REGİONLAR
Fermerlərə təkrar əkin üçün subsidiyaların verilməsi bu sahədə canlanmaya səbəb olub VİDEO
Cəlilabad, 15 iyul, İsmayıl Cəfərli, AZƏRTAC
Cəlilabadda təkrar əkin üçün 500 hektara yaxın sahədə qarğıdalı yetişdirmək planlaşdırılıb. Artıq 200 hektar sahədə toxum səpini yekunlaşıb.
AZƏRTAC xəbər verir ki, mövcud torpaq-iqlim şəraiti əkinçilik və suvarma təminatı olan bölgələrdə təkrar əkin işləri aparmağa imkan verir. Sahədən ildə yalnız bir dəfə məhsul götürmək fermerlər üçün əlverişli aqrobiznes mühiti yaratmır. Dən və yaşıl yem istehsalının artırılmasının əsas yolu əlavə ehtiyat mənbəyi kimi təkrar əkin işlərinin aparılmasıdır. Kənd Təsərrüfatı Nazirliyinin 2020-ci ilin məhsulu üçün təkrar qarğıdalı əkini aparan istehsalçılara toxumun alınması məqsədilə birdəfəlik vəsaitin verilməsini təmin etməsi bu sahədə canlanmaya səbəb olub.
Cəlilabad Dövlət Aqrar İnkişaf Mərkəzinin direktoru Rahib Kərimov bildirib ki, hazırda 500 hektara yaxın torpaq sahəsi tam şumlanaraq əkin üçün hazır vəziyyətə gətirilib: “Builki mövsümdə Cəlilabad rayonunda biçənəklərin az olduğu və yaşıl kütlənin olmadığı halda fermerlər kənardan heyvanların yemlənməsini həyata keçiriblər. Bu da baha başa gəldiyindən təkrar əkin onlara sərf edir. Qarğıdalı əkini onların heyvanlarının yaşıl kütlə ilə təmin edilməsi və iqtisadi vəziyyətlərinin yaxşılaşdırılması üçün çox sərfəlidir. Fermerlər hər hektara 60 manat subsidiya alacaqlar”.
Mütəxəssislərin sözlərinə görə, qarğıdalı bitkisinin hansı məqsəd üçün becərilməsindən asılı olaraq, gübrə normaları müəyyənləşdirilir. Bu bitki silos və ya yaşıl kütlə almaq məqsədilə becərilirsə, onda əkin sahəsinin hər hektarına təsiredici maddə hesabı ilə 120-140 kiloqram azot, 90 kiloqram fosfor və 60-90 kiloqram kalium verilməlidir.
Fermer Cəmil Məmmədov deyib: “Arpa sahəsində biçin yekunlaşdıqdan sonra təkrar şum işləri apardıq. Arpa sahəsindən hektara 40 sentner məhsul götürmüşdük. Sevindirici haldır ki, dövlətimiz hektara 60 manat subsidiya verir. Bu da bizi təkrar əkin işləri aparmağa, qarğıdalı əkməyə həvəsləndirir”.
Aqronom Əhmədağa Quliyev suvarma ilə bağlı bəzi problemlərin olduğunu qeyd edib: “Əkdiyimiz sahəni suvarmada çətinliyimiz var. Dövlət tərəfindən bizə dəstək var, subsidiyalar verilir və bu da bizi həvəsləndirir. Ona görə də istəyirik ki, əkin sahələrimizi genişləndirək”.
Cəlilabadın təxminən 8 min hektara yaxın suvarılan torpaqlarının su təminatı Biləsuvar ərazisindən keçən Cənubi-Muğan kanalından ayrılan qol vasitəsilə ödənilir. İdarənin Kanal rəisi Rafiq Rüstəmovun sözlərinə görə, ümumi su qıtlığı ilə əlaqədar kanalın su kubu aşağı düşüb və Cəlilabad rayonunun aran hissələrinə verilən su təminatında problemlər yaranıb. Yaxın iki gündə su kubunun artırılması ilə mülkiyyətçilərin haqlı narahatçılığı aradan götürüləcək.