İDMAN


Fövqəladə Hallar Nazirliyinin qurumları arasında voleybol çempionatı keçirilib

Bakı, 26 oktyabr, Nicat Məmmədov, AZƏRTAC 

Oktyabrın 22-dən 26-dək Fövqəladə Hallar Nazirliyinin (FHN) İdman-Sağlamlıq Klubu və FHN işçilərinin həmkarlar İttifaqının birgə təşkilatçılığı ilə nazirliyin qurumları arasında Azərbaycan Xalq Cümhuriyyətinin 100 illiyinə həsr olunmuş voleybol üzrə çempionat keçirilib.

AZƏRTAC xəbər verir ki, çempionatın ilk üç günü FHN-in Tikintidə Təhlükəsizliyə Nəzarət Dövlət Agentliyinin (TTNDA) idman zalında, yarımfinal və final mərhələsi isə Azərbaycan Voleybol Federasiyasında təşkil olunub. Yarışda 150-yə yaxın idmançının təmsil olunduğu 13 komanda öz qüvvəsini sınayıb.

Gərgin idman mübarizəsi şəraitində keçən yarışın final görüşü Nazirliyin Tikintidə Təhlükəsizliyə Nəzarət Dövlət Agentliyi və Dövlət Yanğından Mühafizə Xidmətinin komandaları arasında oynanılıb. Rəqibini məğlub edən Tikintidə Təhlükəsizliyə Nəzarət Dövlət Agentliyinin komandası birinci, Dövlət Yanğından Mühafizə Xidmətinin komandası ikinci, FHN-in Akademiyasını məğlub edən Xüsusi Riskli Xilasetmə Xidmətinin komandası isə üçüncü yerə layiq görülüb.

Tədbirdə çıxış edən Fövqəladə Hallar Nazirliyi işçilərinin Həmkarlar İttifaqının sədri Mehman İsmayılov yarışın Azərbaycan Xalq Cümhuriyyətinin 100 illiyinə həsr olunmasının əhəmiyyətindən danışıb, komandaları təbrik edib və onlara uğurlar arzulayıb.

Sonda qalib komandalara kubok, medallar, diplomlar və qiymətli hədiyyələr təqdim edilib.

Qeyd edək ki, yarışın baş hakimi Səbuhi Əliyev olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.