Bakı, 27 yanvar, AZƏRTAC

“Mütərəqqi ədliyyə xidmətləri və müasir məhkəmə infrastrukturu” layihəsi üzrə Dünya Bankının layihə rəhbəri xanım Eval Melisin başçılıq etdiyi nümayəndə heyəti yanvarın 27-də Vəkillər Kollegiyasında olub.

AZƏRTAC Vəkillər Kollegiyasının saytına istinadla xəbər verir ki, Vəkillər Kollegiyasının sədri Anar Bağırov qonaqlara Dünya Bankı ilə əməkdaşlığa önəm verildiyini bildirərək, elektron vəkillik və bu sahədə elektron xidmətlərin xüsusi əhəmiyyətini diqqətə çatdırıb. Sədr xatırladıb ki, “Azərbaycan Respublikasında vəkilliyin inkişafı ilə bağlı əlavə tədbirlər haqqında” Azərbaycan Prezidentinin 2018-ci il 22 fevral tarixli Sərəncamına uyğun olaraq, vəkilliyin vahid elektron informasiya sisteminin təşkili və bu sistemin “Elektron məhkəmə” informasiya sisteminə inteqrasiyası istiqamətində tədbirlər görmək Vəkillər Kollegiyasına tövsiyə olunub: “Biz Prezident İlham Əliyevin Sərəncamı imzalandıqdan dərhal sonra işə başladıq və müəyyən addımlar atdıq. Ancaq hesab edirəm ki, hazırda “Elektron vəkil” sisteminin təkmilləşdirilməsinə və onun “Elektron məhkəmə” informasiya sisteminə tam inteqrasiyasına ehtiyac var. Ümumiyyətlə, “Elektron vəkil” sistemin daha səmərəli fəaliyyəti üçün Vəkillər Kollegiyasına ardıcıl dəstək göstərən Ədliyyə Nazirliyinin fəaliyyətini xüsusi vurğulamaq istərdim. Onu da qeyd etməliyəm ki, hazırda Vəkillər Kollegiyası “Elektron order” sistemi ilə əlaqədar bütün işləri yekunlaşdırıb və gələn ay sistemi pilot layihə kimi təqdim etməyi nəzərdə tuturuq”.

Anar Bağırov Kollegiyanın elektron vəkil sorğusu ilə bağlı da müəyyən işlərin görüldüyünü deyib: “Lakin burada normativ hüquqi tənzimləmə ilə bağlı müəyyən problemlər mövcuddur və bununla bağlı təkliflərimizi aidiyyəti qurumlara təqdim etmişik. Hesab edirik ki, bu istiqamətdə təkliflərimiz qəbul olunduqdan sonra vəkillərimiz “Elektron məhkəmə” informasiya sistemi vasitəsilə elektron vəkil sorğuları göndərə biləcəklər. Hesab edirik ki, bu tədbirlər müəyyən bürokratik əngəllər və qeyri-prosessual münasibətlərlə yanaşı, əlavə vaxt, vəsait itkisinin də qarşısını alacaq və həmçinin hüquqi yardımın operativliyini təmin edəcək.

Digər məsələ “Elektron təyinat” sistemidir. Ədliyyə Nazirliyi ilə qurulmuş səmərəli əməkdaşlıq, vaxtaşırı aparılan müzakirə və tədbirlər sayəsində Bakı şəhərində fəaliyyət göstərən bütün məhkəmələrdə bu sistem iki ildir ki, tətbiq olunsa da, təəssüf ki, bölgələrdə hələ də köhnə qaydalar qalmaqdadır. İstərdik ki, nəinki məhkəmələr, ölkədə fəaliyyət göstərən bütün istintaq-təhqiqat orqanlarında “Elektron təyinat” sistemi tətbiq edilsin”.

Sədr, eyni zamanda, gələcəkdə statistik məlumatların mərkəzləşdirilmiş elektron uçotunun aparılmasının da əhəmiyyətini qeyd edib.

Eva Melis isə çıxışında Azərbaycanda olmasından məmnunluğunu ifadə edərək, Vəkillər Kollegiyası ilə əməkdaşlığa böyük önəm verdiklərini diqqətə çatdırıb.

Sonra layihənin koordinatoru, Avropa Şurası Ədalət Mühakiməsinin Səmərəliliyi üzrə Avropa Komissiyasının (CEPEJ) prezidenti, hakim Ramin Qaraqurbanlı layihə haqqında ətraflı məlumat verərək bildirib ki, ölkəmizdə ədalət mühakiməsinin həyata keçirilməsində vəkillərin rolu böyükdür və bu baxımdan vəkillərin elektron məlumatlara çatımlılığı təmin edilməlidir: “Bu sahədə Vəkillər Kollegiyası bizim ən mühüm tərəfdaşlarımızdan biridir. Ümumiyyətlə, son dövrlərdə vəkilliyin inkişafı istiqamətində görülən işləri biz hakimlər də daha yaxşı müşahidə edir və bunu yüksək qiymətləndiririk”.

Həmçinin layihə çərçivəsində “Elektron proqram təminatlarının istifadəsi üzrə biliklərin formalaşdırılması məqsədilə təlimlərin keçirilməsi” fəaliyyəti üzrə təlimlər keçiriləcək. Qeyd olunan təlimlər çərçivəsində vəkillər üçün “Elektron məhkəmə” informasiya sisteminin alt modulu olan “Elektron kabinet”indən istifadə olunması potensialının artırılması da nəzərdə tutulub.

Daha sonra Vəkillər Kollegiyasının elektron xidmətlər sahəsində gördüyü işlərə dair təqdimatla Kollegiyanın Aparat rəhbəri Bayram Orucov çıxış edib.

Sonda qarşılıqlı maraq doğuran məsələlər müzakirə olunub, irəli sürülən təkliflərlə bağlı işçi qrupunun yaradılması qərara alınıb.