REGİONLAR
Füzulidə fermerlər pambığın becərilməsində aqrotexniki tədbirlərin təşkili ilə bağlı məlumatlandırılıblar
Füzuli, 17 iyul, Tahir Ağaməmmədov, AZƏRTAC
Horadiz şəhərindəki Heydər Əliyev Mərkəzində Prezident İlham Əliyevin iştirakı ilə 2018-ci il martın 26-da Bərdədə keçirilən “Pambıqçılığın inkişafı məsələlərinə dair respublika müşavirəsi”ndə verilən tapşırıqların icrası ilə bağlı müşavirə keçirilib.
AZƏRTAC-ın bölgə müxbiri xəbər verir ki, Kənd Təsərrüfatı Nazirliyinin mütəxəssislərinin, rayonun aidiyyəti idarə və təşkilatlarının nümayəndələrinin, pambıqçılıqla məşğul olan fermerlərin, torpaq mülkiyyətçilərinin, kənd inzibati ərazi nümayəndələri və bələdiyyə sədrlərinin iştirak etdiyi toplantıda Füzuli Rayon İcra Hakimiyyətinin başçısı Alı Alıyev çıxış edərək, pambıqçılığın inkişafı istiqamətində rayonda görülən işlər, mövcud vəziyyət barədə məlumat verib. Bildirib ki, cəbhə bölgəsində yerləşən Füzuli rayonunda aqrar sektorun ənənəvi sahəsi olan pambıqçılıq son illərdə inkişaf etdirilir. Rayonun iqlim şəraiti, sakinlərin pambıqçılıq sahəsində təcrübəsi pambıq istehsalını artırmaq üçün stimul yaradır. Odur ki, rayonda pambıq əkinləri ildən ilə genişləndirilir. Bu il 2100 hektar sahədə çiyid səpini həyata keçirən pambıqçılıqla məşğul olan fermerlər hazırda becərmə işlərini uğurla davam etdirirlər.
Kənd təsərrüfatı nazirinin müavini Seyfəddin Talıbov “Azərbaycanda pambıqçılığın inkişafı - hədəflər və perspektivlər” mövzusunda çıxış edərək, nazirlik tərəfindən bu sahədə görülmüş işlər və qarşıda duran hədəfləri diqqətə çatdırıb. Bildirib ki, ölkəmizdə pambıqçılığın inkişafı istiqamətində ardıcıl tədbirlər görülür, bu sahəyə yüksək dövlət qayğısı göstərilir. Prezident İlham Əliyev Bərdədə keçirilən müşavirədə məhsuldarlığın yüksəldilməsini mühüm vəzifə kimi qarşıya qoyub. Bu gün qarşıda duran əsas hədəf pambığın becərilməsində intensiv texnologiyalardan istifadə etməklə məhsuldarlığı artırmaq və 500 min ton məhsul istehsalına nail olmaqdır. Bunun üçün isə ilk növbədə pambıqçılıq üçün yararlı və su ilə təminatlı torpaqlar seçilməli, növbəli əkin sistemi tətbiq edilməli, toxumçuluq düzgün təşkil edilməli və becərmə işləri düzgün və vaxtında aparılmalıdır.
Müşavirədə Kənd Təsərrüfatı Nazirliyinin əməkdaşı İmran Cümşüdov “Pambıqçılığın intensiv texnologiyalar əsasında becərilməsi”, Dövlət Fitosanitar Nəzarəti Xidmətinin rəisi Ələddin Eyvazov “Bitki mühafizə vasitələrindən səmərəli istifadənin təşkili”, “Aqrolizinq” ASC-nin şöbə müdiri İsrafil İsmayılov “Texnika və gübrə ilə təminatın vəziyyəti” mövzularında çıxış ediblər.
Bildirilib ki, 2016-2017-ci illərdə 300 milyon manatlıq kənd təsərrüfatı texnikası alınaraq ölkəyə gətirilib. Bu il isə texnikanın alınması üçün dövlət büdcəsindən 160 milyon manat vəsait ayrılıb ki, onun da 108 milyon manatı pambıqçılıq üçün nəzərdə tutulub. Artıq bu texnikanın yarıdan çoxu ölkəyə gətirilərək, fermerlərin istifadəsinə verilib. Ümumilikdə isə 2014-2018-ci illərdə “Aqrolizinq” ASC-nin xətti ilə dövlət vəsaiti hesabına 42 min 500-ə yaxın müxtəlif adda texnika alınıb.
Tədbir müşavirə iştirakçıları tərəfindən müzakirələr və qarşılıqlı fikir mübadiləsi ilə davam edib.
Müşavirə başa çatdıqdan sonra tədbir iştirakçıları pambıq tarlasında mütəxəssislər tərəfindən fermerlərə kultivasiya, zərərvericilərlə mübarizə, pestisidlərdən düzgün istifadə və digər becərmə işlərinin səmərəli təşkilinə dair lazımi tövsiyələr verilib, onların təklifləri dinlənilib, sualları cavablandırılıb.