Bakı, 6 noyabr, AZƏRTAC

Noyabrın 6-da Bakıda "Bitki və bitkiçilik məhsullarının göndərilməsinin ixrac sertifikatı" üzrə təlim başlayıb.

Dövlət Gömrük Komitəsinin (DGK) mətbuat və ictimaiyyətlə əlaqələr idarəsindən AZƏRTAC-a bildiriblər ki, təlim BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələndirmə ofisinin həyata keçirdiyi "Azərbaycanda Fitosanitar Nəzarətin və Diaqnostik Xidmətlərin Gücləndirilməsi" layihəsi çərçivəsində təşkil olunub.

Dövlət Gömrük Komitəsi, Kənd Təsərrüfatı Nazirliyi və Qida Təhlükəsizliyi Agentliyinin 40-dan çox müfəttişinin iştirak etdiyi təlimdə əsas məqsəd bitki və bitkiçilik məhsullarının ixracı ilə əlaqədar beynəlxalq və milli qanunvericiliyin daha dərindən mənimsənilməsi, bu sahədə bilik və bacarıqların artırılmasıdır.

Təlimin açılış mərasimində çıxış edən Qida Təhlükəsizliyi Agentliyi Bitki sağlamlığı və fitosanitar nəzarət şöbəsinin müdiri Xəyalə Dadaşova bildirib ki, son illər ölkədə həyata keçirilən iqtisadi islahatlar, o cümlədən kənd təsərrüfatı və qida sənayesi sektorunda müasir standartların tətbiqi yerli istehlakçıların hüquqlarının müdafiəsinə və idxal prosesi zamanı qida məhsullarının təhlükəsizliyinin təmininə nəzarət imkanlarını genişləndirib. Əhalinin sağlam və təhlükəsiz qida məhsulları ilə təmin edilməsinin qarşıda duran əsas vəzifə olduğunu bildirən şöbə müdiri, ölkəyə təhlükəsiz və beynəlxalq standartlara uyğun qida məhsullarının idxal edilməsinin qida təhlükəsizliyinin təmin olunmasında mühüm əhəmiyyət daşıdığını deyib. Daxili bazarın zərərli qida məhsullarından qorunması işində Dövlət Gömrük Komitəsinin fəaliyyətini dəyərləndirən Xəyalə Dadaşova ölkənin gömrük sərhədində müvafiq prosedurların lazımi səviyyədə aparıldığını da söyləyib.

FAO-nun Azərbaycandakı Tərəfdaşlıq və Əlaqələndirmə Ofisinin rəhbəri Mələk Çakmak layihə çərçivəsində əldə edilən uğurlar və qarşıda duran vəzifələrdən söhbət açıb. Qeyd edilib ki, fitosanitar nəzarətin və diaqnostik xidmətlərin gücləndirilməsi layihəsi qida təhlükəsizliyinin dayanıqlı inkişafı üçün xüsusi önəm daşıyır. Ofisin rəhbəri mövzu ilə bağlı bu ilin dekabrında Latviya və Sloveniyada növbəti təlimlərin keçiriləcəyini və Azərbaycan mütəxəssislərinin də bu təlimlərdə iştirakının onların bilik və bacarıqlarının artırılmasında mühüm rol oynayacağını bildirib.

DGK Gömrük-Sərhəd Buraxılış Məntəqələrinin İşinin Təşkili Baş İdarəsinin rəisi Şahin Ələsgərov qeyd edib ki, Azərbaycan Prezidenti İlham Əliyev tərəfindən həyata keçirilən davamlı iqtisadi inkişaf strategiyasının əsas istiqamətlərindən biri kənd təsərrüfatının inkişafına nail olmaqdır və bu sahədə görülən tədbirlər çərçivəsində kənd təsərrüfatı məhsullarının istehsalı və ixracı sürətlə artır. Mal və nəqliyyat vasitələrinin sərhədkeçmə prosesinin sürətli və asan şəkildə həyata keçirilməsi üçün fitosanitar nəzarətin düzgün və səmərəli təşkilinin vacib olduğunu vurğulayan Baş İdarənin rəisi bu sahədə gömrük orqanları tərəfindən atılan addımlar barədə məlumat verib, FAO ilə əməkdaşlığın ölkəmizin gömrük orqanları üçün faydalı olduğunu diqqətə çatdırıb. Layihənin əhəmiyyətinə toxunan Şahin Ələsgərov onu da bildirib ki, bu cür təlimlər regional səviyyədə ticarət imkanlarının genişlənməsinə və qida təhlükəsizliyinin təmin edilməsinə müsbət təsir göstərir, təşkilatlar arasında əməkdaşlığı gücləndirir.

Daha sonra layihə rəhbəri Rinqolds Arnitis iştirakçıları təlimin iş planı ilə tanış edib, onlar üçün nəzərdə tutulan nəzəri və əməli məşğələlər barədə məlumat verib.

Sonra seminar işə başlayıb.

Təlim zamanı iştirakçılar ixrac təftişinə hazırlıq, sənədlərin yoxlanılması, bitki sağlamlığı-fitosanitariyanın beynəlxalq çərçivəsi, "Bitki mühafizəsi haqqında" Beynəlxalq Konvensiya, Ümumdünya Ticarət Təşkilatının Sanitar və Fitosanitar Tədbirlərin tətbiqi üzrə Sazişi, ixrac sertifikasiyası üzrə fitosanitar qanunvericilik, milli bitkiqoruma təşkilatlarının ixrac sertifikatı ilə əlaqədar vəzifələri, müfəttişin ixrac sertifikasiyası ilə əlaqəli məsuliyyətləri və digər mövzularda bilik və bacarıqlarını təkmilləşdirmək imkanı qazanacaqlar.

Təlim noyabrın 8-dək davam edəcək.