REGİONLAR


Ermənistan düşmənçilikdən əl çəkməlidir ki, regiondakı inkişafın tərkib hissəsi ola bilsin

Gəncə, 19 iyun, Elcan Məmmədov, AZƏRTAC

Qədim tarixi köklərə malik olan Azərbaycan-Türkiyə münasibətləri bu gün birgə, qarşılıqlı səylər və sarsılmaz iradə əsasında inkişaf etdirilir. Azərbaycan və Türkiyə regionda sülh və sabitlik üçün birgə addımlayaraq, digər region ölkələrini əməkdaşlıq mühitində birləşdirən layihələr reallaşdırırlar. Azərbaycan ilə Türkiyə arasındakı qardaşlıq münasibətləri hazırda Prezident İlham Əliyevin və Prezident Rəcəb Tayyib Ərdoğanın rəhbərlikləri altında ən yüksək səviyyədə davam etməkdədir.

Bunu AZƏRTAC-a açıqlamasında ADAU-nun İctimai elmlər və multikulturalizm kafedrasının müdiri, professor Azad Bayramov deyib.

O qeyd edib ki, dövlət başçılarının qarşılıqlı rəsmi səfərləri hər iki ölkədə böyük təntənə ilə qarşılanır. Bu səfərlərin hər birində iki dost-qardaş ölkə arasında bütün sahələr üzrə sıx əməkdaşlıq daha da möhkəmlənir. Türkiyə iqtisadi, siyasi, hərbi və digər sahələr üzrə dünyada lider dövlətlərdən birinə çevrilib. Türkiyə bu gün dünya miqyasında güc mərkəzi kimi, bölgəmizdə də çox müsbət rol oynayır və bu, bölgənin sabitliyi üçün çox önəmli amildir.

Azad Bayramov deyib: “Türkiyə həmişə olduğu kimi, qardaşlarını yalnız qoymayaraq, bütün dünyaya Qarabağın Azərbaycanın əzəli torpaqları olduğunu, bu haqq davasında heç bir ölkənin Azərbaycana mane ola bilməyəcəyini bəyan etdi. Hələ birinci Qarabağ müharibəsi başlayan vaxtdan Türkiyənin Ermənistan ilə sərhədlərinin bağlanması Azərbaycanla həmrəyliyin təcəssümü idi. Türkiyənin bu mövqeyi İkinci Qarabağ müharibəsi zamanı da müşahidə olundu. Müharibənin ilk günlərindən Türkiyə Respublikasının Prezidenti açıqlamalar verdi ki, Azərbaycan yalnız deyil, Türkiyə Azərbaycanın yanındadır. 44 günlük Vətən müharibəsi dövründə Azərbaycana mənəvi dəstək olmaq üçün Türkiyənin müdafiə naziri, xarici işlər naziri, digər yüksək vəzifəli rəsmiləri dəfələrlə ölkəmizə səfər edərək yanımızda olduqlarını nümayiş etdirdilər və birmənalı olaraq Azərbaycana dəstək verdilər. Bu, Azərbaycana çox böyük siyasi və mənəvi dəstək idi”.

Vətən müharibəsi zamanı bütün dünya Türkiyə müdafiə sənayesinin istehsal etdiyi hərbi texnikaların gücünü gördü. Türkiyə istehsalı olan müdafiə sistemlərindən, pilotsuz uçuş aparatlarından hərbçilərimiz məharətlə istifadə etdi və bu, müharibədə böyük üstünlüyümüzə səbəb oldu. Bu barədə də danışan professor bildirib ki, Türkiyədə istehsal olunan ən müasir silah növlərinin Azərbaycana gətirilməsi üçün razılaşma əldə edilib. Bu, hərbi gücümüzü daha da gücləndirəcək. Hazırda, işğaldan azad edilmiş torpaqlarımızda minatəmizləmə işini xeyli asanlaşdıran müasir texnikalar Türkiyədən alınaraq ölkəmizə gətirilib. Ali Baş Komandan İlham Əliyevin rəhbərliyi və qardaş Türkiyənin dəstəyi ilə Azərbaycanda Türkiyə ordusunun kiçik modeli yaranmaqdadır. Bu sahədə əməli-praktiki işlərə başlanılıb.

Azad Bayramov vurğulayıb ki, müharibədən sonrakı dövr regionda əməkdaşlıq, qarşılıqlı ticarət, kommunikasiyaların açılması, yeni nəqliyyat dəhlizlərinin yaradılması üçün imkanlar açır. Təəssüflər olsun ki, Ermənistan Türkiyə və Azərbaycanı hər zaman özünə düşmən bilib. Ermənistanın Türkiyəyə qarşı iddiaları hələ də qüvvədədir. Onlar bu fikirdən əl çəkməlidirlər ki, regiondakı inkişafın tərkib hissəsi ola bilsinlər.

“Qardaş Türkiyənin Prezidenti Rəcəb Tayyib Ərdoğanın iyunun 15-də Bakıya səfəri çərçivəsində Milli Məclisdə çıxışında bildirdiyi kimi, 44 günlük Vətən müharibəsində qazanılmış zəfərin Azərbaycana, Qafqaza və dünyaya gətirəcəyi faydaların dəyəri zaman keçdikcə daha yaxşı dərk ediləcək. Bu Zəfərlə Qarabağın hər yerinə sabitlik, əmin-amanlıq və ümid hakim olub. Qafqazdakı sülh və sabitlikdən təkcə Azərbaycan deyil, Ermənistan da daxil olmaqla, bütün bölgə ölkələri, hətta bütün dünya qazanacaq. Rusiya, Türkiyə, Azərbaycan, İran, Ermənistan və Gürcüstanı birləşdirən yeni platforma ilə artıq bölgədə sabitlik meydana gələcək və düşmənçiliklər aradan qalxacaq. Bununla da region ölkələrinin inkişafına əlavə imkanlar yaradacaq yeni beynəlxalq əməkdaşlıq birliyi meydana çıxacaq”. Bu Zəfərlə Qafqazda qaynayan bir yara artıq qapanıb, bölgədə davamlı sülh və sabitlik üçün böyük fürsət yaranıb”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.