REGİONLAR
Füzuli, Şirvan və İmişli məktəbliləri Zaqatalaya ekskursiyalarını başa çatdırıblar
Zaqatala, 19 noyabr, Mustafa Dadaşov, AZƏRTAC
“Ölkəmizi tanıyaq” maarifləndirici tur-aksiyası çərçivəsində Qəbələ-Şəki-Zaqatala-Qəbələ marşrutu üzrə ekskursiyaya çıxan Füzuli, Şirvan və İmişli məktəbliləri noyabrın 19-da, günün ikinci yarısında Zaqatala rayonuna gəliblər.
AZƏRTAC xəbər verir ki, tur-aksiya iştirakçıları Zaqatala şəhərindəki Heydər Əliyev Mərkəzinin qarşısında rayonun rəhbər işçiləri tərəfindən mehribanlıqla qarşılanıblar.
Rayon icra hakimiyyəti başçısının müavini Vəfa Süleymanova məktəblilərə Zaqatalanın tarixi, coğrafi mövqeyi, mədəniyyəti və turizm potensialı barədə məlumat verib. Bildirilib ki, Böyük Qafqaz sıra dağlarının cənub yamaclarında yerləşən, 126 min nəfər əhalisi olan Zaqatala rayonunda 20-dən çox xalqın nümayəndəsi yaşayır. Rayon ərazisində dövlət qeydiyyatına alınan 108 tarixi abidə var.
Heydər Əliyev Mərkəzində fəaliyyət göstərən rəqs dərnəyinin üzvləri tur-aksiya iştirakçıları qarşısında milli rəqslər ifa ediblər.
Sonra məktəblilər Mərkəzlə yaxından tanış olublar. Məlumat verilib ki, 2008-ci ildən fəaliyyət göstərən Heydər Əliyev Mərkəzinin yeni binası 2015-ci ilin noyabrında istifadəyə verilib. Binanın açılış mərasimində Azərbaycan Prezidenti İlham Əliyev iştirak edib. İkimərtəbəli binada müxtəlif təyinatlı bölmələr fəaliyyət göstərir. Binanın birinci mərtəbəsindəki ekspozisiya zalında Ulu Öndərin zəngin həyat yolu və çoxşaxəli fəaliyyətinin bütün dövrləri barədə ətraflı məlumat almaq mümkündür. Binada, həmçinin akt və konfrans zalları, elektron kitabxana, kinozal, müxtəlif dərnək otaqları, fotostudiya, poliqrafiya emalatxanası və digər otaqlar yerləşir. Mərkəzdə fəaliyyət göstərən rəqs, rəsm, gitara, gənc fotoqraf, dekorativ tikmə, xalçaçılıq və toxuculuq dərnəklərində hər gün onlarla yeniyetmə və gənc bu sənətləri öyrənirlər.
Tur-aksiya iştirakçıları dərnək otaqlarını gəzib, uşaq və gənclərin yaradıcılıq qabiliyyətləri ilə tanış olublar.
Sonra məktəblilər bölgənin ən iri fındıq emalı müəssisəsi olan “Azərsun Holdinq”in Zaqatala Fındıq Zavodu ilə tanış olublar. Məlumat verilib ki, illik emal gücü 5 min ton olan zavodda istehsal edilən fındıq ləpəsi əsasən Avropa ölkələrinə ixrac olunur. Məktəblilərin diqqətinə çatdırılıb ki, hazırda Azərbaycanda fındıq istehsalının böyük bir hissəsi Zaqatala rayonunun payına düşür.
Zaqatala Tarix-Mədəniyyət Qoruğu ilə tanışlıq zamanı məlumat verilib ki, qoruq 1804-1830-cu illərdə inşa edilən Zaqatala qalasında yerləşir. Çar hakimiyyəti tərəfindən Zaqatalaya sürgün edilmiş “Potyomkin” zirehli gəmisinin inqilabçı matrosları vaxtilə məhz bu qalada məhbus kimi saxlanılıblar. Üç giriş qapısı olan qalanın daxilində müxtəlif məqsədlər üçün tikilmiş 15 yerli əhəmiyyətli tarixi abidə var.
Bildirilib ki, Zaqatala qalasında saxlanılan matrosların inqilabi fəaliyyətindən bəhs edən “Yenilməz batalyon” filmi məhz bu tarixi məkanda çəkilib.
Tur-aksiya iştirakçıları qalanın ərazisini gəzib, xatirə şəkilləri çəkdiriblər.
Sonra məktəblilər ümummilli lider Heydər Əliyevin adını daşıyan Mədəniyyət və İstirahət Parkını ziyarət ediblər. Diqqətə çatdırılıb ki, 1947-ci ildə salınan parkın ərazisi 13 hektardır. Burada 27 ağac növü var.
Məktəblilər “Qala düzü pilləkənləri”ndən düşərək Zaqatala şəhərinin tarixi hissəsinə – Dədə Qorqud meydanına gəliblər.
Tur-aksiya iştirakçıları sonra Zaqatala Tarix-Diyarşünaslıq Muzeyinə baş çəkiblər. Məlumat verilib ki, 1967-ci ildə yaradılan muzeydə 16 minə yaxın eksponat qorunub saxlanılır.
Füzuli rayonunun Böyük Bəhmənli kənd 2 saylı tam orta məktəbin 11-ci sinif şagirdi İnci Süleymanova, İmişli şəhər 8 saylı tam orta məktəbin 9-cu sinif şagirdi Ləman Şəmmədli, İmişli şəhər 3 saylı tam orta məktəbin 11-ci sinif şagirdi İbrahim Məmmədli və digərləri AZƏRTAC-ın müxbiri ilə söhbətlərində dövlətimizin başçısının tapşırığı ilə həyata keçirilən “Ölkəmizi tanıyaq” tur-aksiyasının gənclərin dünyagörüşünün zənginləşməsinə böyük töhfə olduğunu bildiriblər. Məktəblilər vurğulayıblar ki, məhz bu layihə sayəsində onlar ölkəmizi qarış-qarış gəzərək, Azərbaycanın dilbər guşələrini, tarixi məkanlarını əyani şəkildə görür, bölgələri daha yaxından tanıyırlar. “Belə ekskursiyalar biz məktəblilərdə böyük ruh yüksəkliyi yaradır, daha yaxşı oxumağa sövq edir”, - deyə məktəblilər bildiriblər.
“Ölkəmizi tanıyaq” maarifləndirici tur-aksiyanın iştirakçıları Zaqataladan zəngin təəssüratlarla ayrılıb, Qəbələyə yola düşüblər.