CƏMİYYƏT


Fransız yazıçı: Azərbaycan xalqı zəngin milli-mənəvi dəyərlərinə bağlıdır

Bakı, 23 iyul, AZƏRTAC 

Dini Qurumlarla İş üzrə Dövlət Komitəsinin sədri Mübariz Qurbanlı iyulun 23-də fransız yazıçısı, “Beynəlxalq Reyn Dərnəyi”nin prezidenti Jerar Kardon ilə görüşüb.

Komitənin mətbuat xidmətindən AZƏRTAC-a bildiriblər ki, komitə sədri Mübariz Qurbanlı ölkəmizdəki tolerant və multikultural mühit barədə söz açıb. O, bu gün dünya miqyasında demokratik dəyər kimi təbliğ olunan tolerantlığa xalqımızın təkcə hüquq yox, həm də mənəvi dəyər prizmasından yanaşdığını diqqətə çatdırıb. Komitə sədri ölkəmizdə dinindən və milli mənsubiyyətindən asılı olmayaraq, hər kəsin hüquqlarının qanunla qorunduğunu vurğulayıb.

Azərbaycanda bütün dini azadlıqların təmin edildiyini bildirən Mübariz Qurbanlı qonağı ölkəmizdə 2250 məscid, 14 kilsə, 7 sinaqoqun olması, 31-i isə qeyri-islam olmaqla 835 dini icmanın dövlət qeydiyyatına alınması barədə məlumatlandırıb. O, ümummilli lider Heydər Əliyevin dövlət-din münasibətləri sahəsində bünövrəsini qoyduğu siyasətin onun layiqli siyasi varisi Prezident İlham Əliyev tərəfindən uğurla davam etdirildiyini deyib.

Heydər Əliyev Fondunun təşkilatçılığı ilə “Azərbaycan Parisin ürəyində” adlı layihə çərçivəsində Parisdə həyata keçirilən “Dini tolerantlıq: Azərbaycanda birgə yaşamaq mədəniyyəti” mövzusunda keçirilmiş konfransı məmnunluq hissi ilə xatırladan M.Qurbanlı ölkəmizdə tolerantlıq ənənələrinin qorunmasına və təbliğinə böyük həssaslıq nümayiş etdirildiyini bildirib.

Görüş zamanı Ermənistan-Azərbaycan, Dağlıq Qarabağ münaqişəsindən danışan Mübariz Qurbanlı qeyd edib ki, Azərbaycan torpaqlarının iyirmi faizinin Ermənistan tərəfindən işğalı nəticəsində bir milyondan çox soydaşımız doğma yurdlarından didərgin düşüb, dini-tarixi abidələr, o cümlədən məscidlər, ziyarətgahlar erməni vandalizminə məruz qalıb.

Azərbaycana hər səfərində davamlı inkişafın şahidi olduğunu vurğulayan fransız yazıçısı Jerar Kardon ölkəmizdəki tolerantlıq mühitini təqdirəlayiq hal kimi qiymətləndirib. O, xalqımızın zəngin milli-mənəvi dəyərlərinə, onun tərkib hissəsi olan dözümlülük və birgəyaşayış ənənəsinə bağlı olduğunu vurğulayıb.

Görüşdə Azərbaycanda dini icmalara göstərilən diqqət və qayğı, eləcə də Azərbaycan-Fransa dostluq əlaqələri haqqında qarşılıqlı fikir mübadiləsi aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.