İDMAN
Fərid Abbasov: Komandamızın qazandığı uğurlar ölkəmizdə güclü şahmatçı nəslinin yetişdiyini sübut edir
Bakı, 26 dekabr, Leyla Qurbanova, AZƏRTAC
Başa çatmaqda olan 2019-cu il Azərbaycan şahmatı üçün çox uğurlu olub. Dekabrın 25-də Milli Olimpiya Komitəsində 2019-cu ilin idman yekunlarına həsr olunan mərasimdə Azərbaycan Respublikasının Prezidenti, Milli Olimpiya Komitəsinin Prezidenti İlham Əliyev idman nailiyyətləri arasında şahmatçıların uğurlarını xüsusi vurğuladı. Dövlətimizin başçısı görkəmli şahmatçımız Teymur Rəcəbovun Dünya Kubokunun qalibi olmasını tarixi hadisə adlandırdı. Azərbaycan Prezidenti yeniyetmələrdən ibarət şahmat komandamızın Dünya Şahmat Olimpiadasında qazandığı qələbəni də xüsusi qeyd etdi. Şahmatçılarımızın uğurlarına verilən bu yüksək qiymət onları daha böyük qələbələrə ruhlandırır.
Bunu yeniyetmə şahmatçılardan ibarət yığma komandanın baş məşqçisi Fərid Abbasov AZƏRTAC-a məxsusi müsahibəsində bildirib.
Yeniyetmələrdən ibarət komandamızın Olimpiadanın
qalibi olması Azərbaycan şahmatının növbəti böyük uğurudur
Yeniyetmə şahmatçılarımızın Avropa, dünya çempionatlarında, eləcə də beynəlxalq turnirlərdə bir sıra nailiyyətlər qazandıqlarını qeyd edən baş məşqçi bu uğurların əsasında dövlət səviyyəsində idmana göstərilən diqqət və qayğının durduğunu bildirib. Yeniyetmə idmançıların builki uğurlarını qeyd edən F.Abbasov 16 yaşadək şahmatçılardan ibarət komandamızın Dünya Şahmat Olimpiadasında qazandığı parlaq qələbədən danışıb: “On altı yaşadək idmançılardan ibarət “Azərbaycan” komandasının Türkiyənin Çorum şəhərində keçirilən Olimpiadanın qalibi olması şahmat tariximizdə növbəti böyük uğurdur. Azərbaycan komandası ilk dəfə idi ki, Olimpiadanın qalibi adını qazanırdı. Yeniyetmələrdən ibarət komandada ölkəmizi birinci taxtada Məhəmməd Muradlı, ikinci taxtada Aydın Süleymanlı, üçüncü taxtada Əhməd Əhmədzadə, dördüncü taxtada Vüqar Manafov, qızlardan isə Gövhər Beydullayeva təmsil edirdi. A.Süleymanlı həm komandada, həm də öz taxtasında birinci yeri tutdu. Ə.Əhmədzadə isə öz taxtasında ikinci yerə layiq görüldü. Ümumiyyətlə, komandamızın bütün üzvləri yarışda layiqincə mübarizə apardılar.
Olimpiadada Naxçıvan Şahmat Federasiyasının nümayəndələri də iştirak edirdilər. Onlar yarışda çox yaxşı təsir bağışladılar. Komandanın tərkibində mübarizə aparan çox perspektivli şahmatçılardan Xəzər Babazadəni xüsusi qeyd etmək istəyirəm. Komanda Olimpiadada iştirak etməklə böyük təcrübə qazandı.
