SİYASƏT
Erol Kürkçüoğlu : Azərbaycan Prezidenti başlatdığı bu mübarizədə tamamilə haqlıdır və onun bu zəfərini alqışlamaq lazımdır
İstanbul, 7 oktyabr, AZƏRTAC
Azərbaycanın və Ermənistanın tarixini çox dərindən təhlil etmək lazımdır. Ermənilər tarix boyu qətliamlar törədiblər. Onlar 1918-ci ildə Azərbaycanın paytaxtı Bakıda 10 minə yaxın insanı qətlə yetiriblər və bu, tarixi sənədlərdə öz əksini tapıb. Erməni muzdluları tərəfindən insanlar məscidlərə doldurularaq qətlə yetirilib. O qətliamları törədən də Şaumyandır. Tarixdə baş verən bu hadisə Bakını yerlə bir edib. Yaxın tarixdə də bunlar baş verib. 1990-cı ildə Sovet ordusunun dəstəyi ilə ermənilər Bakıda 400-ə yaxın insanı qətlə yetiriblər. Hətta eyvanda paltar asan qadını da öldürüblər. Küçədə gəzən gənclərin üstündən tanklarla keçiblər. Azərbaycanın Şəhidlər xiyabanına girərkən hansı millətdən olmağından asılı olmayaraq, ağlamadan çıxmaq mümkün deyil. Türklər tarixində şəhidi çox olan bir millətdir. İmperialist dövlətlərin oyununa qoşulan ermənilər isə tarix boyu qətliamlar törədiblər. İşğal altındakı torpaqlar Azərbaycanındır. Hazırda Azərbaycan Ordusu Qarabağda qəhrəmanlıq nümayiş etdirir. Bu bölgənin tarixi əhalisinin sayına baxdıqda 1910-1915-ci illərdə burada yaşayanların 80 faizinin türk mənşəli olduğunu görürük. Sonralar oradakı türklər Azərbaycanın fərqli bölgələrinə köçməyə məcbur ediliblər. Erməni zülmündən qaçmaq üçün köçüblər. Hətta o zaman bir çox ailələr tamamilə məhv edilib. Dağlıq Qarabağ Azərbaycan torpağıdır. Azərbaycan Prezidenti İlham Əliyev başlatdığı bu mübarizədə tamamilə haqlıdır və onun bu zəfərini alqışlamaq lazımdır.
AZƏRTAC xəbər verir ki, bu sözləri Anadolu Agentliyinə müsahibəsində Türkiyənin Atatürk Universitetinin Türk-Erməni Əlaqələri Araşdırma Mərkəzinin müdiri professor Erol Kürkçüoğlu deyib.
Professor “Ermənilərin türklərə qarşı törətdikləri qətliamlar tarixi mənbələrdə” mövzusunda müsahibəsində bildirib: “Tarixi mənbələrdə ermənilərin türklərə, o cümlədən Birinci Dünya müharibəsi dövründə silahsız mülki əhaliyə qarşı törətdikləri qırğınları aşkar edilən kütləvi məzarlıq isbatlayır. Qazıntılar zamanı əldə edilənlər maddi sübutlar müsəlmanların erməni birləşmələri tərəfindən insanlığa sığmayan işgəncələrlə qətlə yetirildiyini göstərir. Tarix səhnəsində adı soyqırımlarla müşayiət olunan Ermənistan işğal olunmuş ərazilərini müdafiə edən Azərbaycanın mülki əhalisinə qarşı da eyni şəkildə davranır. Ermənilər tarix boyu xaricdən aldıqları güclə türk millətinə qarşı saysız-hesabsız qətliamlar törədiblər. Osmanlı imperiyası zamanı da “millet-i sadıka” (sadiq millət) adlandırılan ermənilər buna xəyanətlə cavab veriblər”.
Ermənilərin 1828-1829-cu illərdə Rusiya ilə ittifaqını xatırladan professor deyib: “Bu ittifaqın ardından erməni terror qruplaşmaları qətliamlar törətməyə başladılar. Baxın, onlar hər zaman günahsız insanları öldürüblər. 1877-1878-ci illərdə baş verən müharibədə belə ermənilərin xəyanətindən bəhs edilir. Ərzurumda sığınacaqlı müdafiə postlarının dağılması da ağır nəticələr verib. Birinci Dünya müharibəsində də Anadolunun hər yerində tarixi sənədlərlə tanınan 519 min mülki vətəndaş qətliamların qurbanı olub. Onlar müharibə ilə heç bir əlaqəsi olmayan insanları qətlə yetiriblər. Rus komandir Tverdoxlebov xatirələrində yazır: “27 fevral gecəsi ermənilər yanıma gəldilər. Karsqapı bölgəsində 3 min müsəlman türkünü öldürdüklərini ələ salaraq danışdılar. O zaman günahsız insanların öldürülməsinin bir vəhşilik olduğunu dediyimdə cavab olaraq mənə “Siz russunuz, erməni millətinin xəyallarını anlaya bilməzsiniz”, – deyə cavab verdilər”.
Günel Məlikova
AZƏRTAC-ın xüsusi müxbiri
İstanbul