SİYASƏT
Ermənistanın Gəncə şəhərini raket atəşinə tutması nəticəsində həlak olan insanların xatirəsi Moldovada yad edilib
Kişineu, 27 oktyabr, AZƏRTAC
Azərbaycanın Moldovadakı səfirliyində Ermənistanın Gəncə şəhərini raket atəşinə tutması nəticəsində həlak olan insanların xatirəsinə həsr edilmiş anım tədbiri təşkil edilib.
Səfirlikdən AZƏRTAC-a bildiriblər ki, tədbirdə açılış nitqi ilə çıxış edən səfir Qüdsü Osmanov öz təşəbbüsləri ilə iştirak edən etnik rus, ukraynalı, moldovalı və azərbaycanlılar daxil olmaqla Moldova sakinlərinə təşəkkürünü bildirib, ermənilərin humanitar atəşkəs rejimini pozaraq gecə saatlarında Gəncə şəhərini raket hücumuna məruz qoyması, nəticədə körpə, qadın və yaşlılar daxil olmaqla çoxlu sayda insan tələfatı, müxtəlif dərəcəli xəsarət alması və şəhərin dəhşətli dağıntılara məruz qalması ilə nəticələnən müharibə cinayətinin törədilməsini tədbir iştirakçılarının diqqətinə çatdırıb. Eyni zamanda, səfir nitqində Dağlıq Qarabağın əzəli Azərbaycan torpağı olmasını əks etdirən tarixi faktlara toxunub və ölkəmizin beynəlxalq hüquq normalarına əsaslanan mövqeyinin sarsılmaz olduğunu bir daha vurğulayıb. Çıxışının sonunda səfir Qüdsü Osmanov Moldova sakinləri tərəfindən Səfirliyə ünvanlanan erməni təcavüzünü pisləyən yüzlərlə dəstək məktublarını yüksək qiymətləndirdiyini bildirib.
Daha sonra tədbirdə qonaq qismində iştirak edən Moldova parlamentinin deputatı Sergiu Sirbuya ölkəmizin sözügedən münaqişədə haqlı mövqeyindən danışıb, dinc əhaliyə qarşı Gəncədə törədilən təcavüzün qəbuledilməz olduğunu, Moldovanın da ərazi bütövlüyü ilə bağlı mübarizə apardığını, bununla bağlı ölkələrimizin oxşar tarix yaşadıqlarını bildirib, beynəlxalq birlik tərəfindən günahsız insanlara qarşı törədilən təcavüzün yolverilməzliyi, eləcə də, Azərbaycanın ərazi bütövlüyünün dəstəklənməsinə dair birmənalı mövqe nümayiş etdirilməli olduğunu dilə gətirib. Deputat münaqişənin tezliklə Azərbaycanın sərhədlərinin toxunulmazlığı çərçivəsində həll edilməsinə ümidvar olduğunu bildirib, sonda Gəncə şəhərində həlak olan günahsız sakinlərin ailə və yaxınlarına başsağlığı verib.
Tədbir zamanı çıxış edən Moldova Azərbaycanlıları Konqresinin (MAK) sədri Elçin Bayramov müharibənin müvafiq qaydalar əsasında aparılmasına məhəl qoymayan ermənilərin təcavüzkar hərəkətini pisləyib, Moldovada yaşayan bütün azərbaycanlılar adından erməni terrorunun qurbanları olan Gəncə şəhərinin sakinlərinə dəstək və birlik nümayiş etdirmək məqsədilə toplaşdıqlarını bildirib.
Eyni zamanda, tədbirə dəvət olunmuş moldovalı tarixçi və siyasi şərhçi Ruslan Şevçenko çıxışında münaqişənin tarixi köklərindən danışaraq, ermənilərin tarixən apardığı zorakı siyasətin nəticəsi olaraq müharibənin yenidən başladığını diqqətə çatdırıb. Moldovanın da oxşar münaqişəni yaşadığını qeyd edən tarixçi Azərbaycanın rəhbərliyi tərəfindən atılan konstruktiv və beynəlxalq hüquqa əsaslanan addımların Moldova üçün də nümunə olacağına ümid edib.
Tədbirdə Moldovadakı azərbaycanlı icmanın fəallarından olan Maarif Rəhimov, Mehriban Bədəlova, gənclərdən Zamir Qubadov, Berqan Maarif və başqaları Ermənistan-Azərbaycan Dağlıq Qarabağ münaqişəsi, eləcə də ermənilərin Gəncəyə raket hücumu ilə bağlı Azərbaycan, rus və rumın dillərində nitq söyləyərək ölkəmizin həqiqətlərini Moldova ictimaiyyətinə çatdırıblar.
Tədbir iştirakçıları səfirlik tərəfindən qurulmuş Gəncə hadisələrinin qurbanlarına həsr edilmiş guşəyə gül dəstələri düzüblər.
Tədbirdə çoxsaylı yerli KİV nümayəndələri iştirak edib, sözügedən tədbir Moldova mətbuatında geniş işıqlandırılıb.
Emil Hüseynli
AZƏRTAC-ın xüsusi müxbiri
Kişineu