SİYASƏT
FANA AZƏRTAC-ın sədrlik etdiyi beynəlxalq media qurumları ilə əlaqələri genişləndirməyi qərara alıb
Bakı, 24 noyabr, AZƏRTAC
Ərəb Xəbər Agentlikləri Birliyinin (FANA) İordaniyanın paytaxtı Əmmanda keçirilmiş 45-ci iclasında AZƏRTAC-ın hazırda sədrlik etdiyi Dünya Xəbər Agentliklərinin Konqresi (NAWC) və Asiya və Sakit Okean Ölkələri Xəbər Agentlikləri Təşkilatı (OANA) ilə əməkdaşlıq məsələləri diqqət mərkəzində olub.
AZƏRTAC xəbər verir ki, iki gün davam edən iclasda 15 ərəb xəbər agentliyinin rəhbərləri, eləcə də bir sıra Avropa və digər ölkələrin xəbər agentliklərinin nümayəndələri iştirak edib. İclasda 2016-cı ildə Bakı şəhərində keçirilmiş və FANA-nın da təmsil olunduğu Dünya Xəbər Agentliklərinin V Konqresinin və Konqres Şurasının (NACO) 2017-ci ilin martında Londonda keçirilmiş iclasının yekunları müzakirə olunub. Həmçinin 2019-cu ilin iyununda Bolqarıstanın paytaxtı Sofiyada keçiriləcək Dünya Xəbər Agentliklərinin VI Konqresində FANA-nın iştirakı ilə bağlı qərar qəbul edilib.
Eyni zamanda, FANA ilə OANA arasında bağlanmış sazişə yenidən baxılması və media nümayəndələrinin 2018-ci ilin mayında Sankt-Peterburq İqtisadi Forum çərçivəsində keçiriləcək görüşündə FANA-nın iştirakına dair qərarlar qəbul olunub.
Müzakirələr zamanı FANA ilə Avropa Xəbər Agentlikləri Alyansı (EANA) arasında əməkdaşlıq məsələlərinə də toxunulub. EANA ilə yeni əməkdaşlıq sazişinin imzalanması, habelə dünya xəbər agentlikləri ilə birgə iki ildən bir “dəyirmi masa”ların keçirilməsi təklifləri irəli sürülüb.
İclasda FANA Katibliyinin yeni heyəti formalaşdırılıb, idarə heyətinə yeni üzvlər təyin olunub.
Xatırladaq ki, AZƏRTAC hazırda Dünya Xəbər Agentlikləri Konqresinə və OANA-ya sədrlik edir. 2019-cu ildə Dünya Xəbər Agentlikləri Konqresinə sədrlik Bolqarıstanın BTA agentliyinə, OANA-ya sədrlik isə Cənubi Koreyanın Yonhap agentliyinə keçəcək. BTA və Yonhap agentlikləri bu hüququ Bakıda keçirilən Dünya Xəbər Agentliklərinin V Konqresində və OANA-nın XVI Baş Assambleyasında səs çoxluğu ilə əldə ediblər.