SİYASƏT
Fatma Yıldırım: Azərbaycan Ordusu dövlətimizin və xalqımızın güvən yeridir
Bakı, 26 iyun, AZƏRTAC
Azərbaycan xalqı 26 İyun - Silahlı Qüvvələr Gününü böyük qürurla, ruh yüksəkliyi ilə qeyd edir. Azərbaycan Ordusu dövlətimizin və xalqımızın güvən yeridir. Müzəffər Ali Baş Komandanımız, Prezident İlham Əliyevin rəhbərliyi ilə rəşadətli Ordumuzun qəhrəman əsgər və zabitləri 44 günlük Vətən müharibəsində möhtəşəm Zəfər qazanmaqla tarix yazdılar. Bu Qələbə dövlətçilik tariximizin Zəfər salnaməsidir.
Bu fikirləri AZƏRTAC-a açıqlamasında Milli Məclisin deputatı Fatma Yıldırım deyib.
Deputat bildirib ki, ulu öndər Heydər Əliyev 1993-cü ildə hakimiyyətə qayıtdıqdan sonra respublikamızda ordu quruculuğu sahəsində mühüm tədbirlərin həyata keçirilməsinə başlandı. Məhz Ümummilli Liderin 1998-ci il mayın 22-də imzaladığı Fərmanla iyunun 26-sı Azərbaycan Respublikasının Silahlı Qüvvələri Günü elan edildi. Bu qərar Azərbaycan Xalq Cümhuriyyəti irsinə ehtiramın göstəricisidir.
Onun sözlərinə görə, 2003-cü ildən etibarən Azərbaycanda hərbi quruculuq yüksələn xətlə inkişaf edir. Bunun ən başlıca səbəbi isə Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyevin dövlət başçısı postunda fəaliyyətə başladığı ilk gündən Ümummilli Liderimizin həyata keçirdiyi strateji əhəmiyyətli tədbirləri və ənənələri uğurla davam etdirməsi, o cümlədən ordu quruculuğu işini prioritet elan etməsi ilə bağlıdır. Bu gün Azərbaycan Ordusu dünyanın ən güclü 50 ordusu sırasında yer alır. Ölkəmizin ötən illərdə dinamik inkişafı Silahlı Qüvvələrin büdcəsinin artması və nəticə etibarilə Ordumuzun güclənməsi ilə müşayiət olundu. Prezident İlham Əliyevin xüsusi diqqət və qayğısı sayəsində son illərdə ordunun döyüş qabiliyyəti daha da yüksəlib, maddi-texniki bazası əhəmiyyətli dərəcədə möhkəmləndirilib, hərbçilərin sosial vəziyyətinin yaxşılaşdırılması istiqamətində mühüm addımlar atılıb. Görülən işlərin nəticəsidir ki, hazırda Azərbaycanda güclü maddi-tədris bazasına, müasir texnologiyalara malik, yeni tədris metodları ilə fəaliyyət göstərən, uğurları ölkəmizin sərhədlərindən də uzaqlara yayılan hərbi təhsil sistemi mövcuddur. Bu yaxınlarda Milli Müdafiə Universitetinin yaradılması isə hərbi təhsil sistemini daha da təkmilləşdirəcək.
Fatma Yıldırım qeyd edib ki, Azərbaycanın əzəli dədə-baba torpaqlarının təcavüzkar erməni qəsbkarları tərəfindən 30 ilə yaxın müddətdə işğal altında qalması, beynəlxalq birliyin buna göz yumması problemin diplomatik həllinə imkan vermədi. Ermənilər mütəmadi atəşkəsi pozur, günahsız insanları qətlə yetirirdi. Ən acınacaqlısı da o idi ki, bütün bunlar beynəlxalq qurumların, Qarabağ torpaqlarının ərazi bütövlüyünü tanıyan və Azərbaycana aid olduğunu birmənalı şəkildə təsdiqləyən dünya dövlətlərinin gözü qarşısında baş versə də, onlar tərəfdən laqeydlik, susqunluq müşahidə olunurdu. 2020-ci il sentyabrın 27-də Prezident İlham Əliyev xalqa müraciət edərək, Ermənistan silahlı qüvvələri tərəfindən bir neçə istiqamətdə müxtəlif növ silahlardan, o cümlədən ağır artilleriyadan istifadə olunmaqla yaşayış məntəqələrimizin, dinc sakinlərimizin atəşə məruz qalması haqqında məlumat verdi. Ermənistanın növbəti hərbi təxribatına cavab olaraq Azərbaycan Ordusu əks-hücum əməliyyatına başladı. Tariximizə “Vətən müharibəsi”, “İkinci Qarabağ müharibəsi”, “Dəmir yumruq” əməliyyati kimi daxil olan müharibə çox uzun sürmədi. 44 gün ərzində xalqla dövlətin sarsılmaz birliyinin, Azərbaycanın müzəffər Ordusunun şanlı Qələbəsi ilə başa çatan müharibə ordumuzun gücünü bütün dünyaya göstərdi.
“44 gün ərzində hər gün Azərbaycan Ordusu irəli gedirdi, hər gün yeni şəhərlər, kəndlər, qəsəbələr, yüksəkliklər azad edilirdi. Azərbaycan əsgəri, Azərbaycan zabiti bir amalla vuruşurdu ki, bu işğala son qoyulsun və tarixi ədalət zəfər çalsın. Bu müharibə zamanı Azərbaycan Ordusunda bir nəfər də fərari olmayıb. Yaralı əsgər və zabitlərimiz hərbi hospitallarda, xəstəxanalarda həkimlərdən xahiş edirdilər ki, bizi tezliklə sağaldın, biz qayıdaq döyüş meydanına, öz missiyamızı başa vurmalıyıq. Qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına bütün dünya Azərbaycanın şanlı Qələbəsinin şahidi oldu. Bizə Qələbə sevinci yaşatdıqları üçün şanlı Ordumuzun qəhrəman əsgərlərinə, şəhidlərimizə və qazilərimizə borcluyuq. Vətən müharibəsində Azərbaycan Ordusunun nümayiş etdirdiyi döyüş qabiliyyəti dünyanın müasir hərb elmində bir yenilik oldu. Təsadüfi deyil ki, dünyanın bir sıra hərbi mərkəzlərində Azərbaycan Ordusunun tətbiq etdiyi strategiya öyrənilir, 44 günlük müharibə XXI əsrin müharibəsi hesab olunur. Biz Azərbaycan xalqı olaraq güclü ordumuzla qürur duyuruq”, - deyə deputat vurğulayıb.