REGİONLAR
Freyd Loran: Ümumdünya Şahmat Olimpiadasının təşkilatçıları mükəmməl iş görüblər
Naxçıvan, 7 oktyabr, Rauf Kəngərli, AZƏRTAC
Düşünürəm ki, Naxçıvanda təşkil edilən on altı yaşadək yeniyetmələr arasında Ümumdünya Şahmat Olimpiadasında hər şey öz qaydasındadır. Burada hərtərəfli şərait yaradılıb. Nəticədə, biz şahmat taxtaları üzərində əla müdafiə oyunları izləyirik.
Bu sözləri AZƏRTAC-ın Naxçıvan bürosuna müsahibəsində Beynəlxalq Şahmat Federasiyasının baş hakimi, o cümlədən olimpiadanın baş hakimi Freyd Loran deyib.
Freyd Loran qeyd edib ki, bu günədək beş oyun keçirilib və hər şey qaydasındadır. Burada Naxçıvanın yeniyetmə şahmatçıları da mübarizə aparırlar ki, bu da muxtar respublika şahmatçıları üçün bir motivasiyadır. Olimpiadada Amerika, Asiya qitələrindən 16 yaşadək uşaqlardan ibarət komandalar da iştirak edir.
“Fikrimcə, olimpiadada çox güclü komanda var. Onlar arasında Azərbaycan, Türkiyə, İran və Özbəkistanın adını çəkə bilərəm. İstənilən halda nəticələri sonda - doqquzuncu turdan sonra biləcəyik. Qalib də bundan sonra müəyyənləşəcək”, – deyən olimpiadanın baş hakimi bildirib ki, vaxtı olmadığına görə Naxçıvan şəhəri ilə yaxından tanış ola bilməyib. Amma muxtar respublika ilə tanış olmağı səbirsizliklə gözləyir.
Freyd Loran deyib: “On altı yaşadək yeniyetmələr arasında Ümumdünya Şahmat Olimpiadasının təşkilatçıları mükəmməl iş görüblər. Buna görə də biz və şahmatçılar özlərini çox rahat hiss edirlər”.