Bərdə, 19 iyul, AZƏRTAC

Azərbaycanın Ermənistan üzərində qazandığı qələbə dövlətimiz və xalqımız üçün nə qədər əziz və şərəflidirsə, şəhid ailələrinə və müharibədə yaralananlara dövlət səviyyəsində yaxından diqqət və qayğı bir o qədər vacib və önəmlidir. Odur ki, Vətən uğrunda canından keçmiş oğulların doğmalarına, yaxınlarına, qazilərə hərtərəfli dəstək göstərilməsi sahəsində ölkəmizdə aparılan siyasət mənəvi məsələ kimi öndədir.

AZƏRTAC-ın bölgə müxbiri xəbər verir ki, bunu Yeni Azərbaycan Partiyası Bərdə rayon təşkilatının sədri Fəqət Şadlinskaya deyib.

Təşkilatın sədri bildirib ki, ölkəmiz bütün dünyada şəhid ailələri və müharibə veteranlarının sosial müdafiəsi sahəsində ən nümunəvi təcrübəyə malik ölkədir. Bu kateqoriyadan olan insanların sosial ödənişlərlə təminatı və bu ödənişlərin mütəmadi olaraq artırılması, şəhid ailələri və müharibə əlillərinin mənzillə, avtomobillə təmin edilməsi, eləcə də digər sosial müdafiə və aktiv məşğulluq proqramları ilə əhatə olunması və həmin proqramların ildən ilə genişləndirilməsi, onlara güzəşt və imtiyazların tətbiqi bu qayğının bariz göstəricisidir. Şəhid ailələri və müharibə əlilləri dövlətin qayğısı altındadır. Son illər ərzində bu sahədə çox böyük işlər görülüb. 10 min şəhid ailəsi və müharibə əlili dövlət tərəfindən mənzillərlə, fərdi evlərlə təmin olunub və bu proses davam edir. 2020-ci ildə Azərbaycan bu istiqamətdə ən böyük göstəricilərə nail olub - 1572 şəhid ailəsi və Qarabağ qazisi evlərlə, mənzillərlə təmin olunub. Bu il 3 minədək şəhid ailəsi, müharibə əlili evlərlə, mənzillərlə təmin ediləcək. Qarabağ qazilərinin fərdi avtomobillərlə təmin olunmasına da xüsusi diqqət yetirilir. Onlara ümumilikdə 7200 avtomobil verilib.

Ölkəmizdə genişmiqyaslı özünüməşğulluq proqramı icra edildiyini bildirən Fəqət Şadlinskaya deyib ki, hər il özünüməşğulluqla məşğul olmaq istəyənlər üçün dövlət tərəfindən vasitələr təqdim olunur. Cari ildə 16 min insanın özünüməşğulluq proqramına cəlb olunması nəzərdə tutulub. Dövlət tərəfindən onlara vasitələr veriləcək və beləliklə, onlar öz gələcək maddi imkanlarını özləri təmin edəcəklər. Özünüməşğulluq proqramına cəlb olunan 16 min nəfər arasında 5 mindən çox şəhid ailələrinin üzvləri və müharibə əlilləri vardır.

Müharibədə əlini, qolunu, ayağını itirmiş hərbçilərimiz üçün ən müasir protezlər sifariş olunub. İkinci Qarabağ müharibəsinin 100-dək qazisi artıq ən yüksək keyfiyyətli, dünyanın aparıcı firmalarının istehsalı olan protezlərlə təmin olunub və bu protezlər onları normal həyata qaytarır. Bütün bu genişmiqyaslı işlər, təşəbbüslərlə bərabər, 8400 nəfərə, müharibədə iştirak edən insanlara sosial ödənişlər verilib.

“Ölkəmizdə reabilitasiya mərkəzlərinin şəbəkəsi genişlənəcəkdir. Artıq bir neçə reabilitasiya mərkəzi yaradılıb və yaralanmış hərbçilərimiz orada öz sağlamlıqlarını bərpa edirlər. Bu, çox genişmiqyaslı, böyük vəsait tələb edən proqramlardır. Ancaq Azərbaycan bunu edir və bundan sonra da edəcəkdir. Bütün şəhid ailələri, Qarabağ qaziləri bilməlidirlər ki, Azərbaycan hökuməti daim onların yanındadır. İlk növbədə, ən həssas kateqoriyadan olan vətəndaşlar dövlət qayğısı ilə əhatə olunurlar. Bu istiqamət üzrə Azərbaycanda aparılan siyasət ən humanist, ən ədalətli və vicdanlı siyasətdir. Vətən uğrunda öz canlarını fəda etmiş qəhrəman övladlarımızın ailə üzvləri dövlət tərəfindən qayğı ilə əhatə olunur. Öz sağlamlığını itirmiş, yaralanmış qazilər bütün dövlət orqanları tərəfindən daim qayğı ilə əhatə olunmalıdır və bu təmin olunur. Azərbaycanda bu sahədə tətbiq olunan prinsiplər öz unikallığı ilə seçilir. Çünki bir çox ölkələrdə müharibələr, münaqişələr olub, ancaq müharibələrdə həyatını itirmiş insanların yaxınlarına bu dərəcədə diqqət göstərilmir”, - deyə Yeni Azərbaycan Partiyası Bərdə rayon təşkilatının sədri vurğulayıb.