REGİONLAR
Füzulidə erməni təxribatına məruz qalan 150-yə yaxın yaşayış və qeyri-yaşayış obyektinin təmiri başa çatıb FOTO VİDEO
Füzuli, 18 mart, Aydın Yavərzadə, AZƏRTAC
Müharibə zamanı Füzulidə erməni təxribatına məruz qalan evlərin tikinti və təmir-bərpası davam edir. Bir çox evdə işlər yekunlaşıb və sahiblərinə təhvil verilib, digərlərində isə işlər aparılır.
AZƏRTAC-ın bölgə müxbiri xəbər verir ki, düşmənin dinc əhalinin yaşadığı əraziləri atəşə tutması zamanı onlarla ev, sosial obyekt dağılıb. Hazırda həmin evlərin tikinti və bərpası davam edir. Prezident İlham Əliyevin göstərişinə uyğun olaraq tikinti-bərpa işləri Dövlət Şəhərsalma və Arxitektura Komitəsi tərəfindən aparılır.
Vətən müharibəsi zamanı erməni təxribatına məruz qalan rayonlardan biri də Füzulidir. Azərbaycan Ordusu qarşısında aciz qalan erməni hərbi birləşmələri mütəmadi olaraq rayonun yaşayış məntəqələrini hədəf seçirdi. Nəticədə yerli sakinlərin evləri, sosial obyektlər yarasız hala düşmüşdü. Artıq həmin evlər və tikililər yenidən qurulur.
Dağılan obyektlərdən biri də Horadiz şəhərində yerləşən Əhli-Beyt məscididir. Hazırda məsciddə təmir işləri yekunlaşmaq üzrədir. Məscidin imamı Nəriman Nəsirov söyləyir ki, döyüşlər zamanı bu əraziyə erməni faşistləri tərəfindən mərmi atılırdı. Əsas bina və yardımçı tikililər zədələnib. Lakin ordumuzun qələbəsindən dərhal sonra ölkə rəhbərliyinin göstərişi ilə təmir-tikinti işlərinə başlanıldı. Hazırda məsciddə görülən işlər yekunlaşmaq üzrədir.
Erməni təxribatı nəticəsində evi tamamilə dağılan sakinlərdən biri də Horadiz şəhər sakini Bağdagül Abbasovadır. O deyir ki, evi ermənilərin dinc sakinləri atəşə tutması nəticəsində yerlə-yeksan olub: “Çoxlu raketlər, top mərmiləri atsalar da, biz müzəffər ordumuza güvənərək öz yerimizi, doğma yurdumuzu tərk etmədik. Ali Baş Komandanın rəhbərliyi ilə ordumuz bizlərə qələbə sevincini bəxş etdi. Müharibə ərəfəsində dağılan evlərimiz də hazırda yenidən tikilir və biz bu diqqət qayğıya görə Prezidentimizə təşəkkür edirik”.
Müsahibimiz Möhrab Məmmədov bildirir ki, müharibə vaxtı ermənilər dinc əhalini hədəf seçib. “Erməni əsgərləri Azərbaycan Ordusunun qarşısında məğlub olurdular. Onlar bununla bizi qorxutmağa çalışsalar da, istəklərinə nail olmadılar. Hazırda dağıdılan evlərimiz dövlətimiz tərəfindən inşa edilir”, - deyə o qeyd edib.
Görülən işlər sayəsində tam təmir olunaraq sahiblərinə təhvil verilən evlər də var. Babı kənd sakini Əkbər Vəliyevin də evi təmir edilib. Ağır artilleriya atəşləri nəticəsində Vəliyevlər ailəsinin evi zədələnmişdi. Amma artıq o günlər arxada qalıb. Vəliyevlər bahar bayramını yeni təmir olunan evlərində qarşılayır.
Təkcə Füzuli rayonunda Horadiz şəhəri ilə yanaşı, 14 kənddə ümumilikdə, 360-dan çox dağıntı qeydə alınıb. Dağıdılmış və qəzalı vəziyyətdə olan 12 evdə yenidənqurma-tikinti işləri aparılır. 150-yə yaxın yaşayış və qeyri-yaşayış obyektinin təmiri tamamlanıb, 90-a yaxınında isə işlər davam edir.