Bakı, 21 sentyabr, AZƏRTAC

Sentyabrın 21-də Ekologiya və Təbii Sərvətlər Nazirliyində (ETSN) cərimə olunan şadlıq sarayları, atmosfer havasına atılan tullantılar və qanunsuz fəaliyyət göstərən karxanalarla əlaqədar mətbuat konfransı keçirilib.

AZƏRTAC xəbər verir ki, tədbirdə nazirliyin ekoloji maarifləndirmə və ictimaiyyətlə əlaqələr şöbəsinin müdiri Umayra Tağıyevanın verdiyi məlumata əsasən ETSN-in Ekologiya və Təbii Sərvətlər Nazirliyinin 168 nömrəli “Qaynar xətti”nə Abşerondakı toz-dumanlı hava ilə bağlı müraciətlər daxil olur: “İlk növbədə Abşeronun yarımsəhra landşaft şəraiti, torpaq-bitki örtüyü və arid, quraq iqlim şəraiti nəzərə alınmalıdır. Bu, regionda, yəni qonşu ölkələrdə olan meteoroloji-sinoptik şəraitlə bağlı olduğu qədər, yerli və ya lokal xarakter də daşıya bilər.

Təbii proseslər zamanı ölkə ərazisinə səhralardan hava axınları ilə tozun daxil olması müşahidə edilir. Bu proseslər adətən quraq keçən ilin isti dövrü üçün səciyyəvidir. Orta Asiyada, Türkmənistanda, İranda, İraqda, Suriyada güclü toz burulğanları müşahidə olunduqda toz-duman orta troposferdə davamlı olaraq şərq, cənub-şərq və cənub axınları ilə Azərbaycana daxil olur”.

“Qaynar xətt”ə üç ay ərzində tullantıların düzgün idarə olunmaması ilə bağlı 77 müraciət daxil olduğunu deyən U.Tağıyeva bildirib: “Bu sahədə16 tikinti obyekti üzrə araşdırmalar aparılıb və tədbirlər görülüb. Tullantıların düzgün idarə olunmamasına görə “Azadlıq Residence”, “Cavid-2016”, “Elite City” MMC-lər barəsində protokollar tərtib edilərək inzibati məsuliyyətə cəlb olunublar.

Eyni zamanda, “İlk İnşaat Taahhüt Sanayi və Ticarət Anonim” Şirkəti, “Bina” MTK, “Bizim Ev”, “Pilot-İnşaat A”, “Retro Holding”, “Azəri Tikinti Şirkəti”, “Grand Plaza”, “Malibo”, “Araz-2011A”, “N-Turan”, “Kəmər İnşaat” MMC-lər və bir sıra fiziki şəxslərə icrası məcburi olan göstərişlərin verildiyi də qeyd olunub”.

U.Tağıyeva deyib: Paytaxtda böyük tikinti işləri aparılır, şəhərimiz gözəlləşir. Lakin aparılan quruculuq işləri əhalinin səhhətinə mənfi təsir göstərməməlidir. Məqsədimiz ondan ibarətdir ki, istənilən fəaliyyət qəbul olunmuş ekoloji normativlərə uyğun aparılsın. Mövcud qoruyucu texnologiyalardan istifadə etməklə bu sahədə çalışan şəxslər öz fəaliyyətlərini qəbul edilmiş ekoloji normalara uyğun qurmalıdırlar”.

Jurnalistlərə məlumat verilib ki, 20 gün əvvəl Abşeron yarımadasında fəaliyyət göstərən karxanalara atmosferə buraxılan tullantıların qarşısını almaq üçün 45 gün vaxt verilib.

Ekologiya və Təbii Sərvətlər Nazirliyinin mütəxəssisi Faiq Mütəllimov paytaxtda fəaliyyət göstərən ictimai iaşə obyektləri, şadlıq evləri, restoranlardan havaya atılan tüstü axını və qoxu ilə bağlı nazirliyin apardığı monitorinq və reydlərin nəticəsi barədə danışıb: “Ekologiya və Təbii Sərvətlər Nazirliyi tərəfindən edilən tövsiyə və göstərişlərə əməl etməyən, müasir standartlara cavab verən təmizləyici qurğuların quraşdırılması barədə xəbərdarlığa məhəl qoymayan ictimai iaşə obyektləri barəsində qanundan irəli gələn müvafiq tədbirlər görülməyə başlanılıb”.

F.Mütəllimovun sözlərinə görə, “Kleopatra”, “Qızıltac”, “Karvan”, “Yeddi gözəl”, “Nazlı saray”, “Oskar”, “Şəlalə”, “Xəmsə”, “Neon”, “Ağ çiçəyim”, “Praqa”, “Milord”, “Real”, “Turan”, “Təbrik” və digər şadlıq sarayları barəsində qanuna müvafiq tədbirlər görülüb və bu istiqamətdə işlər davam etdirilir.

“Manqal”, “Tərxun”, “Viana”, “Fəridə”, “Pak dad”, “Hollywood”, “Versal palace”, “Xudafərin”, “Mona Liza”, “Abqora”, “Opera”, “Golden Ring”, “Qızıl buta”, “Ümid” ictimai-iaşə obyektlərində müasir standartlara cavab verən qurğular quraşdırılıb. 133 şadlıq sarayı və ictimai iaşə obyektləri isə müasir qurğuların quraşdırılması üçün şirkətlərlə müqavilə bağlayıb.