CƏMİYYƏT


Fəal könüllülər mükafatlandırılıb

Bakı, 5 dekabr, AZƏRTAC

Dekabr 5-də Beynəlxalq Könüllülər Günündə Gənclərin İnkişaf və Karyera Mərkəzinin (GİKM) 32 nümayəndəliyində mükafatlandırma mərasimləri keçirilib, fəal könüllülər həmin gün münasibətilə təşəkkürnamələr və hədiyyələrlə təbrik edilib.

Mərkəzdən AZƏRTAC-a bildiriblər ki, ümumi təşəkkürnamələrlə təltif edilən 1500 könüllüdən 135-i xüsusi fəaliyyətlərinə görə hədiyyələrlə mükafatlandırılıb. Xüsusi fərqləndirilən könüllülər ətraf mühitin qorunması istiqamətində “Təbiətin dostu”, vətənpərvərlik istiqamətində “Xarı Bülbül”, həssas əhali qrupuna aid şəxslər üçün təşkil olunmuş fəaliyyətlərdə aktiv iştirakına görə “Yardımsevər”, COVID-19 pandemiyası ilə əlaqədar əhali arasında karantin qaydalarının təbliği istiqamətində “Sağlamlıq keşikçisi”, mərkəzin nümayəndəliklərinin fəaliyyətinin daha geniş kütləyə çatdırılması və hərbi əməliyyatlar dövründə sosial şəbəkələrdə həqiqətlərin dünya ictimaiyyətinə çatdırılması istiqamətində təşkil olunmuş fəaliyyətlərdə aktiv iştirakına görə “Şəbəkə döyüşçüsü” nominasiyası ilə təltif olunublar.

Mükafatlandırma mərasimlərində qeyd edilib ki, 2020-ci il - “Könüllülər ili” ərzində GİKM-in 32 nümayəndəliyində 100-dən çox layihə, sosial könüllülük, vətənpərvərlik, fərdi inkişaf, karyera, ətraf mühit, sağlam həyat kimi fəaliyyət istiqamətlərində 850-dən çox tədbir və təlim keçirilib, fəallığın baş tutmasında 35 minə yaxın gənc iştirak edib. Bir il ərzində 32 rayondan 30-a yaxın könüllü ölkə əhəmiyyətli müxtəlif şirkətlərdə işlə təmin olunub və bu GİKM könüllülərindən beşi, qürurverici haldır ki, məhz könüllüsü olduqları region nümayəndəliklərində işə başlayıblar.

Həmçinin bildirilib ki, könüllülük insanları vahid niyyət ətrafında birləşdirən, vətəndaş, cəmiyyət və dövlətin birgə fəaliyyətinin ən uğurlu formatıdır. Könüllülük həm də vətənpərvərlik məktəbi, öz xalqına, dövlətinə, milli-mənəvi dəyərlərə bağlılıq və xidmət örnəyidir. Bu fəaliyyətin təşviqi məqsədilə dövlətimiz tərəfindən zəruri addımlar atılıb, normativ-hüquqi baza təkmilləşdirilib, dövlət dəstəyi mexanizmləri formalaşdırılıb.

Qeyd edək ki, Prezident İlham Əliyev 2019-cu il dekabrın 30-da Azərbaycan Respublikasında 2020-ci ilin “Könüllülər ili” elan edilməsi haqqında Sərəncam imzalayıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.