İDMAN


Formula 1 Azərbaycan Qran-Prisinə hazırlıq çərçivəsində tikinti işlərinə start verilib

Bakı, 15 aprel, AZƏRTAC

Bakı Şəhər Halqası Əməliyyat Şirkəti (BŞH) ölkəmizdə keçiriləcək Formula 1 Azərbaycan Qran-Prisinə hazırlıq çərçivəsində trekin əhatə etdiyi ərazilərdə tikinti-quraşdırma işlərinə start verib.

BŞH-dən AZƏRTAC-a bildiriblər ki, yarış zamanı vətəndaşların və sürücülərin təhlükəsziliyini təmin etmək məqsədi ilə istifadə olunan beton blokların quraşdırılması gecə saatlarında həyata keçirilir. Tikinti-quraşdırma işləri Xəqani küçəsi və Bülbül prospektinin kəsişməsindən başlayıb və bütün yarış trekini əhatə edəcək.

Ötən ildən fərqli olaraq builki yarış tamaşaçıların iştirakı ilə keçiriləcəyi üçün artıq Bulvar ərazisində tribunaların quraşdırılmasına da başlanılıb.

Bu gündən Paddok ərazisində infrastrukturun quraşdırılması işlərinə də start verilir.

İyunun 10-12-də Bakı şəhər halqasında təşkil olunacaq yarış üçün nəzərdə tutulan biletlərin qiyməti yerli azarkeşlərə birgünlük ayaqüstü zonada 90-160, tribunalara üçgünlük 280-970, uşaqlar üçün (16 yaşadək) isə 190-690 manat arasında dəyişir.

Biletləri “28 Mall”, “Gənclik Mall” ticarət mərkəzləri, Heydər Əliyev Sarayının kassası, 4 saylı Bakı “ASAN xidmət” mərkəzi və 1 saylı Sumqayıt regional "ASAN xidmət" mərkəzindən əldə etmək mümkündür.

 

 

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.