Naxçıvan, 11 noyabr, AZƏRTAC

Bunu əminliklə deyə bilərəm ki, noyabrın 10-da gecə Azərbaycanda hər evdə işıqlar yanırdı, televizorlar işləyirdi. 5-10 dəqiqəlik gecikmə ilə bütün Azərbaycan xalqı bir-birini xəbərdar edərək oyatmışdı. Necə ki, mən Kəngərli rayonunun Yurdçu kəndindəki ata-anama gözaydınlığı, muştuluq vermək üçün zəng etmişdim, eləcə də hamı tanışına, qohumuna ailəsinə, qardaşına, bacısına zəng edib yuxudan oyatmışdı. Hamı öz Prezidentinin, Ali Baş Komandanının xalqa Zəfər müraciətini izləyirdi.

Bu sözləri AZƏRTAC-ın Naxçıvan bürosuna müsahibəsində AMEA Naxçıvan Bölməsi, İncəsənət, Dil və Ədəbiyyat İnstitutunun Folklorşünaslıq şöbəsinin müdiri, filologiya üzrə fəlsəfə doktoru, şair-publisist Elxan Yurdoğlu deyib.

“30 ilə yaxın müddətdə hər bir Azərbaycan vətəndaşının ruhunu incidən məğlubluq hissi sentyabrın 27-dən etibarən yox olmuşdu. Biz öz haqqımız uğrunda savaşa başladıq. Biz 30 ilə yaxındır işğal altında olan müqəddəs torpaqlarımıza qarış-qarış geri qayıdırdıq. Bu geri qayıtmağın kulminasiya nöqtəsi, yəni Şuşa zəfəri, bir gün ara ilə həm də final nöqtəsi oldu”, – deyən müsahibimiz vurğulayıb ki, Azərbaycan Respublikası Prezidentinin hərbi geyimdə səsləndirdiyi Zəfər xəbəri xalqı küçələrə tökdü. “Əziz Şuşa, biz qayıtmışıq” nidasındakı sevinc və o anda ölkə başçısının kövrəldiyini və hətta sevincdən doluxsunduğunu yəqin ki, təkcə mən hiss etməmişəm. Bunu bütün Azərbaycan gördü. Bir sözlə, Azərbaycan xalqı öz Prezidenti, Müzəffər Ali Baş Komandanı ilə fəxr edir.

Elxan Yurdoğlu qeyd edib ki, bu haqq savaşının qəhrəmanları öz canlarından keçməkdə tərəddüd etməyən, öz qanları ilə torpaqlarımızı yenidən Vətən edən şəhidlərimizdir. O şəhidlər ki, onlar bizim qəlbimizdə, xalqımızın tarixində, sabahkı dərsliklərimizdə daim yad ediləcək, qürur duyulacaq, nümunə göstəriləcək insanlar oldular. Bir də bu haqq savaşımızda yaralanaraq qayıdan, həmçinin bu gün də o torpaqlarda sevinclə üçrəngli bayrağımızı dalğalandıran igidlərimiz var. Bu xalq var olduqca onların vətən sevdaları unudulmayacaq, yetişən gəncliyə nümunə göstəriləcəklər.

Allah bütün şəhidlərimizə rəhmət eləsin, onların qanı yerdə qalmadı. Qazilərimizə uzun ömür nəsib etsin. Yaralılarımıza tez bir zamanda sağalıb ayağa qalxmağı arzulayırıq.