Bakı, 13 may, AZƏRTAC

Fransa ilə enerji sahəsində əməkdaşlığın inkişafı üçün kifayət qədər imkanlar və yeni investisiyaların cəlbi baxımından əlverişli şərait var.

Energetika Nazirliyindən AZƏRTAC-a bildirilib ki, bu fikir nazirlikdə keçirilən Fransanın “MEDEF İnternational” təşkilatının nümayəndə heyəti ilə görüşdə səsləndirilib. Enerji sahəsində əməkdaşlığın yeni istiqamətləri üzrə fikir mübadiləsi aparılın görüşdə energetika nazirinin müavini Natiq Abbasov Azərbaycanla Fransa arasında münasibətlərin yüksək səviyyədə olduğunu vurğulayıb. Nazir müavini bu əlaqələrin bir çox sahələrdə, eləcə də energetika sahəsində dinamik əməkdaşlıqla müşayiət olunduğunu deyib.

Fransa şirkətlərinin Azərbaycanın neft-qaz, neft məhsulları sənayesində yaxından iştirakı diqqətə çatdırılıb. Enerji sahəsində 20 illik əməkdaşlıq müddətində Fransanın “Total”, “ENGİE” və digər şirkətləri ilə mühüm nailiyyətlərin əldə edildiyi vurğulanıb. N.Abbasov Azərbaycanın neft ölkəsi kimi keçdiyi tarixi mərhələlərdən danışıb. Azərbaycanın qaz ixrac edən ölkəyə çevrilməsinin yaratdığı imkanlardan, eləcə də “Cənub Qaz Dəhlizi” layihəsinin həyata keçirilməsi ilə Azərbaycan qazının Avropa bazarlarına çıxarılmasından bəhs edib. Nazir müavini deyib ki, “Şahdəniz” yatağının işlənməsinin ikinci mərhələsindən (Mərhələ-2) hasil ediləcək qazın 9 şirkət arasında ən böyük alıcısı məhz Fransanın “ENGİE” şirkətidir. O, Azərbaycanın enerji sisteminin gücünün və elektrik enerjisi istehsalının həcminin daxili tələbatı təmin etməklə bərabər, ixrac potensialını formalaşdırdığını da qeyd edib. Alternativ və bərpa olunan enerji mənbələrindən istifadənin hazırda əsas prioritetlərdən olduğunu bildirib. Bu məqsədlə görülən işlər haqqında danışan N.Abbasov qeyd edib ki, Fransa ilə enerji sahəsində əməkdaşlığın inkişafı üçün kifayət qədər imkanlar və yeni investisiyaların cəlbi baxımından əlverişli şərait var.

Nümayəndə heyətinə rəhbərlik edən MEDEF-in biznes şurasının prezidenti, SUEZ qrupunun baş direktorunun müavini xanım Mari-Anj Döbon elektroenergetika sektorunun özəlləşdirilməsi ilə bağlı Azərbaycanın hər hansı planlarının olub-olmaması ilə maraqlanıb.

N.Abbasov elektrik enerjisi şəbəkələrinin tam yenidən qurulması, enerji itkilərinin azaldılması və enerji səmərəliliyinə nail olduqdan sonra bu istiqamətdə konkret addımların atılmasını istisna etməyib. Onun sözlərinə görə, hazırda istilik elektrik stansiyalarının idarəetməyə verilməsi məsələsi müzakirə edilir.

ENGİE şirkətinin icraçı direktoru, xanım Heike Liebold özəlləşdirmə ilə bağlı “Yol xəritəsi”nin hazırlanmasında şirkətin xidmətlərini təklif edib.

“TOTAL”ın Azərbaycan, Qazaxıstan və Tacikistan üzrə vitse-prezidenti Thierry Darrigrand isə “Abşeron” yatağında görülən işlərdən danışaraq, hasil ediləcək qazın satışı sahəsində dəstəyə ehtiyac olduğunu bildirib.

Nazir müavini TANAP və TAP-ın ötürücülük gücünün gələcəkdə Abşeron qazının da bu kəmərlərə ixracına imkan yaradacağını diqqətə çatdırıb.

SUEZ şirkətinin təmsilçisi isə tullantılardan metan qazının alınması istiqamətində həyata keçirdikləri layihənin əhəmiyyətindən danışıb.

Daha sonra qarşılıqlı maraq doğuran digər bir sıra məsələlər ətrafında fikir mübadiləsi aparılıb.