İspaniyanın Malaqa şəhərində yerləşən Avropa-Latın Amerikası Gənclər Mərkəzində dünyanın bir sıra gənclərdən ibarət ictimai birlikləri tərəfindən təşkil edilmiş “Gənclər və inkişaf məsələləri üzrə IV Beynəlxalq konfrans”da Azərbaycanı “Güc Birlikdədir” ictimai birliyi təmsil etmişdir.

Birlikdən AZƏRTAC-a bildirmişlər ki, tədbirdə Azərbaycandan olan iştirakçılar ölkəmizin reallıqları ilə bağlı məlumatın yayılması sahəsində fəal iş aparmışlar. Onlar konfransın bütün iştirakçıları üçün xüsusi prezentasiya keçirmiş, Azərbaycanın tarixi, mədəniyyəti və müasir reallıqları haqqında ətraflı məlumat təqdim etmişlər. Ermənistanın Azərbaycan torpaqlarını işğal etməsi məsələsinə xüsusi diqqət yetirilmişdir. Münaqişə ilə bağlı BMT TŞ-nın məlum 4 qətnaməsi, Ermənistanın bu sənədlərə məhəl qoymaması, təcavüz nəticəsində ölkəmizdə yaranan bir milyondan çox qaçqın və məcburi köçkünün

problemlərinin həlli, mənzil-məişət şəraitinin yaxşılaşdırılması sahəsində Azərbaycan hökumətinin həyata keçirdiyi tədbirlər haqqında ətraflı məlumat verilmişdir. Azərbaycanda qaçqın və məcburi köçkünlərin problemlərinə həsr olunmuş, ingilis dilində 2 saatlıq film nümayiş etdirilmişdir. Konfrans iştirakçıları bu filmdən mütəəssir olduqlarını bildirmişlər.

Təqdimatda iştirak edən beynəlxalq ictimaiyyətin nümayəndələrinin Azərbaycan mədəniyyəti və ənənələri ilə tanış olmaları üçün milli musiqi gecəsi təşkil olunmuş və xörəklərimizlə bəzədilmiş süfrə açılmışdır.