REGİONLAR


Fəqət Şadlinskaya: Müasir idarəetmənin tətbiqi bölgələrin dayanıqlı inkişafını təmin edəcək

Bərdə, 28 iyul, AZƏRTAC

Böyük Qələbəni qazanmış Azərbaycan bu gün inkişafın yeni mərhələsini yaşayır. İşğaldan azad edilmiş ərazilərimizlə yanaşı, bütün bölgələrin sosial-iqtisadi inkişafı Prezident İlham Əliyevin diqqətindədir.

AZƏRTAC-ın bölgə müxbiri xəbər verir ki, bunu Yeni Azərbaycan Partiyası (YAP) Bərdə rayon təşkilatının sədri Fəqət Şadlinskaya deyib.

Təşkilatın sədri bildirib ki, son 18 ildə regionların sosial-iqtisadi inkişafına dair üç dövlət proqramı uğurla icra edilib və dördüncü sənədin icrası davam edir. Ölkəmizin hərtərəfli inkişafı həyata keçirilən siyasətin əsasını təşkil edir. Ayrı-ayrı sahələri əhatə edən dövlət proqramları da uğurla icra edilir. Regionların inkişafında onların potensialından səmərəli istifadəyə yol açan dövlət proqramlarının icrasının uğurlu nəticələri göz qabağındadır. Bölgələrdə infrastrukturun yenilənməsinə, müasir tələblərə cavab verməsinə xüsusi diqqət göstərilir. Elektrik enerjisi ilə təchizat, qazlaşdırma, yol infrastrukturu, suvarma, içməli su, sosial infrastruktur layihələri icra olunur. Hər rayonda müasir xəstəxana, tibb ocaqları, məktəblər inşa edilir. İnsanların rahat yaşayışı üçün bütün zəruri addımlar atılır. Yeni iş yerlərinin yaradılması xüsusi əhəmiyyət kəsb edir. Yeni infrastruktur layihələri iş yerlərinin yaradılmasına xidmət göstərir. Sahibkarlar bölgələrdə bütün quruculuq işlərində fəal iştirak edirlər.

İyulun 25-də Prezident İlham Əliyev Araz Əhmədovu Masallı, Əkbər Abbasovu Lerik və Elvin Paşayevi Göygöl Rayon İcra Hakimiyyətlərinin başçısı təyin olunmaları ilə əlaqədar qəbul edərkən atılan addımların, qarşıya qoyulan hədəflərin, tarixi Zəfərimizin yaratdığı reallıqlar fonunda mühüm çağırışlar edib və mesajlar verib. Bildirib ki, ölkəmizdə işlər elə getməlidir ki, heç bir narahatedici problem, heç bir ədalətsizlik olmasın. Dövlətimizin başçısı deyib: “İndi hər şey göz qabağındadır. Azərbaycan necə sürətlə inkişaf edir, xüsusilə indiki şəraitdə ki, həm dünyada iqtisadi böhran hökm sürür, həm digər narahatedici məsələlər göz qabağındadır. İndi belə olan halda, hansısa dövlət məmuru əgər öz vəzifə borcunu şərəflə yerinə yetirmirsə, əlbəttə ki, o, cəzalandırılacaq. İmkan verə bilmərik ki, bizim uğurlu inkişafımıza kimsə kölgə salsın, kimsə hansısa yerdə özü üçün rüşvətxorluq yuvası qursun və dövlətimizin əsaslarını sarsıtsın”.

Prezident İlham Əliyev çıxışlarında yeni iş yerlərinin yaradılmasının daimi proses olması ilə bağlı fikirlər səsləndirir. Dövlətimizin başçısı qeyd edilən görüşdə də bu məqama xüsusi diqqət yönəldərək bildirib ki, Azərbaycan müstəqilliyə qovuşanda əhalimizin sayı 7 milyondan bir qədər çox idisə, bu gün 10 milyondan çoxdur. Bu, təbii olaraq tələb edir ki, iş yerlərinin açılması prosesi daimi xarakter alsın. Eyni zamanda, ödənişli sosial işlərin yaradılması da geniş vüsət almışdır.

Şəhid ailələrinə diqqət və qayğı daim prioritetdir. Dövlətimizin başçısının görüşdə diqqət yönəltdiyi məsələlərdən biri məhz bu oldu. İkinci Qarabağ müharibəsindən əvvəl və sonra şəhid ailələri daim dövlətin diqqət mərkəzindədir. Prezident İlham Əliyevin şəhid ailələri, müharibə əlilləri ilə çoxsaylı görüşləri olur. Onların məişət problemləri dövlət tərəfindən həll edilir. Prezident İlham Əliyev görüşdə bu statistik rəqəmi də açıqladı ki, 12 min 500-dən çox şəhid ailəsinə dövlət tərəfindən mənzillər, fərdi evlər, minlərlə minik maşını verilib. Bu proses davam etdirilir. Bakı, Sumqayıt və Abşeron rayonlarında şəhid ailələrinin evlə təminatı məsələləri artıq yekunlaşmaq üzrədir. Digər rayonlarda da dövlət xətti ilə bu işlər görüləcək. Dövlət hər bir vətəndaşının yanındadır, onların qayğıları ilə maraqlanır, həlli istiqamətində mühüm addımlar atır. Bununla əlaqədar Prezident İlham Əliyev bu tələbi qarşıya qoydu: “Rayon icra orqanlarının nümayəndələri onlara biganə qalmasınlar, əksinə, daim onların yaşayışı ilə maraqlansınlar, onların məşğulluğu ilə maraqlansınlar”.

Hər bir ölkənin inkişafında əsas amillərdən biri idarəetmədə ciddi islahatların aparılmasıdır. Ölkəmizdə davamlı islahatlar həyata keçirilir. Kadr islahatları hədəflərə yüksək səviyyədə nail olmağa öz müsbət təsirini göstərir. Şəffaflığın təminatı, korrupsiyaya qarşı mübarizə bütün dövrlərdə aktuallığını qoruyur. Prezident bir daha bu xəbərdarlıq etdi ki, kiminsə tamahına, şəxsi maraqlarına görə ölkəmizin uğurlu inkişafına kölgə sala bilmərik. Hər bir rayonda müasir idarəetmə qaydaları tətbiq olunarsa, bir çox problemlər aradan qaldırılacaq. Dövlətin siyasəti bundan ibarətdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.