CƏMİYYƏT


FHN-in Akademiyasında professor-müəllim heyətinin VI elmi-texniki konfransı keçirilib

Bakı, 4 may, AZƏRTAC

Mayın 4-də Fövqəladə Hallar Nazirliyinin (FHN) Akademiyasında ümummilli lider Heydər Əliyevin anadan olmasının 98-ci ildönümünə həsr edilmiş “Fövqəladə hallarla mübarizənin aktual problemləri” mövzusunda VI elmi-texniki konfrans keçirilib.

FHN-in mətbuat xidmətindən AZƏRTAC-a bildiriblər ki, videokonfrans rejimində keçirilən tədbirdə FHN Akademiyasının və respublikanın bir sıra ali məktəblərinin professor və müəllimləri iştirak ediblər.

Konfransı giriş sözü ilə açan Akademiyanın rəisi general-mayor Baba Salayev qeyd edib ki, ulu öndər Heydər Əliyev ölkənin inkişafında, milli intibahın təminatında təhsilə və elmə daim böyük əhəmiyyət verib. Gənc nəslin elm və təhsilə cəlb edilməsi onun müdrik siyasətinin daimi prioritetlərindən olub. Ümummilli Liderin layiqli davamçısı Prezident İlham Əliyev də təhsil və elm sahəsini daim xüsusi diqqətdə saxlayır. Məhz dövlətimizin başçısının bilavasitə təşəbbüsü ilə həyata keçirilən məqsədyönlü tədbirlər nəticəsində bu istiqamətdə əhəmiyyətli nəticələr əldə olunur.

Akademiya rəisi, həmçinin vurğulayıb ki, son zamanlar dünyanın müxtəlif bölgələrində baş verən təbii və texnogen mənşəli fəlakətlər bu hadisələrin elmi əsaslarının daha dərin, hərtərəfli, kompleks öyrənilməsinə və tədqiqinə böyük ehtiyac duyulduğunu göstərir. Bu baxımdan konfransda təqdim edilən məqalələrin fövqəladə halların qarşısının alınması və nəticələrinin aradan qaldırılması istiqamətində görülən işlərə faydası olacaq.

Akademiya rəisinin müavini polkovnik İlham Babaşov ümummilli lider Heydər Əliyevin əhalinin və ərazilərin təhlükəsizliyinin təmin olunmasında əvəzsiz rolundan danışıb. Natiq Ulu Öndərin mülki müdafiə, insanların həyat və fəaliyyətinin təhlükəsizliyi məsələləri ilə əlaqədar misilsiz xidmətlərindən geniş bəhs edib.

FHN-in Regional mərkəzlərlə işin təşkili, layihələrin idarə edilməsi və təhsil məsələləri üzrə Baş idarəsinin Layihələrin idarə edilməsi və təhsil məsələləri üzrə idarəsinin rəisi Azadi Quliyev qeyd edib ki, ümummilli lider Heydər Əliyev zəngin siyasi fəaliyyəti ilə Azərbaycanın dövlətçilik tarixində müstəsna rol oynayıb. Azərbaycan xalqı Ulu Öndərin adını hər zaman əziz tutur, müstəqil dövlətimizin xilaskarı, qurucusu və memarı kimi tanıyır.

Plenar iclasda FHN-in Fövqəladə halların xəbərdar edilməsi və daxili təhlükəsizlik Baş İdarəsinin Fövqəladə halların xəbərdar edilməsi işinin təşkili idarəsinin əhalinin və ərazilərin təhlükəsizliyinin təşkili şöbəsinin müdiri texnika elmləri üzrə fəlsəfə doktoru Pərviz Mehdiyev, Akademiyanın Humanitar fənlər kafedrasının müdiri tarix üzrə fəlsəfə doktoru dosent Fizuli İbrahimzadə, Tədris şöbəsinin mühəndis-proqramçısı daxili xidmət baş leytenantı Şakir Fərəcullayev, Təbiət və fundamental fənlər kafedrasının müəllimi Bağır İbadov, Həyat fəaliyyətinin təhlükəsizliyi ixtisas fənləri kafedrasının baş müəllimi baş leytenant Rəşad Məmmədli və Milli Aviasiya Akademiyasının Aviasiya təhlükəsizliyi kafedrasının baş müəllimi Nadir Xalıqov məruzələrlə çıxış ediblər.

Plenar iclasdan sonra konfrans işini bölmə iclasları ilə davam etdirib. Bölmə iclaslarında FHN Akademiyasının və ölkənin bir sıra ali məktəblərinin nümayəndələri müxtəlif mövzular üzrə məruzələrlə çıxış ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.