İQTİSADİYYAT
Erik Qebali: Azərbaycanın paytaxtında suyun keyfiyyətini yoxlayaraq gələcək fəaliyyət üçün prioritetləri müəyyən etmişik
Bakı, 12 aprel (AZƏRTAC). Biz Bakı şəhəri üzrə layihələr çərçivəsində “Azərsu” ASC ilə əməkdaşlıq edirik. Sizin mütəxəssislərinizlə birlikdə Azərbaycanın paytaxtında suyun keyfiyyətini yoxlayaraq gələcək fəaliyyət üçün prioritetləri müəyyən etmişik.
AZƏRTAC xəbər verir ki, bu sözləri Bakıda keçirilən “CATEF-2013” I Xəzər Beynəlxalq su texnologiyaları sərgi və forumunun iştirakçısı Fransanın “Suez Environnement” şirkətinin icraçı vitse-prezidenti Erik Qebali demişdir.
O qeyd etmişdir ki, 100 ildən artıqdır “Suez Environnement” şirkəti su təchizatı, tullantıların idarə olunması və suyun təmizlənməsi sahəsində fəaliyyət göstərərək dünyanın əksər ölkələrində təmsil olunur. “Suez Environnement” şirkətinin 400-dən artıq alimi dünyanın 12 ölkəsində su təchizatı və suyun təmizlənməsi, eləcə də suyun keyfiyyətinin yaxşılaşdırılmasına kömək edən xüsusi avadanlıqların işlənib hazırlanması, habelə sonradan bizim sahəmizdə tətbiq olunan yeni texnoloji həll variantları üzrə elmi-tədqiqat fəaliyyətləri ilə məşğuldur. Suyun duzsuzlaşdırılması sistemi və suyun alternativ mənbələrdən hasil olunaraq sonradan quraqlıq regionlara çatdırılması ən maraqlı təkmilləşmələrdən biridir. “Azərsu” ASC-nin əməkdaşları da Fransa və İspaniyada yerləşən müəssisələrimizə dəvət edilmiş və orada onların fəaliyyəti ilə tanış olmuşlar. Su təsərrüfatı və təchizatı durmadan təkmilləşdirilir. Bu isə həmin sahədə mövcud olan innovasiyalarla birbaşa bağlıdır.
Bu sərgi dediklərimin bariz sübutudur. Sahə üzrə debüt sərgi çox xoş və müsbət təsir bağışlayır. Bundan başqa, sərgi Azərbaycanda bu sahəyə göstərilən xüsusi diqqəti də nümayiş etdirir. Biz Azərbaycanda, xüsusilə də “Azərsu” şirkətinin fəaliyyətində müsbət dəyişikliklərin şahidi olduq, belə ki, sözügedən şirkət Bakı şəhərində içməli suyun keyfiyyətini dünya standartlarına yaxınlaşdırmaq üçün səy göstərir. “CATEF-2013” sərgisinin təşəbbüskarlarına isə xüsusi təşəkkür etmək lazımdır, belə ki, sərginin ekspozisiyalarında əhalinin su təchizatı sahəsində ən yeni texnoloji həll variantları nümayiş etdirilir.