SİYASƏT


“El Universal” qəzeti Meksika millət vəkillərinin Azərbaycanın işğal olunmuş ərazilərinə qanunsuz səfərlərindən yazıb

Nyu York, 9 fevral. AZƏRTAC 

Meksikanın ən nüfuzlu mətbu orqanlarından biri hesab edilən “El Universal” qəzetinin ingilisdilli versiyasında Azərbaycanın bu ölkədəki səfirliyinin müvəqqəti işlər vəkili Məmməd Talıbov ilə müsahibə dərc olunub.

AZƏRTAC xəbər verir ki, yazıda Ermənistan-Azərbaycan, Dağlıq Qarabağ münaqişəsinin həllinin yeganə yolunun rəsmi Yerevanın BMT Təhlükəsizlik Şurasının qətnamələrini yerinə yetirərək öz silahlı qüvvələrinin Azərbaycanın işğal olunmuş ərazilərindən çıxarılması olduğu deyilir. Burada Dağlıq Qarabağ regionunun Azərbaycana məxsus olduğu, lakin 1992-ci ildən Ermənistanın işğalı altında qaldığı deyilir.

Qeyd edilir ki, Ermənistan-Azərbaycan, Dağlıq Qarabağ münaqişəsinə Meksikada son zaman artmış marağa bu ölkədə müxalifəti təmsil edən üç millət vəkilinin - Marqarita Blanka Kuata Dominqezin, Maria Kristina Qarsia Bravonun və Carlos Hernandez Mironun Azərbaycan hökumətindən icazə almadan işğal altındakı ərazilərə Meksika mətbuatında böyük qalmaqalla nəticələnmiş səfəri səbəb olub. Bildirilir ki, Azərbaycan səfirliyi bu səfərlə bağlı Meksikanın Xarici İşlər Nazirliyinə (Xarici Əlaqələr Katibliyi) və Konqresinə sərt etirazını bildirib.

Azərbaycan diplomatının sözlərinə əsasən qeyd olunur ki, Ermənistan tərəfi və bu ölkənin Meksikada səfiri A.Ayvazyan özünəməxsus tərzdə, hətta öz dostlarını - o zaman Ermənistanda səfərdə olan Meksika-Ermənistan dostluq qrupu üzvü olan adıçəkilən deputatları pis vəziyyətdə qoyaraq onları münaqişəyə cəlb edib, siyasi xal qazanmaq üçün öz çirkin oyunlarında istifadə etmək məqsədilə Azərbaycanın işğal olunmuş ərazilərinə aparıblar. Bildirilir ki, deputatlar Meksika XİN-in həmin ərazilərə Azərbaycan hökumətinin icazəsi olmadan səfər etmə qadağasına və həmin ərazilərin Azərbaycan Respublikasının beynəlxalq səviyyədə ümumtanınmış ərazisi olduğuna məhəl qoyulmadan buraya gətirilib. Onları kameralar qarşısına çıxarıb, masanın üstünə dünyanın heç bir ölkəsi, o cümlədən Ermənistan tərəfindən belə tanınmamış qondarma rejimin bayrağını qoymaqla və beləliklə, növbəti təxribata əl ataraq Ermənistan hökumətinin əsas məqsədinin separatçı rejimin guya Meksika tərəfindən dəstəklənməsi illüziyasını yaratmaq olduğu deyilir.

Bildirilir ki, Azərbaycan tərəfinin etirazı nəticəsində Meksika rəsmilərinin ölkəmizin ərazi bütövlüyü və münaqişə ilə bağlı BMT TŞ qətnamələrini dəstəklədikləri barədə bəyanatlardan sonra Ermənistan səfiri bu avantüranın boşa çıxdığını anlayaraq yeni oyuna əl atıb. O, heç bir diplomatik etikaya uyğun olmayan, presedentsiz bir addım ataraq Meksika vətəndaşlarını öz ölkəsinin XİN-in qadağalarına məhəl qoymayaraq işğal olunmuş ərazilərə səfərə çağırıb.

Səfirliyimizin müvəqqəti işlər vəkili Ermənistan səfirini bu məkrli oyunlardan əl çəkməyə və yüzminlərlə həmvətənimizin nəyə görə öz torpaqlarından qovulduğu, qətlə yetirildiyi, etnik təmizləmələrə məruz qaldığını izah etməyə çağırıb. Müsahibədə Mexiko şəhərində Xocalı Soyqırımı qurbanlarının xatirəsinə heykəlin ucaldığı xatırladılır.

Həmçinin erməni səfirin “Dağlıq Qarabağda yeni erməni soyqırımı təhlükəsi” barədə sözləri ilə bağlı onların uydurma, cəfəng və absurd olduğu bildirilərək Azərbaycanın multikulturalizm və tolerantlığı ilə tanınmış bir ölkə olduğu vurğulanır, burada bütün dinlərin və mədəniyyətlərin nümayəndələrinin heç bir ayrı-seçkiliklə üzləşmədən birgə yaşadıqları deyilir, Bakının mərkəzində hətta erməni kilsəsinin mövcud olduğu vurğulanır.

Bundan əlavə, yazıda 2017-ci ildə Azərbaycan-Meksika diplomatik əlaqələrinin 25-ci ildönümünün qeyd edildiyi, iki ölkə arasında əməkdaşlığın daha da genişlənməsi üçün böyük imkanların olduğu bildirilir.

Yusif Babanlı

AZƏRTAC-ın xüsusi müxbiri

Vaşinqton

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.