ELM VƏ TƏHSİL
Elmi konfrans: Heydər ömrü
Bakı, 10 may, AZƏRTAC
Mayın 10-da Azərbaycan Dövlət Pedaqoji Universiteti Yeni Azərbaycan Partiyası Gənclər Birliyi (ADPU YAP GB) Riyaziyyat fakültəsinin təşkilatçılığı ilə ümummilli lider Heydər Əliyevin anadan olmasının 98-ci ildönümünə həsr olunmuş "Heydər ömrü" mövzusunda elmi konfrans keçirilib.
Konfransda Azərbaycan Respublikasının keçmiş milli təhlükəsizlik nazirinin müavini, Sərhəd Qoşunları komandanının baş müşaviri, general-mayor, respublikanın Əməkdar hüquqşünası Abbasəli Novruzov, ehtiyatda olan polkovnik, Təhlükəsizlik Alyansının üzvü Şücəddin Abdullayev və başqaları iştirak ediblər.
Bu barədə AZƏRTAC-a universitetdən məlumat verilib.
Bildirilib ki, Riyaziyyat fakültəsinin dekanı, dosent Araz Fərəcov konfransın işinə uğurlar arzulayaraq Ulu Öndərin irsinin öyrənilməsinin gənclər üçün önəmini vurğulayıb.
Uzun müddət ümummilli lider Heydər Əliyevlə birgə işləyən Azərbaycan Xüsusi Xidmət Orqanlarının Veteranları İctimai Birliyinin sədri, polkovnik Şamil Süleymanov elmi məruzə ilə çıxış edib, Ümummilli Liderlə bağlı xatirələrini bölüşüb.
Daha sonra çıxış edən elm və innovasiyalar üzrə prorektor, professor Asəf Zamanov Heydər Əliyevin həm xüsusi xidmət orqanları, həm də təhsil sahəsi ilə bağlı fəaliyyətindən bəhs edərək konfransın hər iki sahənin vəhdətini təşkil etməsi baxımından çox əhəmiyyətli olmasını vurğulayıb.