FHN: Ötən sutka ərzində 25 halda yanğına çıxış olub

Bakı, 18 may, AZƏRTAC

Fövqəladə Hallar Nazirliyinin (FHN) 112 - qaynar telefon xəttinə daxil olmuş zənglər əsasında nazirliyin aidiyyəti qurumları tərəfindən ötən sutka ərzində 25 halda yanğına çıxış və 3 halda köməksiz vəziyyətdə qalma faktı üzrə qəza-xilasetmə əməliyyatları həyata keçirilib.

Nazirlikdən AZƏRTAC-a bildirilib ki, görülmüş təcili və təxirəsalınmaz tədbirlər nəticəsində yanğınların operativ söndürülməsi, insanların həyatının xilas olunması təmin edilib.

FHN-in qüvvələri tərəfindən ötən sutka ərzində ikisi azyaşlı olmaqla dörd nəfər xilas edilib, Bakı şəhəri, Sabunçu rayonu, Maştağa qəsəbəsində dərinliyi təxminən 45-50 metr olan quyudan iki uşağın meyiti çıxarılaraq aidiyyəti üzrə təhvil verilib.