İDMAN
Futbol üzrə dünya çempionatının altıncı günündə üç oyun keçiriləcək
Bakı, 19 iyun, AZƏRTAC
İyunun 19-da – futbol üzrə XXI dünya çempionatının altıncı günündə üç oyun keçiriləcək.
AZƏRTAC xəbər verir ki, gün ərzində “H” qrupundakı milli komandalar görüşəcəklər. Bu qrupdakı komandalardan Kolumbiya ilə Yaponiya və Polşa ilə Seneqal üz-üzə gələcəklər. Günün sonuncu oyununda mundialın “A” qrupunda yer alan ev sahibi Rusiya millisi Misir yığması ilə qarşılaşacaq. Rusiya-Misir oyunu mundialın ikinci turunun ilk oyunu olacaq. “A” qrupunun birinci turunda Rusiya Səudiyyə Ərəbistanını 5:0 hesabı ilə məğlub edib. Misir yığması isə Uruqvay millisinə minimal hesabla məğlub olub.
Günün ilk oyunu - Kolumbiya - Yaponiya qarşılaşması Bakı vaxtı ilə saat 16:00-da start götürəcək. Görüş “Mordoviya Arena”da oynanılacaq.
Bu komandaların ilk görüşü 2014-ci ildə Braziliyadakı mundialda baş tutub. Həmin mundialda “C” qrupunda mübarizə aparan hər iki komandanın görüşündə kolumbiyalılar 4:1 hesabı ilə qalib gəlmişdilər.
Mundiallarda 1962-cı ildə debüt edən Kolumbiya millisi dünya çempionatlarında indiyədək altı dəfə oynamaq hüququ qazanıb. Bu komandanın çempionatlarda ən yaxşı göstəricisi “Braziliya 2014”ə təsadüf edib. Həmin mundialda dörddəbir finaladək irəliləyən Kolumbiya yığması ev sahiblərinə 1:2 hesabı ilə məğlub olaraq mübarizəni dayandırıb. Kolumbiya milli komandasının tarixində ən çox qol vuran futbolçu Radamel Falkaodur. Futbolçu 66 oyunda 26 qola imza atıb. Bu komandanın heyətində ən çox oyun keçirmiş futbolçu isə FIFA-nın “XX əsrin 100 əfsanəvi futbolçusu” siyahısına daxil olan qapıçı Karlos Valderramadır (111 oyun).
Yaponiya yığması bundan əvvəl üç dəfə mundiallarda çıxış etmək hüququ qazanıb. Gündoğar ölkə təmsilçilərinin ən uğurlu çıxışı 2002-cı ildə Koreya Respublikası ilə birgə ev sahibliyi etdikləri dünya çempionatında olub. Həmin mundialda qrup birincisi kimi səkkizdəbir finala yüksələn yaponiyalılar Türkiyə millisinə 0:1 hesabı ilə məğlub olaraq mübarizəni dayandırıblar.
Günün ikinci oyunu saat 19:00-da Moskvadakı “Spartak” stadionunda başlayacaq. Mundialın birinci turunun sonuncu oyununda Polşa və Seneqal milliləri ilə qarşılaşacaq.
Polşa millisi yeddi dəfə mundiallarda iştirak hüququ qazanıb. Polşalılar dünya çempionatlarının ikiqat bürünc mükafatçılarıdır (1974, 1982). Polşa millisinin əsas qol silahı sayılan Robert Levandovski 91 qolla ən çox fərqlənən oyunçu kimi milli komandanın tarixinə düşüb.
Seneqal millisinin dünya çempionatlarının final mərhələsi ilə tanışlığı 2002-ci ildə baş verib. Afrika təmsilçisinin ən uğurlu çıxışı da məhz həmin çempionatda olub. Həmin mundialın açılış matçında dünya çempionu Fransanı məğlubiyyətə uğradan və dörddəbir finaladək irəliləyən Seneqal yığmasının qarşısını Türkiyə millisi kəsib.
Bakı vaxtı ilə saat 22:00-da başlayacaq üçüncü qarşılaşma “Sankt-Peterburq Arena”da oynanılacaq. İkinci turun ilk oyununda ev sahibi Rusiya yığması Misir millisi ilə üz-üzə gələcək.
Rusiya millisi dünya çempionatlarının final mərhələsində 1994-cü, 2002-ci və 2014-cü illərdə çıxış edib. Misir yığması isə 1934-cü və 1990-cı illərdəki mundiallardan sonra üçüncü dəfədir dünya çempionatlarında iştirak hüququ qazanıb.
Kolumbiya–Yaponiya oyunu saat 16:00-da İdman Azərbaycan və İctimai Televiziya vasitəsilə birbaşa yayımlanacaq. Polşa-Seneqal qarşılaşması saat 19:00-da İdman Azərbaycan kanalında futbolsevərlərə təqdim olunacaq. Azərbaycanlı azarkeşlər Rusiya-Misir qarşılaşmasına İctimai Televiziya və İdman Azərbaycan kanallarında baxa biləcəklər.