İDMAN
Formula 1 Azərbaycan Qran-Prisi pilotların və komanda rəsmilərinin gözü ilə (III hissə)
Bakı, 5 may, AZƏRTAC
Aprelin 27-29-da Azərbaycan üçüncü dəfə Formula 1 Azərbaycan Qran-Prisinə yüksək səviyyədə ev sahibliyi etdi. Formula 1 üzrə hazırkı dünya çempionatının Bakıda keçirilən dördüncü mərhələsi – Azərbaycan Qran-Prisi haqqında pilotlar və komanda rəhbərləri öz təəssüratlarını bölüşüblər.
AZƏRTAC Formula 1 Azərbaycan Qran-Prisində iştirak edən pilotların və komandaların nümayəndələrinin Bakıdakı yarışla bağlı təəssüratlarını təqdim edir.
 |
“Williams” komandasının texniki direktoru Paddi Lou: “Pilotumuz Sergey Sirotkinin yürüşü başa vura bilməməsi bizi çox üzdü. Azərbaycan Qran-Prisi qəzalarla bol yürüş oldu. Digər pilotumuz Lens Stroll qəzalardan qurtulmağı bacardı və yürüşü səkkizinci pillədə başa vurdu. |
Bir tərəfdən, Lens Strollun çıxışından razı qaldım, digər tərəfdən isə daha çox xal qazana bilmədiyimiz üçün məyus oldum. Cari mövsüm ilk xalımızı Bakıda qazandıq və ümid edirəm ki, digər Qran-prilərdə də fərqlənməyi bacaracağıq”.
 |
Bakı şəhər halqasında yarışı səkkizinci başa vuran “Williams”ın pilotu Lens Stroll: “Bakı yürüşü müqayisəolunmaz bir yarış oldu. Güclü külək bolidləri idarə etməkdə bizə çətinlik yaradırdı. Bu, mənim üçün yeni təcrübə idi. Mən səkkizinci pillədəki mövqeyimlə razıyam və bunu uğurlu nəticə hesab edirəm.
|
Əminliklə deyə bilmərəm ki, İspaniya Qran-Prisində bu uğurumu təkrarlaya biləcəyəm. Problemləri mütəmadi olaraq aradan qaldırmaq lazımdır. Bütün çətinlikləri başa düşür və bunların həll olması üçün lazımi addımlar atırıq”.
 |
“Toro Rosso” komandasının rəhbəri Frants Tost: “Bakı yürüşü komandamız üçün çox çətin keçdi. Ancaq sevindirici məqamlar da oldu. Pilotumuz Brendon Hartlini Formula 1 yarışında ilk xallarını qazandığına görə təbrik etdik. Bilirdik ki, Azərbaycan Qran-Prisi asan olmayacaq.
|
Ancaq Bakıdakı çıxışımız gözlədiyimiz kimi olmadı. Növbəti yarışlarda uğurlu nəticələr əldə etməyimiz üçün komanda öz üzərində çox ciddi çalışmalıdır”.
 |
Azərbaycan Qran-Prisində onuncu yeri tutan “Toro Rosso”nun pilotu Brendon Hartli: “Çox maraqlı yürüş oldu. Yarış boyu qəzalardan qaçmağa çalışdım. Yüksək yerlərdə qərarlaşmaq üçün bolidim yetərincə sürətli deyildi. Mənim üçün yarışı başa vurmaq önəmli idi. Bəzən sürətim lazımi səviyyədə idi.
|
Ancaq “UltraSoft” təkərlərlə güclü rəqiblərimlə mübarizə apara bilmirdim. Mən daha çox ötmə əməliyyatı etmək istəyirdim. Bütün bunlara baxmayaraq, Bakı şəhər halqasında xal qazandığım üçün xoşbəxtəm. Bu uğuru daha da yaxşılaşdırıb növbəti yürüşlərdə yüksək mövqelərdə yer almaq istəyirəm”.
|
|
“Haas F1” komandasının rəhbəri Günter Ştayner: “Yürüşün nəticəsi məni çox məyus etdi. Bizim üçün çətin həftəsonu oldu. Pilotlarımız uğursuz çıxış etdi və xal qazana bilmədik”. |
 |
Azərbaycan Qran-Prisində 13-cü olan “Haas F1”in pilotu Kevin Maqnussen: “Dörd Qran-Pridir uğursuz çıxış edirik. Ancaq bizim maşınımız rəqabətədavamlıdır. Cari mövsümün ortalarında maşının sürətini nümayiş etdirə biləcəyimizə əminəm. Bolidlərimizlə hər yürüşdə xal qazana bilərik.
|
Bunun üçün biz yürüş zamanı problemlərdən qaçmalıyıq. Mövsüm çox çətin başladı. Biz səhvlərimiz üzərində işləyib gələcəkdə bir daha onları təkrarlamamalıyıq”.
