün Komissiyaya təqdim edilməsi qərara alınıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.