Aydın Süleymanlı dünya çempionu
olmaqla tarixi nəticəyə imza atdı
Baş məşqçi yeniyetmə şahmatçılarımızın bu ilin ən mötəbər turnirlərindən biri olan dünya çempionatında da böyük uğura imza atdıqlarını bildirib. O, 14 yaşlılar arasında şahmatçımız Aydın Süleymanlının dünya çempionu tutuluna layiq görülməsinin tarixi nəticə olduğunu vurğulayıb: “Aydın Süleymanlı güclü potensiala malik idmançıdır. O, dünya çempionu titulunu qazanmaqla Azərbaycan idmanında tarixi nəticəyə imza atıb. Bu yarışda qızlar arasında Gövhər Beydullayeva 3-4-cü yerləri bölüşüb. G.Beydullayeva Avropa çempionatının qalibi, iki dəfə isə gümüş medalçısı olub. Daha bir idmançımız Ayan Allahverdiyeva da dünya çempionatında medal qazana bilərdi. Ancaq əlavə göstəricilərə görə rəqibləri onu qabaqladılar”.
Yeniyetmə şahmatçılarımız Avropa çempionatında
5 medal qazanıblar
Builki yarışlar arasında yeniyetmə şahmatçılarımızın qitə çempionatında çıxışlarını da gözəl nəticə saymaq olar. Avropa çempionatında əldə edilən 5 medal yeniyetmə şahmatçılar arasında güclü potensiala malik idmançıların yetişdiyini sübut edir. Bu ilin avqustunda Slovakiyanın paytaxtı Bratislavada keçirilən yeniyetmələr arasında Avropa çempionatında istedadlı şahmatçımız Ayan Allahverdiyeva 14 yaşlı qızlar arasında qızıl medal qazanıb. O, ikinci ildir ki, qitə çempionatının qalibi olub. Səkkiz yaşlı qızlar arasında Dinarə Hüseynova birinci, Səadət Bəşirli ikinci, oğlanlar arasında Yusif Kərimli üçüncü yeri tutub. Komandamızın digər üzvü Cahandar Azadəliyev 10 yaşlılar arasında üçüncü yerdə qərarlaşıb. O, ikinci ildir ki, Avropa çempionatından medalla qayıdır. Ötən il idmançımız 8 yaşlılar arasında Avropa çempionu olmuşdu. Komandamızın əldə etdiyi uğurlar Azərbaycanda güclü şahmatçı nəslinin yetişdiyini sübut edir.
Şahmatçılarımızın nailiyyətlərinin dövlət tərəfindən
yüksək qiymətləndirilməsi komanda üçün böyük stimuldur
Fərid Abbasov şahmatçılarımızın bu il klublararası Avropa çempionatında qələbəsini də xüsusi vurğulayıb: “Təmsilçilərimiz A.Süleymanlı və Ə.Əhmədzadə “Vüqar Həşimov” klubunun heyətində də mübarizə apararaq böyük uğur əldə ediblər. Ə. Əhmədzadə öz taxtasında birinci, A.Süleymanlı isə ikinci yeri tutub. Komandamız ilk dəfə iştirak etdiyi klublararası Avropa çempionatında uğurla çıxış edərək ilk onluqda qərarlaşıb”.
Azərbaycan Şahmat Federasiyasının idmançılarımız üçün hər cür şəraitin yaratdığını vurğulayan baş məşqçi qazanılan nailiyyətlərin dövlət tərəfindən yüksək qiymətləndirilməsinin komanda üçün böyük stimul olduğunu bildirib.
“Prezident İlham Əliyev 1997-ci ildə Azərbaycan Milli Olimpiya Komitəsinin Prezidenti seçiləndən sonra Azərbaycanda idmanın inkişafı istiqamətində atılan addımlar bu gün öz bəhrəsini verir. Şahmatda qazanılan nailiyyətlər bir daha sübut edir ki, gənclərimiz nəinki fiziki cəhətdən güclüdür, eyni zamanda, onların intellektual potensialı da çox yüksəkdir. Hər bir ölkənin həyatında çox önəmli rol oynayan idman gənclərin vətənpərvərlik hisslərinin tərbiyəsində böyük əhəmiyyət daşıyır. Azərbaycan gənclərinin əldə etdikləri qələbələr ölkəmizdə milli qüruru, milli ruhu daha da yüksəldir. Məhz bu ruha köklənən yeniyetmə idmançılarımızdan daha böyük qələbələr gözləyirik”, - deyə baş məşqçi vurğulayıb.