İQTİSADİYYAT
Fevralın 22-si avtomobil yolları işçilərinin peşə bayramı günüdür
Bakı, 21 fevral (AZƏRTAC). Fevralın 22-si avtomobil yolları işçilərinin peşə bayramı günüdür. Avtomobil yolları işçiləri ölkəmizdə gedən sosial-iqtisadi inkişafa töhfə verməklə Azərbaycanda yol-nəqliyyat infrastrukturunun formalaşmasında da mühüm rol oynayırlar. İndi ölkəmizdə həyata keçirilən sosial-iqtisadi inkişaf strategiyasının prioritet istiqamətlərindən biri də yol-nəqliyyat infrastrukturunun yenidən qurulmasıdır.
Son illərdə Azərbaycanda aparılan uğurlu islahatlar yol-nəqliyyat sistemində, xüsusilə də avtomobil yolları ilə bağlı bir sıra irimiqyaslı layihələrin reallaşmasına səbəb olmuşdur. Ölkəmizdə yol-nəqliyyat infrastrukturunun yenidən qurulması, inkişafı, müasir tələblərə cavab verən magistral yolların inşası Prezident İlham Əliyevin təsdiqlədiyi “Azərbaycan Respublikasının avtomobil yolları şəbəkəsinin yeniləşdirilməsinə və inkişafına dair (2006-2015-ci illər) Dövlət Proqramı”na uyğun aparılır. Bu proses paytaxtda və bölgələrdə yeni avtomobil yollarının salınması, körpü və keçidlərin tikintisi ilə müşayiət olunur.
Məhz Prezident İlham Əliyevin diqqət və qayğısı sayəsində ölkəmizin avtomobil yolları şəbəkəsinin genişləndirilməsi istiqamətində mühüm tədbirlər həyata keçirilir, bu proses rayon və kənd yollarını da əhatə edir. Daim diqqətdə saxlanılan bu məsələ fevralın 12-də regionların sosial-iqtisadi inkişafı Dövlət Proqramının dördüncü ilinin yekunlarına həsr olunmuş konfransda da xüsusi vurğulanmışdır. Konfransdakı nitqində, ilk növbədə, infrastruktur layihələrinin davam etdirilməsinin vacibliyini diqqətə çatdıran Prezident İlham Əliyev demişdir ki, bu istiqamətdə görülən işlər müsbət qiymətləndirilə bilər və davam etdirilməlidir. Xüsusilə magistral yolların tikintisi və tamamlanması, kənd yollarının təmiri və tikintisi məsələləri ön plandadır. Demək olar ki, kənd yollarının tikintisi indi bütün bölgələrdə geniş vüsət almışdır. Bölgələrdən gələn əhali tərəfindən verilən təkliflər, edilən xahişlər əsasında biz bu layihələri icra edirik. İlk növbədə, biz əhalinin ən çox sıx məskunlaşdığı bölgələrdə, ən çox kəndləri birləşdirən yolları bərpa edirik. Qarşıya məqsəd qoyulubdur ki, bütün kənd yollarımız yüksək səviyyədə təmir edilsin, beləliklə, bu məsələ də öz həllini tapsın.
Göründüyü kimi, qarşıya qoyulan hədəf bəllidir. Bu istiqamətdə reallaşdırılan layihələr də vardır və bu hədəfə çatmaq üçün bundan sonra işlər daha da intensivləşəcəkdir. Ümumiyyətlə, magistral və kənd yollarının təmir-tikintisi bölgələrdə sahibkarlığın, bilavasitə iqtisadiyyatın inkişafına səbəb olacaqdır. Bu isə ölkə iqtisadiyyatının şaxələndirilməsinə əlavə töhfə verəcəkdir.
Paytaxt yollarının yenidən qurulması istiqamətində də mühüm tədbirlər görülür. Yeni yol qovşaqlarının, körpülərin, yeraltı və yerüstü keçidlərin inşası Bakıda tıxac probleminin aradan qaldırılmasında önəmli amildir. Paytaxtda tikilən yeni dairəvi yol bu istiqamətdə nəzərdə tutulan planların həyata keçirilməsində mühüm rol oynayır. Bakının digər istiqamətlərə çıxışları da ən müasir səviyyəli yollar dərəcəsindədir. İndi Azərbaycanın avtomobil yolları işçiləri bir sıra beynəlxalq əhəmiyyətli yolların çəkilməsində böyük əmək sərf edirlər. Bu sırada əsas diqqət çəkən məqamlardan biri Azərbaycanı qonşu ölkələrlə birləşdirən magistral yolların salınmasıdır. Artıq Bakı-Rusiya Federasiyası, həmçinin Bakı-Gürcüstan dövlət sərhədi avtomobil yollarının tikintisi yekunlaşmışdır.
