REGİONLAR


Festival iştirakçıları Qubada ermənilərin törətdikləri soyqırımı haqqında ətraflı məlumatlandırılıblar VİDEO

Quba, 22 iyun , Elxan Yusifli, AZƏRTAC

“Alovlu Qafqaz” II Uşaq–Gənclərin Folklor Rəqs və Yaradıcılıq festivalı çərçivəsində növbəti konsert Qubada təqdim olunacaq.

AZƏRTAC-ın bölgə müxbiri xəbər verir ki, iyunun 22-də rayona gələn festival iştirakçıları ilə icra hakimiyyətində görüş keçirilib. Gürcüstanı, Rusiyanın Şimali Osetiya–Alaniya Respublikasını, eləcə də Azərbaycanın müxtəlif uşaq gənclər inkişaf mərkəzlərini təmsil edən kollektivlərə Quba rayonu haqqında ətraflı məlumat verilib.

Görüşdən sonra Quba Soyqırımı Memorial Kompleksini ziyarət edən qonaqlar 1918-ci ildə cinayətkar erməni hərbi dəstələri tərəfindən törədilmiş soyqırımı qurbanlarının dəfn olunduğu yerdə ucaldılmış abidəni ziyarət edib, qarşısına gül dəstələri düzüblər.

Diqqətə çatdırılıb ki, Heydər Əliyev Fondunun dəstəyi ilə yaradılan Quba Soyqırımı Memorial Kompleksi 2013-cü il sentyabrın 18-də açılıb. Kompleksdə XX əsrin əvvəllərində Quba şəhərinin müxtəlif ərazilərinin görüntüləri, o zaman burada aparılan tikinti-quruculuq işləri, əhalinin həyat tərzi haqqında fotolar var. Burada quraşdırılmış sensor ekranlı monitordakı xüsusi xəritədə ermənilərin ötən əsrdə xalqımıza qarşı respublikamızın müxtəlif bölgələrində həyata keçirdikləri soyqırımı aktları barədə bir neçə dildə məlumat əldə etmək mümkündür.

Bildirilib ki, Quba soyqırımı məzarlığı 2007-ci il aprelin 1-də ərazidə torpaq işləri görülərkən aşkarlanıb. Bundan sonra Azərbaycan Milli Elmlər Akademiyasının Arxeologiya və Etnoqrafiya İnstitutunun əməkdaşları tərəfindən kütləvi məzarlıqda geniş tədqiqat işləri aparılıb. Tədqiqatlar nəticəsində məzarlığın 1918-ci ildə ermənilərin yerli dinc əhaliyə qarşı törətdikləri soyqırımı ilə bağlı olduğu müəyyən edilib.

Təhsil Nazirliyinin dəstəyi ilə keçirilən “Alovlu Qafqaz” II Uşaq –Gənclərin Folklor Rəqs və Yaradıcılıq festivalı çərçivəsində konsert proqramı bu gün saat 17:00-da Quba şəhərindəki “Yaşıl teatr”da təqdim olunacaq. Konsertdə Bakı, Sumqayıt, Quba, Qusar, Goranboy uşaq gənclər inkişaf mərkəzlərini, eləcə də Gürcüstan və Şimali Osetiya–Alaniya Respublikasını təmsil edən rəqs və yaradıcılıq kollektivləri bir-birindən maraqlı çıxışlar edəcəklər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.