REGİONLAR
Fermerlər pambığın əllə yığılmasına üstünlük verirlər VİDEO
Salyan, 20 oktyabr, İsmayıl Cəfərli, AZƏRTAC
Salyanda pambıq tarlalarında məhsul yığımı davam edir. “Ağ qızıl” ustaları məhsulu optimal vaxtda və itkisiz yığmağı qarşılarına məqsəd qoyublar. Pambıqçılar deyirlər ki, bu il ciddi çətinliklərlə üzləşməyiblər.
AZƏRTAC xəbər verir ki, dövlətin pambıq sahəsinə diqqəti və dəstəyi salyanlı fermerləri təsərrüfatın bu növünə marağını ilbəil artırır. Nəticədə bu gün tarlalarda bol məhsul yetişib. Artıq bir neçə vaxtdır ki, salyanlı fermerlər pambıq yığımına başlayıblar. Rayonun Şorsulu kənd sakini Rahil Hüseynov da yüzlərlə belə fermerdən biridir. 25 ildir pambıqçılıqla məşğul olan fermer builki məhsuldarlıqdan razıdır: “Keçən il 23 hektar sahədən 82 ton pambıq yığmışam. Bu il isə 24 hektar pambıq əkmişəm. İnşallah orta hesabla təxminən 40 sentnerə yaxın pambıq gözlənilir. İndiyədək 45 ton pambıq tədarük etmişəm”.
Salyanın Ərəbqardaşbəyli kənd sakini, pambıq ustası İbadət Cəfərov 50 hektara yaxın pambıq sahəsində əkin aparıb. Birinci yığımda 35 sentner məhsul toplayan “ağ qızıl” ustası əsasən pambığın əl dəriminə üstünlük verir. Fermeri narahat edən məsələ pambığın kombayn və əl yığımı ilə aparılmasında qiymət fərqinin olmamasındadır. “Əllə yığılanda məhsuldarlıq daha yüksək olur. Yəni, əllə yığılanda kombayndan fərqli olaraq 50 sentner götürmək çox asandır. Digər ölkələrdə də əl yığımı ilə kombayn yığımı arasında qiymət fərqi var. Əllə yığılan pambıq daha baha qiymətə təhvil verilir. Yaxşı olardı ki, bu, bizdə də nəzərə alınsın. Əgər belə olarsa, insanların dolanışığına da yaxşı təsir edər”, - deyə o əlavə edib.
Fermer sahələrin bir çoxunda məhsulun əllə yığılmasının həm dövlətə, həm fermerə, həm də sakinlərə səmərəli olacağını bildirib. Hazırda onun sahəsində gündə 20-dək pambıqçı çalışır.
Briqadir Səidə Əliyeva ilə söhbət zamanı deyib ki, gündə bir nəfər azı 80-100 kiloqram pambıq yığılır. Əməkhaqları da vaxtında verilir.
Qeyd edək ki, bu il Salyan rayonunda 9285 hektar sahədə pambıq əkini aparılıb. 1485 nəfər istehsalçı 5 şirkətlə müqavilə imzalayıb. Bu günədək 11 min tonadək məhsul toplanaraq tədarük məntəqələrinə təhvil verilib. Bu il salyanlı fermerlər əsasən pambığın “Ceyhan”, “Atlas”, “Lodos”, “Bəyaz Altun 440”, “BİN 10”, “Lazer”, “May”, “Arion” və digər məhsuldar sortlarına üstünlük veriblər. Məhsulun yığılması üçün sahələrə 40-dək kombayn cəlb olunub.
Ümumilikdə, bu günədək sahələrdən kondisiya çəkidə 127 min tona yaxın pambıq yığılaraq tədarük məntəqələrinə təhvil verilib. Məhsul yığımı prosesinə 447 kombayn və 3085 traktor yedəyi cəlb olunub. Bu da məhsulun 100 faizə yaxınını texnika vasitəsilə yığmağa imkan verir.
Dövlət dəstəyinin genişləndirilməsi fermerlərin pambıq əkininə marağını artırıb. Aqrar Subsidiya Şurasının qərarına əsasən, bu ildən tədarük məntəqələrinə təhvil verilən pambığa görə yalnız məhsul subsidiyası verilir. Eyni qərarla məhsul subsidiyasının məbləği hər tona görə 100 manatdan 170 manata qaldırılıb. Kənd Təsərrüfatı Nazirliyinin pambıq tədarükü və emalı müəssisələri ilə apardığı müzakirələr nəticəsində 2022-ci ildə şirkətlər tərəfindən xam pambığın alış qiyməti yanvar və avqust aylarında hər dəfə 50 manat olmaqla iki dəfə artırılıb. Ötən il 1-ci sort pambığın 1 tonu fermerlərdən 700 manata alınırdısa, bu il təhvil verilən eyni sort pambığın 1 tonuna görə fermerlərə 800 manat ödənilir. Məhsul subsidiyasına keçid və pambığın alış qiymətinin artırılması fermerləri aqrotexniki becərməni yüksək səviyyədə aparmağa, bol məhsul götürərək daha çox gəlir əldə etməyə sövq edir.