Bakı, 24 oktyabr, AZƏRTAC 

Gəncə şəhərinin Ermənistan silahlı qüvvələri tərəfindən raket atəşinə tutulması ilə bağlı “Vikipediya”nın xarici dil bölmələrində məqalələr yaradılır. Məqalələrdə Ermənistanın raket hücumu nəticəsində dağılmış binalar, mülki insanların və obyektlərin hədəfə alınması, həlak olanlar və yaralananlar barədə məlumat verilir.

Bu barədə AZƏRTAC-a “Vikipediya” üzrə mütəxəssis, diaspor üzrə araşdırmaçı-ekspert Elnur Eltürk məlumat verib. O bildirib ki, məqalələrin yaradılmasında əsas məqsəd "Vikipediya"nın müxtəlif dillərdəki bölmələrində Ermənistanın terror siyasətini xarici oxucuların diqqətinə çatdırmaqdır. Bu işdə könüllülərin fəaliyyətini xüsusi qeyd etmək lazımdır. Müasir dövrdə internet resurslarında “Vikipediya” ən çox izlənilən ensiklopediya olduğu üçün orada fəallığı artırmaq çox vacibdir. Könüllü, on altı yaşlı Ayxan Zayıdzadə Ermənistanın Gəncəyə raket hücumları ilə bağlı məqaləni “Vikipediya”nın ingilis dili bölməsində yaradıb. A.Zayıdzadə tərəfindən bu günə qədər Ermənistanın ölkəmizə hücumları ilə bağlı bir sıra məqalələr yaradılıb və ya əsaslı redaktə edilib. Bu sahədə Tovuz hadisələrini, Qarabağ döyüşlərini (2020) və digər məqalələri qeyd etmək olar. O, ingilis dili bölməsində Azərbaycan, Qarabağla bağlı müzakirələrdə də fəal iştirak edir və peşəkar səviyyədə cavablar yazır. Bundan başqa, arqument və əsaslı mənbələrlə məqalənin məzmununu dəyişdirmək istəyən ermənipərəst qüvvələrə qarşı ciddi cavablar ortaya qoyur, çətin və məsuliyyətli işi uğurla yerinə yetirir. Əsas odur ki, həvəsdən düşmür.

"Eyni zamanda, “Vikipediya”nın fars dili bölməsində "Gəncə bombalanmaları" adlı məqalənin yaradılmasını prosesin tərkib hissəsi hesab etmək olar. Məqaləni fars dilinə Azərbaycan Dövlət Tərcümə Mərkəzinin Beynəlxalq əlaqələr idarəsinin aparıcı mütəxəssisi Əli Şükrü çevirib. Məqalə fars bölməsində alim-tədqiqatçı Ələddin Məlikov tərəfindən yaradılıb. Qarşıda "Vikipediya"da müxtəlif dillərdə Azərbaycanın tarixi, mədəniyyəti haqqında, həmçinin haqq səsimizin əsas mənbələrlə fars dili bölməsində dolğun və düzgün məlumatlarla çatdırılması ilə bağlı fəallıq daha da artırılacaq”,- deyə Elnur Eltürk qeyd edib.