Bakı, 17 avqust, AZƏRTAC

Prezident İlham Əliyevin “CNN Türk” televiziya kanalına müsahibəsi beynəlxalq aləmdə böyük maraqla izlənilib. Çünki bu müsahibədə bir çox məsələlərə aydınlıq gətirildi, Ermənistana və onu himayə edənlərə , gizli yollarla silahlandıranlara ciddi mesajlar verildi, xəbərdarlıq edildi. Möhtərəm Prezidentimiz qəti mövqeyini bir daha ortaya qoydu: “Mən bunu demişdim və bir daha demək istəyirəm, əgər yenə də erməni faşizmi baş qaldırmağa cəhd belə göstərsə, biz onun başını bir daha əzəcəyik. İkinci Qarabağ müharibəsindəki məğlubiyyət onlar üçün dərs olmalıdır”. Ölkə başçısı açıq şəkildə bildirdi ki, Azərbaycanı heç bir qüvvə öz mövqeyindən döndərə bilməz. 44 günlük müharibə ölkəmizin gücünü, qüdrətini bir daha dünyaya nümayiş etdirdi. Müharibədən sonra Qarabağda başlanan genişmiqyaslı işlər, abadlıq, yenidənqurma bunun bariz nümunəsidir.

Bu fikirləri AZƏRTAC-a açıqlamasında Azərbaycan Azad Respublikaçılar Partiyasının sədri, siyasi elmlər üzrə fəlsəfə doktoru Kamil Seyidov bildirib.

Partiya sədri Vətən müharibəsi dövründə Prezident İlham Əliyevin dünyanın 30-dan çox tanınmış KİV-lərinə və televiziya kanallarına müsahibə verdiyini xatırlatdı. Dünya ictimaiyyəti Ermənistan – Azərbaycan, Dağlıq Qarabağ münaqişəsinin yaranma səbəbləri, dünyada baş mövcud olan ikili standartlar, islamofobiya, ayrı- seçkilik, ədalətsizlik barədə tam məlumatlandırıldı. Dövlət başçımız müsahibələrində həm Ermənistana, həm də havadarlarına dəfələrlə xəbərdarlıq etmişdir ki, bu işğal əbədi ola bilməz. Azərbaycan işğal altında olan ərazilərini hərbi – siyasi yolla azad etmək iqtidarına malikdir və azad edəcək. 44 günlük Vətən müharibəsi dünyaya sübut etdi ki, Prezident İlham Əliyev verdiyi bütün vədlərə əməl edib və ərazi bütövlüyümüzün təmin olunması vədi də yerinə yetirildi.

K.Seyidov dövlətimizin başçısının mətbuata daim açıq olduğunu bildirib. Həm “CNN Türk” televiziya kanalına, həm də digər media mənsublarına verdiyi müsahibələr bir daha təsdiqləyir ki, jurnalistlərin Azərbaycana şəxsən səfər etmələri, onların burada öz gözləri ilə gördüklərini ölkəmizi gözü götürməyən və Ermənistanın məğlubiyyətini həzm edə bilməyənlərin göstərişi ilə deyil, vicdanla işıqlandırmaları obyektiv jurnalistin reputasiyasını qoruyub saxlamaq üçün yeganə düzgün yoldur. Prezidenti İlham Əliyev müsahibəsində jurnalistin verdiyi sualları cavablandıranda da bunun şahidi olduq. Müharibə dövründə hər bir kəsi, o cümlədən jurnalistləri də Azərbaycan Ordusunun düşmən üzərində qazandığı parlaq qələbə, bu zəfərdən sonra regiondakı mövcud durum, Qarabağda aparılan abadlıq, yenidənqurma işləri maraqlandırır.

Dövlət başçımızın erməni vandallığından, işğal etdikləri ərazilərdə törətdikləri misli görünməmiş vəhşilikdən söhbət açdığını deyən partiya sədri həmin əraziləri minaladıqlarını və bu gün də minalanmış ərazilərin xəritələrini vermədiklərini diqqətə çatdırdı. Bu məsələyə münasibət bildirən Prezident İlham Əliyev dedi: “Müharibə başa çatandan sonra – 2020-ci il 10 noyabr tarixindən bu günə qədər 150-dən çox mülki şəxs və hərbçinin minaya düşərək ya həlak olduğunu, ya da sağlamlığını itirdiyini diqqətə çatdırdı. Bu səbəbdən minatəmizləmə işinin aparılmasının vacibliyini qeyd etdi. Ermənistanın minaların xəritələrini vermədiyni vurğulayan ölkə rəhbəri və son mərhələdə verilən xəritələrin də dəqiqliyinin cəmi yüzdə iyirmi beş faiz olduğunu dedi. Bütün bunlara baxmayaraq, minatəmizləmə prosesi davam etdirilir və bundan sonra qarabağlıların doğma ata-baba yurdlarına qaytarılmasına başlanılacaq.

Ermənistan artıq öz qaçılmaz məğlubiyyətini dərk edərək müxtəlif vəhşiliklərə əl atır, mülki əhaliyə böyük zərər vermək üçün şəhər və kəndlərimizi ballistik raketlərlə, artilleriya qurğuları ilə daim atəşə tuturdu. Bunun nəticəsində 100-dən çox mülki şəxs, o cümlədən qadınlar və uşaqlar həlak oldular. Bu görüntülər var. Gəncə, Bərdə, Ağdam, Goranboy, Naftalan, Tərtər, Füzuli və digər bölgələrimizi hər gün atəşə tuturdular. Tərtər şəhərinə, - o qədər də böyük şəhər deyil, - 20 minə yaxın raket düşmüşdür. Ancaq Azərbaycan xalqının iradəsini qıra bilmədilər.

K.Seyidov dövlətimizin başçısının müsahibəsində Türkiyə-Azərbaycan dostluq və qardaşlığından da söhbət açıldığını vurğulayıb. Türkiyənin İkinci Qarabağ savaşında Azərbaycana dəstək verdiyi, qardaş ölkədə baş verən meşə yanğınlarında isə Azərbaycanın ilk gündən qardaş ölkəyə sonadək kömək göstərdiyi diqqətə çatdırılıb. Vurğulanıb ki, dövlətimizin başçısının “Mən dəfələrlə demişəm ki, bu gün dünya miqyasında Türkiyə ilə Azərbaycan qədər bir-birinə yaxın olan ikinci ölkələr yoxdur. Əgər axtarmaq istəsəniz, tapa bilməzsiniz, yoxdur. Bu birlik, həmrəylik, qardaşlıq sözdə deyil, əməldədir” fikri iki ölkə arasında dostluq və qardaşlığın dünyaya nümayişidir.