REGİONLAR


Fermerlər illik 5 faizlə 200 min manatadək kredit ala bilərlər

Bakı, 4 oktyabr, AZƏRTAC

Artıq aqrar fəaliyyətlə məşğul olan fermerlərin güzəştli kredit əldə etməsi üçün banka getməyə ehtiyac yoxdur. Fermerlər onlayn müraciət etməklə kredit əldə edə bilərlər.

AZƏRTAC xəbər verir ki, bu barədə Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin rəisi Mirzə Əliyev bildirib.

M.Əliyev qeyd edib ki, bununla bağlı Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin saytında yeni platforma yaradılıb.

Sistemdə maliyyə vəsaitinə ehtiyacı olan fermerin elektron formada göndərdiyi müraciət seçdiyi müvəkkil kredit təşkilatı tərəfindən də izlənilir. Layihənin qiymətləndirilməsi aidiyyəti qurumla birgə paralel aparılır. Bu isə əlavə vaxt itkisinin qarşısını alır, sənədləşmə xərclərinin azalmasını və şəffaflığı təmin edir. Müraciət forması “Asan İmza” vasitəsilə həyata keçirilir.

Xidmət rəisi vurğulayıb ki, vətəndaşlardan müəyyən sənədlər, eləcə də biznes plan tələb olunur. Kreditlərin məbləği isə Nazirlər Kabinetinin müvafiq Qərarı ilə tənzimlənir. Belə ki, 5 ilə verilən kreditin maksimim həddi 200.000 manat, orta faiz dərəcəsi isə illik 5 faizdir. Əsas məqsəd aqrar sahə ilə məşğul olan kiçik və orta sahibkarlığa dəstək verməkdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.