Beləliklə, yol-nəqliyyat infrastrukturunun yaxşılaşdırılması istiqamətində görülən işlər ötən il də davam etdirilmişdir. Ümumiyyətlə, 2012-ci ildə 537,2 kilometr, o cümlədən 134,6 kilometr respublika əhəmiyyətli, 402,6 kilometr yerli əhəmiyyətli yol təmir olunmuş, avtomobil yollarında 25 körpü tikilmişdir. Daxili investisiyalar hesabına Bakı-Ələt avtomobil yolunun 2-4 kilometr hissəsi (Bayraq meydanına gedən yol), Yevlax-Xocalı-Laçın avtomobil yolunun Yevlax-Bərdə hissəsi (29 kilometr), Qusar-Ləzə avtomobil yolu (39 kilometr) və bu yol üzərində ümumi uzunluğu 318 metr olan 8 körpü tikilərək, Saatlı-Musalı-Mərzəli avtomobil yolunda Araz çayı üzərindəki körpü (238,8 metr) yenidən qurularaq istismara verilmişdir.
Daxili investisiya hesabına 2012-ci ildə respublika əhəmiyyətli Gəndob-Rusiya Federasiyası ilə dövlət sərhədi yeni avtomobil yolunun tikintisi, Bakı-Ələt yolunun 50-69-cu kilometr sahələrinin, Qəbələ-Ağdaş, Ağstafa-Poylu-Gürcüstan ilə dövlət sərhədi avtomobil yollarının yenidən qurulması, Ələt-Hacıqabul, Qəbələ-Oğuz, Goran–Naftalan, M-2 (336 kilometr)-Gəncə, Bəhramtəpə-Biləsuvar, Kürdəmir–İmişli, Bərdə-Tərtər avtomobil yollarının əsaslı təmiri layihələri üzrə tikinti işləri davam etdirilmişdir.
Həyata keçirilən tədbirlər bununla yekunlaşmamış, yeni layihələr üzərində də iş aparılmışdır. Belə ki, “Yaraq Qazmalar” (Rusiya Federasiyası)-“Samur” (Azərbaycan Respublikası) sərhəd buraxılış məntəqəsində yerləşən “Samur” Baş Hidroqovşağındakı hidrotexniki qurğuların texniki vəziyyətinin yoxlanılması və sınaq işlərinin aparılması, habelə hidrotexniki qurğu üzərindəki avtomobil körpüsünün yenidən qurulması, Samur-Şirvanovka və Çuxuroba-Şirvanovka-Zuxuloba avtomobil yollarının əsaslı təmiri istiqamətində layihə-smeta sənədlərinin hazırlanması və tikinti işlərinə başlanılması üçün hazırlıq işləri görülmüşdür.
Yerli əhəmiyyətli yollara gəldikdə isə, Quba-Qəçrəş və M-2 (482 kilometr)-Salahlı-Aslanbəyli-Kəmərli yollarının əsaslı təmiri layihələri başa çatdırılmış, Xocasən–Lökbatan, Cəlilabad–Yardımlı, Qəbələ-Küsnət-Laza avtomobil yolunun yenidən qurulması, İsmayıllı–Lahıc, Şamaxı–Göylər çöl–Padar, Şəki-Qax-Zaqatala yolunun Şəki-Qax sahəsinin əsaslı təmiri layihələri üzrə tikinti işləri davam etdirilmişdir.
Həmçinin Gədəbəy–Qızıl torpaq-Qonaqlı yolunda Fındıqlı çayı üzərində körpünün yenidən qurulması, Bakı-Rusiya Federasiyası ilə dövlət sərhədi avtomobil yolunun 89-cu kilometrində yol ötürücüsünün tikintisi, Şəki-Kiş avtomobil yolunda Kiş çayı üzərində qəza vəziyyətində olan mövcud körpünün aşırım qurğusunun bərpası başa çatdırılmışdır.
Bakı şəhərində isə ötən il 94 kilometr avtomobil yolu, prospekt və küçə təmir olunmuş və 6 yeraltı piyada keçidi istismara verilmişdir. Bakı şəhərində nəqliyyatın hərəkətinin tənzimlənməsində mühüm əhəmiyyət kəsb edən Neftçilər prospektinin və Sabunçu körpüsündən Zabrat dairəsinədək yolun yenidən qurulması işləri başa çatdırılmışdır.
Beləliklə, Azərbaycanın hər bir yerində abadlıq və quruculuq işlərinin aparılması Prezident İlham Əliyevin yürütdüyü siyasətin mühüm hədəflərindəndir. Dövlətimizin başçısının tapşırıqlarına əsasən ölkənin yol-nəqliyyat infrastrukturunun yaxşılaşdırılması istiqamətində həyata keçirilən tədbirlər silsiləsinə daha yeniləri əlavə olunur. Bütün bu işlər isə ölkə iqtisadiyyatına əlavə imkanlar yaradır.