AZƏRTAC xəbər verir ki, Milli Məclisin daimi komissiyalarının oktyabrın 7-də keçirilən birgə iclasında “Azərbaycan Respublikasının 2006-cı il dövlət büdcəsi haqqında” qanun layihəsi müzakirə olunmuşdur.

İqtisadi siyasət daimi komissiyasının sədri Səttar Səfərov demişdir ki, son illər aparılan məqsədyönlü siyasət nəticəsində ölkənin iqtisadi potensialı xeyli artmışdır. Bunun nəticəsidir ki, əmək haqları, sosial pensiya və müavinətlərin məbləği artır, əhalinin sosial rifah halı yaxşılaşır. İqtisadi inkişaf dövlət büdcəsində də öz əksini tapmışdır. Ötən illərdən fərqli olaraq 2006-cı ilin büdcə parametrləri əsaslı dərəcədə artmışdır.

Sonra maliyyə nazirinin müavini Azər Bayramov gələn ilin büdcə proqnozları barədə məlumat vermişdir. O demişdir ki, 2006-cı ildə Azərbaycan Respublikasının sosial-iqtisadi proqnozlarında ümumi daxili məhsulun həcminin 2005-ci illə müqayisədə 30 faizdən çox artacağı gözlənilir. Gələn ilin dövlət büdcəsi gəlirlərinin və xərclərinin əsas xüsusiyyətlərindən biri büdcə sistemində aparılmış islahatlara uyğun olaraq büdcənin yeni təsnifat və yeni manat miqyasında tərtib edilməsi, onun strukturunun təkmilləşdirilməsidir. Ölkə iqtisadiyyatının inkişafı, vergi qanunvericiliyinin təkmilləşdirilməsi istiqamətində təsirli tədbirlərin görülməsi nəticəsində növbəti ildə dövlət büdcəsinin gəlirləri 4 dəfə artacaqdır. 2006-cı ildə dövlət büdcəsinin gəlirləri ümumi daxili məhsulun 23,6 faizi həcmində nəzərdə tutulmuşdur ki, bu da 2005-ci ilin göstəricilərinə nisbətən 67,8 faiz çoxdur.

Gələn il dövlət büdcəsinə Vergilər Nazirliyinin xətti ilə 2229,6 milyon manat (rəqəmlər manatın denominasiyası ilə göstərilmişdir), Dövlət Gömrük Komitəsi üzrə 477,4 milyon manat daxil olacağı proqnozlaşdırılır. Büdcə daxilolmalarının qalan hissəsi isə qanunla nəzərdə tutulmuş digər mənbələr hesabına həyata keçiriləcəkdir.

2006-cı ilin dövlət büdcəsinin xərcləri ÜDM-in 24,7 faizi həcmində olmaqla və kəsirin maliyyələşmə mənbələri nəzərə alınmaqla 3566,3 min manat nəzərdə tutulub ki, bu da 2005-ci ilə nisbətən 3 bənd çoxdur.

Sosial yönümlü xərclərin büdcədə xüsusi çəkisi 39,9 faiz və ya 1421,9 milyon manatdır. Bu da cari ildəkindən 29,6 faiz çoxdur. Gələn il dövlət büdcəsindən əmək haqqı fondu üçün isə 718,2 milyon manat vəsait nəzərdə tutulmuşdur.

2006-cı ildə büdcə kəsirinin yuxarı həddi 158. 000.0 min manat, inflyasiyanın isə 9 faizdən çox olmaması nəzərdə tutulur.

Layihənin müzakirəsi zamanı deputatlar büdcədəki artımları yüksək qiymətləndirmiş, bəzi maddələrə münasibətlərini bildirmişlər. Layihəni Milli Məclisin müzakirəsinə çıxarmaq qərara alınmışdır.