İQTİSADİYYAT
FEMMES DIGITALES klubunun II Regional İKT Konfransı keçiriləcək
Bakı, 3 noyabr, AZƏRTAC
Noyabrın 5-də “ASAN xidmət”in Qəbələ Mərkəzində qızlar üçün FEMMES DIGITALES klubunun II Regional İKT Konfransı keçiriləcək.
Klubdan AZƏRTAC-a bildirilib ki, konfrans çərçivəsində qızlar üçün bir sıra tədbirlər keçiriləcək. Təhsil Nazirliyi və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin dəstəyi ilə keçirilən regional konfransın təşkilatçısı “Azərbaycan qadınları İKT-də - FEMMES DIGITALES (AWIC)” klubudur. Bu il tədbirin baş sponsoru “Gilan Holding”dir.
Tədbirin birinci hissəsi çərçivəsində “Azərbaycan qadınları İKT-də - FEMMES DIGITALES (AWIC)” klubunun üzvləri olan Nəqliyyat, Rabitə və Yüksək Texnologiyalar Nazirliyi, “B.EST Solutions”, “ASAN xidmət”, “MONT”, “Cybernet”, “Aztelekom”, “Ultra Technologies” və digər şirkətlərin xanım nümayəndələri informasiya texnologiyaları sahəsində öz karyera tarixçələri ilə bölüşəcək, bu sahədə təhsilin perspektivləri haqqında danışacaq və məktəbli qızlarla ünsiyyət quracaqlar. Həmçinin Qəbələ rayonunun məktəbli qızları arasında IT-startapı üçün ən yaxşı ideya müsabiqəsi keçiriləcək. Günün ikinci yarısında isə konfrans iştirakçıları nəticələrin qiymətləndirilməsinə başlayacaq.
Konfransın kompüter təhsilinə istiqamətlənmiş ikinci hissəsi isə beynəlxalq ixtisaslaşmış tədris mərkəzi olan STEP Azerbaijan IT-Akademiyasının iştirakı ilə keçəcək. IT-Akademiyanın nümayəndələri qızları qüvvədə olan təlim proqramları ilə tanış edəcək, robot texnikası üzrə təcrübi dərs keçirəcəklər.
Tədbirin sonunda IT-startapı üçün ən yaxşı ideya müsabiqəsinin qaliblərinə konfransın sponsorundan və şirkətlərin xanım iştirakçıları tərəfindən sertifikat və xatirə hədiyyələri təqdim ediləcək.
Qeyd edək ki, tədbirin keçirilməsində əsas məqsəd qadın iştirakçıların sayının artırılması, həmin regionda yaşayan və təhsil alan qızlar arasında gələcək karyeranın qurulması və potensial kadrların hazırlanması üçün İKT-nin bir sahə kimi yayılmasıdır.
Xatırladaq ki, ötən il noyabrın 6-da Masallının “ASAN həyat” kompleksində məktəbli qızlar üçün İKT üzrə I Regional Konfrans keçirilib. Tədbir məktəbli qızlar və onların valideynləri arasında çoxsaylı müsbət rəylərə səbəb olub.