İDMAN
Emil Şükürov: Gələn il fristayl futbol üzrə ilk Azərbaycan çempionatını keçirməyi planlaşdırırıq
Bakı, 2 noyabr, AZƏRTAC
Xəbər verdiyimiz kimi, ötən ay Berlində fristayl futbol üzrə Avropa çempionatı keçirilib. Azərbaycan ilk dəfə bu çempionatda ilk iki idmançı ilə təmsil olunub. Ölkəmiz üçün yeni olan idman növünü daha yaxından tanımaq üçün AZƏRTAC-ın əməkdaşı “Freestyle Football Azerbaijan”ın rəhbəri Emil Şükürovdan müsahibə alıb. Müsahibəni təqdim edirik:
- Fristayl futbol nədir və ənənəvi futboldan nə ilə fərqlənir?
- Fristaylın digər futbol növlərindən fərqi komanda deyil, fərdi idman növü olmasıdır. Topla hərəkətlərin üç növü var: bədənin yuxarı hissəsi - baş, çiyin və qollarla, ayaqlarla və yerdə yerinə yetirilən hərəkətlər. Hər hansı şəxs, istənilən yaşda və məkanda fristaylla məşğul ola bilər. Yetər ki, top və onu ram etmək həvəsi olsun. Təsadüfi deyil ki, fristaylın şüarı “Ehtiyacın olan tək şey topdur” (All you need is a ball) kimi səslənir.
- “Freestyle Football Azerbaijan” nə vaxt yaranıb?
Fristayl üzrə ilk dünya çempionatı on il əvvəl - 2008-ci ildə keçirilib və bu yarışın ilk qalibi fransalı Sean Qarnye olub. Məhz onun göstərdiyi performans, topla hərəkətləri məndə bu idman növünə maraq yaratdı. 2013-cü ildən sosial şəbəkələr vasitəsilə Azərbaycanda yerli fristaylerləri axtarmağa başladım və yalnız iki ildən sonra komandamızın ilk üzvləri ilə tanış oldum. Bu zaman ərzində fristayl futbolun dünya üzrə əlaqələndiriciləri Daniel Vud və Lukas Skoda ilə daimi fikir mübadiləsi aparır, əlaqə saxlayırdım. Təəssüf ki, komanda üzvlərindən bir neçəsi ölkə xaricinə getdiyindən bu idman növünün inkişafı prosesi bir qədər ləngidi. Buna baxmayaraq, komandamızın daimi dörd üzvü var. Qeyd edim ki, Sean Qarnye iki dəfə Azərbaycanda olub. Xoş təsadüfdən hər səfəri zamanı komandamıza yeni üzvlər qoşulub.
- Avropa çempionatındakı çıxış barəsində məlumat verərdiniz.
- Fristayl üzrə bir neçə turnir var: ölkə çempionatı, qitə yarışı və dünya çempionatı. Ümumdünya Fristayl Futbol Assosiasiyası (ÜFFA) bu yarışların təşkili ilə məşğul olan qurumdur. Bizim ölkəmizdə fristaylla məşğul olan idmançıların sayının azlığından hələlik ölkə çempionatını keçirmirik. Komanda heyətimiz sabitləşəndən sonra ÜFFA ilə daha sıx münasibətlər qurduq və bu idman növünün inkişaf etdirilməsi üçün tövsiyələr aldıq. Avropa çempionatına qədər fristaylerlərimiz bir sıra yerli tədbirlərdə çıxış ediblər. Təbii ki, rəqabət olmayan yerdə inkişaf olmaz. Fristayl futbolun təqvimində iştirak edə biləcəyimiz iki yarış var idi - avqustda Praqada Superball və oktyabrda Berlində Avropa çempionatı. Superball açıq dünya çempionatıdır və orada 500-dən çox fristayler məharətini nümayiş etdirir. Bu yarışa hazırlaşmaq üçün kifayət qədər zamanımız olmadı. Buna görə də Berlində keçirilən Avropa çempionatında iştirak etmək qərarına gəldik. Necə deyərlər, həm özümüzü göstərdik, həm də başqalarına baxdıq. Səhnədə Avropa ölkələrinin bayraqları sırasında üçrəngli bayrağımızı da görmək çox qürurverici idi. İlk çempionatda ölkəmizi Ruslan Quliyev və Nicat Səfərov təmsil edirdilər. Ümumilikdə, bu Avropa çempionatı rekord sayda ölkə və iştirakçı ilə əlamətdar oldu. Yarışda 21 ölkədən 105 idmançı iştirak edirdi. Ruslan və Nicat qrup mərhələsini keçə bilməsələr də, uğurla çıxış etdiklərini deyə bilərəm. Belə ki, Nicat qrup mərhələsində yerinə yetirilmiş ən çətin fristayl hərəkətinə görə münsiflər heyəti tərəfindən xüsusi qiymətləndirilib. Ruslan isə Adidas Tanqo Liqasının yeni simalarından biri seçilib və onun etdiyi mürəkkəb fristayl hərəkətləri müvafiq mobil əlavədə yer alıb.
- Qarşıda hansı hədəflər var?
İndiyə qədər daha çox ölkədaxili yarışlarda çıxış etsək də, Avropa çempionatı qarşımızda yeni hədəflər qoydu. Artıq bu idman növünün kütləviləşməsi, yeniyetmə və gənclər arasında populyarlaşması istiqamətində işlərə başlamışıq. Növbəti il ilk Azərbaycan çempionatını keçirmək fikrimiz var. Bunun üçün ölkə xaricində yaşayan azərbaycanlı fristaylerləri də komandamıza cəlb etməyə çalışırıq. Fuad Həziyev, Səid Məmmədov və Rəhim Həsənovla ilkin razılaşma əldə olunub. Qeyd edim ki, qürbətdə yaşayan soydaşlarımız bizə ən başdan öz dəyərli məsləhətləri ilə dəstək olublar. Ölkə çempionatının qalibi isə “Redbull Street Style” (fristayl üzrə dünya çempionatı) finalına vəsiqə qazanır. Təcrübə toplamaq məqsədilə noyabrın 19-23-də Varşavada keçiriləcək növbəti dünya çempionatında iştirak etməyi planlaşdırırıq. Xüsusən də son zamanlar dünya fristayl futbolunda liderliyi əldən verməyən Norveç və Polşanın təcrübəsindən yararlanmaq istəyirik. “Freestyle Football Azerbaijan” olaraq həm Avropa, həm də Ümumdünya Fristayl Futbol Assosiasiyalarının tamhüquqlu üzvlüyünə qəbul olmaq qarşımızda duran prioritet məsələlərdəndir.