CƏMİYYƏT
FHN-n həyata keçirdiyi minatəmizləmə əməliyyatları ilə tanışlıq məqsədilə Ağdam rayonuna media-tur təşkil olunub YENİLƏNİB VİDEO
Ağdam, 3 dekabr, İlyas Zeynallı, AZƏRTAC
İşğaldan azad olunan ərazilərdə həyata keçirilən minatəmizləmə əməliyyatları çərçivəsində Fövqəladə Hallar Nazirliyi (FHN) tərəfindən görülən işlərlə tanışlıq üçün Ağdam rayonunun Maqsudlu kəndinə media-tur təşkil edilib.
AZƏRTAC-ın bölgəyə ezam olunmuş müxbiri xəbər verir ki, media-turun məqsədi bu ərazilərin minalardan və partlamamış döyüş sursatlarından təmizlənməsi sahəsində FHN-in Xüsusi Riskli Xilasetmə Xidməti tərəfindən görülən işlərin işıqlandırılmasıdır.
Jurnalistlərə məlumat verilib ki, 44 günlük Vətən müharibəsindən sonra ərazilərin minalardan, partlamamış hərbi sursatlardan və müharibənin digər qalıqlarından təmizlənməsi prosesinə digər dövlət qurumları ilə yanaşı, FHN-in Xüsusi Riskli Xilasetmə Xidmətinin minaaxtaran qrupları da cəlb olunub. Cari ilin yanvarından başlayan əməliyyatlar əsasən Ağdam və Füzuli rayonları istiqamətində - kənd və qəsəbələrdə, eləcə də içməli su hövzələrinin kənar ərazilərində aparılır.
Media-tur zamanı KİV nümayəndələri ərazilərin minaaxtaran itlər vasitəsilə minalardan təmizlənməsi prosesi, eləcə də bu əməliyyatların icrası zamanı istifadə edilən avadanlıqla tanış olublar.
Fövqəladə Hallar Nazirliyinin Xüsusi Riskli Xilasetmə Xidmətinin kinoloji qrupunun rəis müavini Zaur Şirinov AZƏRTAC-a müsahibəsində bildirib ki, nazirliyin minaaxtaran itlər qrupu işğaldan azad olunmuş ərazilərdə xüsusi təlim keçmiş itlərlə və təlimçilər ilə birgə genişmiqyaslı axtarış işlərinə cəlb olunub. İstehkamçılarla birgə minaların aşkarlanması və zərərsizləşdirilməsi işləri fasiləsiz həyata keçirilir.
Nazirliyin Mülki Müdafiə Qoşunlarının N saylı hərbi hissəsinin tibb məntəqəsinin rəisi, kapitan İlqar Muxtarov qeyd edib ki, ərazidə FHN-in Xüsusi Riskli Xilasetmə Xidmətinin kinoloji xidmətlərinin əməkdaşları minaların və basdırılmış gizli sursatların aşkar edilməsi istiqamətində fasiləsiz iş aparırlar: “Minalanmış sahələrdə təmizləmə əməliyyatları zamanı baş verə biləcək bədbəxt hadisələr nəticəsində yaralanan şəxslərin aldığı xəsarətlərin dərəcəsindən və ağırlıq dərəcəsindən asılı olaraq ilkin tibbi yardımın göstərilməsi və təyin olunmuş müəyyən xəstəxanalara təxliyəsi işləri görülür. Tibb xidməti təcili tibbi yardım avtomobili və ən müasir texnikalarla tam təmin olunub. İstənilən ərazidə ağırlıq dərəcəsindən asılı olmayaraq hər cür tibbi yardımın göstərilməsinə tam hazırıq.
Xatırladaq ki, işğaldan azad edilmiş ərazilərdə 2020-ci il noyabrın 10-dan bu il noyabrın 22-dək minaya düşmələri nəticəsində əsasən mülki şəxslər olmaqla 180-nə yaxın şəxs həlak olub və ya yaralanıb. İşğaldan azad edilmiş ərazilərdə keçən il noyabrın 11-dən cari il noyabrın 22-dək ümumilikdə piyada əleyhinə 10 min 455, tank əleyhinə 4640 mina, 12 min 637 ədəd partlamamış hərbi sursat aşkarlanıb. Bu müddətdə ümumilikdə 62 milyon 855 min 782 kvadratmetr (6286 hektar) ərazi mina və partlamamış hərbi sursatdan təmizlənib.