CƏMİYYƏT
Ermənistana mina problemi ilə əlaqədar təzyiqlər göstərilməlidir
Bakı, 4 avqust, AZƏRTAC
Azad edilmiş torpaqlar çox böyük ərazidir. Həmin ərazilərin böyük əksəriyyəti mina və partlamamış hərbi sursatların təsirinə məruz qalıb. Prezident İlham Əliyev və qeyri-hökumət təşkilatları Ermənistana mina problemi ilə əlaqədar təzyiqlərin göstərilməsi üçün dəfələrlə təşəbbüs göstəriblər. Bütün bunların nəticəsində Azərbaycan ərazilərinin minalanması problemi beynəlxalq miqyasda qəbul olunub və Ermənistan bəzi xəritələri verib. Təəssüf ki, Ermənistanın verdiyi mina xəritələri düzgün deyil və minatəmizləyənlərin işinə yaramır. Ermənistan tərəfinin həyata keçirdiyi mina terroruna beynəlxalq təşkilatların, dünyanın aparıcı dövlətlərinin səssiz qalması qəbuledilməzdir. Beynəlxalq təşkilatlar və aparıcı dövlətlər bu məsələ ilə bağlı susqunluqlarına son qoymalı, Ermənistanın mina terroruna görə məsuliyyətə cəlb edilməsi istiqamətində konkret addımlar atmalıdırlar.
AZƏRTAC xəbər verir ki, bunu “Minalar Əleyhinə Azərbaycan Kampaniyası” İctimai Birliyinin sədri Hafiz Səfixanov deyib.
O qeyd edib ki, bu, eyni zamanda, Ermənistanın Azərbaycana qarşı gizli müharibəsi, terror siyasətinin davamıdır ki, 44 günlük müharibədən ötən iki ildən artıq dövrdə davam edir. Azərbaycanın işğalda azad edilmiş ərazilərinin böyük əksəriyyəti minalanıb, hətta 2020-ci ildə Ağdam, Kəlbəcər və Laçın rayonlarını tərk edərkən ermənilər həmin ərazilərə əlavə minalar basdırıblar. Hazırda Ermənistanın iki ölkənin sərhədlərini minalaması onların əsl xislətindən xəbər verir. Bu gün sülh müqaviləsindən boyun qaçıran, bütün sülh təşəbbüslərini sabotaj edən Ermənistan regionda təhlükəsizliyi təhdid edən ölkə olaraq qalır. Ermənistanda hakimiyyət dəyişikliyi baş verdi, bu ölkə müharibədə ağır məğlubiyyətə uğradı, amma yenə də öz terrorçu mahiyyətindən əl çəkmir.
“Azərbaycan humanitar minatəmizləmə həyata keçirir. Bu isə kifayət qədər maliyyə və zaman aparan prosesdir. Lakin nə qədər diqqətli hərəkət etsən də, bəzən qurbansız da ötüşmək olmur. Artıq yüzlərlə insan minaların qurbanı olub. Dövlət büdcəsi hesabına minatəmizləyənlərin sayı artırılır, məsafədən idarəolunan robot texnikaları alınır, minaaxtaran itlərin sayı artırılır, dronlar tətbiq edilir. Bu işlərin görülməsində mümkün vasitələrdən istifadə edilir. Azərbaycan müharibə bitəndən dərhal sonra həmin əraziləri mina və partlamamış sursatlardan təmizləməyə başlayıb və bunun üçün arsenalındakı bütün qüvvələri səfərbər edib. İndiyədək orada böyük həcmdə iş görülüb. Azad olunmuş ərazilərdə aparılan infrastruktur layihələri onu göstərir ki, həmin yerlər minalardan təmizlənməsəydi, bu işlərin heç biri həyata keçirilə bilməzdi. Ərazi böyükdür, mina və partlayıcılar isə çoxdur. Nəticədə ərazilərin təmizlənməsi vaxt alır. Ona görə Ermənistan hökumətini mina xəritələrinin verilməsinə məcbur etmək, həmin xəritələrin alınması yolu ilə çox böyük ərazilərdə bu vacib işi aparmaq olar. Odur ki, bütün səylər düzgün xəritələrin alınmasına yönəldilməlidir”, - deyə müsahibimiz vurğulayıb.
Hafiz Səfixanov bildirib ki, digər tərəfdən rəsmi qurumların və vətəndaş cəmiyyəti təsisatlarının çağırışlarına baxmayaraq, hələ də işğaldan azad olunmuş ərazilərə qanunsuz səfər edənlər var və bununla da onlar həyatlarını təhlükəyə atırlar. İşğaldan azad olunmuş elə ərazilər var ki, xain və məkrli düşmən onun hər qarışına mina basdırıb. On görə də səfər zamanı müəyyən olunmuş marşrutdan və işlək yoldan bir addım da kənara çıxmaq həyat üçün böyük təhlükə doğurur.
2020-ci il noyabrın 10-dan indiyədək azad edilmiş ərazilərdə minaya düşmə nəticəsində yeddi hərbi qulluqçunun, 32 mülki şəxsin həlak olduğunu xatırladan İctimai Birliyinin sədri deyib ki, mina partlaması zamanı 117 hərbi qulluqçu, 67 mülki şəxs isə müxtəlif dərəcəli bədən xəsarətləri alıb. Bu ilin ilk yeddi ayında 38 nəfər minalardan və partlamamış hərbi sursatlardan zərər çəkib. Onlardan üç nəfər həlak olub. “Bu iyirmi ay ərzində kifayət qədər yüksək nəticələrdir. Bir var döyüş əməliyyatları zamanı minaya düşəsən, bir də var dinc dövrdə, əmin-amanlıq vaxtı. Dinc dövrdə bu qədər itki ilə üzləşmək, bu qədər adamın yarımcan olması əlbəttə, təəssüf doğurur”, - deyə birliyin sədri əlavə edib.