SİYASƏT
Efiopiyanın aparıcı KİV-ləri üçün Ermənistanın Azərbaycana qarşı hərbi təcavüzü ilə bağlı mətbuat konfransı keçirilib
Bakı, 8 oktyabr, AZƏRTAC
Azərbaycan Respublikasının Efiopiyadakı səfirliyində ölkənin aparıcı KİV-ləri üçün mətbuat konfransı keçirilib.
Səfirlikdən AZƏRTAC-a verilən məlumata görə, mətbuat konfransında səfir Elman Abdullayev Ermənistanın beynəlxalq hüquq normalarını kobud şəkildə pozaraq Azərbaycana qarşı son hərbi təcavüzü, hazırda cəbhə bölgəsində yaranmış vəziyyət barədə Efiopiya KİV-lərinə ətraflı məlumat verib, geniş təqdimat keçirib və onların suallarını cavablandırıb.
Səfir Elman Abdullayev, ilk növbədə, Efiopiya mətbuat nümayəndələrinə Dağlıq Qarabağ bölgəsinin Azərbaycan Respublikasının ayrılmaz hissəsi olduğunu vurğulayaraq, yerli KİV-ləri bəzi qərəzli beynəlxalq KİV-lərin “mübahisəli bölgə” terminini istifadə etməkdən çəkinməyə çağırıb. O, BMT-nin və digər beynəlxalq təşkilatların qətnamələrində əks olunduğu kimi, Dağlıq Qarabağ bölgəsinin və ətraf rayonların Ermənistan tərəfindən işğal edilmiş ərazilər olduğunu onların diqqətinə çatdırıb.
Ermənistanın Azərbaycana hərbi təcavüzünün tarixi, ərazimizin 20 faizinin işğalı barədə məlumat verən səfir Ermənistanın işğalçı və etnik təmizləmə siyasəti nəticəsində on minlərlə azərbaycanlının qətlə yetirildiyini, bir milyon insanımızın isə qaçqın və məcburi köçkün vəziyyətinə düşdüyünü qeyd edib. O, BMT Təhlükəsizlik Şurasının Ermənistan silahlı qüvvələrinin Azərbaycan ərazilərindən təcili, tam və qeyd-şərtsiz çıxarılmasını tələb edən 4 qətnaməni mətbuat nümayəndələrinə təqdim edib.
Elman Abdullayev son 30 il ərzində Ermənistanın Azərbaycan torpaqlarını işğal altında saxlamasına, BMT-nin qərarlarının Ermənistan tərəfindən yerinə yetirilməməsinə, Ermənistanın ölkəmizə qarşı işğalçı siyasətini davam etdirməsinə və eyni zamanda, yeni hərbi və siyasi təxribatlar həyata keçirməsinə beynəlxalq ictimaiyyətin susqun qalmasının Azərbaycan dövləti və xalqı üçün qəbuledilməz olduğunu bildirib.
Sentyabrın 27-də Ermənistan silahlı qüvvələrinin atəşkəs rejimini kobud şəkildə pozaraq, ağır artilleriyadan istifadə edilməklə Azərbaycanın yaşayış məntəqələrini atəşə tutması, dinc sakinlərə və mülki obyektlərə qarşı törədilmiş hücumlar barədə ətraflı təqdimat edilib. Bildirilib ki, Azərbaycanın Silahlı Qüvvələri Ermənistanın növbəti hərbi təcavüzünün qarşısını almaq və təmas xətti boyunca sıx şəkildə yaşayan mülki əhalinin təhlükəsizliyini təmin etmək məqsədilə özünümüdafiə hüququ çərçivəsində və beynəlxalq humanitar hüquqa tam riayət etməklə əks-hücum və cavab tədbirləri həyata keçirir.
Azərbaycanın işğal olunmuş ərazilərində məhz Ermənistan silahlı qüvvələrinin yerləşdiyi, Azərbaycanın əks-hücum əməliyyatının beynəlxalq ictimaiyyət tərəfindən tanınmış öz ərazilərimiz daxilində həyata keçirildiyi bildirilib.
Səfir sentyabrın 27-dən etibarən davam edən Vətən Müharibəsində beynəlxalq miqyasda hazırlığı və təchizatı baxımından yüksək göstəriciləri ilə tanınan Azərbaycan Ordusunun əsl peşəkarlıq nümayiş etdirdiyini və torpaqlarımızı, xüsusilə də strateji rayonları azad etməkdə davam etdiyini vurğulayıb.
Mətbuat konfransının sonunda jurnalistlərin sualları cavablandırılıb və səfirliyimiz tərəfindən hazırlanmış məlumat xarakterli broşürlər və Azərbaycanın xəritəsi onlara təqdim edilib.